JOSUÉ 10

1Tzaj nim t-xobil Adonisedec aju rey te Jerusalén, tej tbinte otok cub ti'j tnam Hai tu'n Josué ex otok baj t-xitun tnam tuc'ix ju rey, ic tza'n otok tbincha ti'j tnam Jericó ex ti'j rey at tuj; ax icx otok tbi ka otok bant ti'j cyu'n aj Gabaón cyuc'il aj Israel tu'n mi'n cyk'ojin, ex axtzun otok che najan aj Gabaón cyxol aj Israel. 2Cyja'tzun tzaj mastl t-xobil Adonisedec, porque aju tnam Gabaón ma' toclen ic tza'n ke mastl tnam, ex mas ma tij ic tza'n tnam Hai, ex ax najl rey tuj, ex ke xjal aj Gabaón at nim cyipun tu'n cyk'ojin. 3Cyja'tzun xi t-sama'n Adonisedec ke xjal k'malte ke yol lu te Hoham aju rey te Hebrón, te Piream aju rey te Jarmut, te Jafía aju rey te Laquis, ex te Debir aju rey te Eglón: 4Cytzaje onil wuc'ile tu'n kk'ojin cyi'j aj Gabaón, porque ma bant ti'j jun cyyol tuc'il Josué ex cyuc'il aj Israel, chi Adonisedec. 5Bajtzun cychmon cyib ke jwe' rey cye aj Amorrey, ex atzun ke jlu: Aju rey in cawin tuj Jerusalén, aju rey in cawin tuj Hebrón, aju rey in cawin tuj Jarmut, aju rey in cawin tuj Laquis ex aju rey in cawin tuj Eglón; cub be cyu'n cyuc'ix ke cysoldad, ex e cub ten ttxlaj tnam Gabaón tu'n cyk'ojin ti'j. 6Atzun cye aj Gabaón xi cysama'n tkanil tuc'il Josué max tuj Gilgal, jatum otok che cub ten aj Israel, che chi cyja': Mi'n cub t-xc'ayin tiba tu'n ttzaja onil keye, ako'ye ajbel teya. Ttzaj naja onil ki'je te colol keye, porque ma baj cychmon cyib cycyakil ke rey cye aj Amorrey, akeju najl tuj tiwitz tx'otx', tu'n cyk'ojin ki'je. 7Etztzun Josué tuj Gilgal cyuc'ix ke t-soldad cyuw cyc'u'j tuj k'oj. 8Atzunte Kman tzaj tma'n te: Mi'n xoba cywitz porque che xel nk'o'ne tuj tk'aba, ex mi jun ctel tipun tu'n toc tzokpaj ti'ja, chi Kman. 9Etztzun Josué tuj Gilgal, e bet tuj enter konic'an tu'n cypon jatum ate' ke aj Amorrey, ex nok minaben e oc tzokpaj cyi'j. 10Bi'x e jaw sec'paj ke aj Amorrey cywitz aj Israel tu'n Kman, cyja'tzun e cub nimcu aj k'oj cyu'n aj Israel tuj Gabaón, ex te tibajxi jlu e je'x lpe' cyi'j mastl tuj be in xi' tuj tnam Bet-horón, ex cucx e cub ke aj Amorrey cyu'n tuj be tejxi cypon max tuj tnam Azeca ex tuj tnam Maceda. 11Tej cycu'x aj Amorrey twitz cubl te lugar Bet-horón in che oktok cywitz aj Israel, tzaj t-xo'n Kman txkan sakbakun cyibaj, nmak ke wen ic tza'n abj, ex mas nim aj Amorrey e cyim tu'n sakbakun cywitz keju e cyim tu'n spad cyu'n aj Israel. 12Tej cyxi k'o'n aj Amorrey tuj cyk'ab aj Israel tu'n Kman, xi tma'n Josué cywitz tnam xjal cyja': Ax we'ya k'ij tibaj tnam Gabaón; ex ax we'ya xjaw tibaj chk'ajlaj Ajalón, chi Josué. 13Axtzun o we' k'ij ex xjaw, minti' e bet tejxi tcub cyi'j aj k'oj cyu'n aj Israel. A jlu tz'iban tuj libro cyaj ttz'iban Jaser. Aju k'ij ax o we' tmijil cya'j, balo chixmi te jun k'ijcu minti' ex k'ij. 14Na'nxtok tbaj jun maj icju, ex na'nx tbaj juntl maj icju, ic tza'n o baj tej t-xi tniman Kman tyol jun xinak, porque acu Kman o tz'onin cye aj Israel tuj k'oj lu. 15Te tibajxi jlu ajtztzun Josué cyuc'ix aj Israel tu'n cypon tuj campament tuj Gilgal. 16Atzun ke jwe' rey e je'l ok ex xi cyewan cyib tuj jun toy' jul tuj Maceda. 17Pero mas yajxi e cnet tuj toy' jul lu, ex pon tkanil tuc'il Josué. 18Cyja'tzun xi tma'n Josué cye: Cytolinxe ke matij abj tu'n cypon ttzi toy' jul, cymaksin oque, ex cyk'on cube ke xk'ukil ttzi' tu'ntzun toc cycwentin. 19Atzun cye mastl soldad xi tma'n Josué: Mi'n ax che cub tene tzalu. Cyxi'ye k'ol welt ttzal cyi'j aj k'oj ex cyoc tzokpaje cyi'j. Mi'n txi cyk'o'ne ambil cye tu'n cyaj meltz'aj tuj cytanmi, porque ma che tzaj k'o'n tuj cyk'abe tu'n Kman Dios, chi Josué. 20Cub cyi'j aj Amorrey tu'n Josué ex cyu'n aj Israel. Nimxix xjal e cub cybyo'n, atzun junjuntl aj Amorrey e cyaj ank'in e je'x clol cyib cyuj cytanmi toc muro cyi'j. 21Atzun cye aj Israel tuj txubtxaj e ajtz meltz'aj ex minti' jun o baj cyi'j, e ul tuj cycampament tcub ttxlaj Maceda jatum ta'tok Josué, ex mi jun o yolin mya ba'n cyi'j aj Israel. 22Xitzun tma'n Josué cye: Cyjako'n ela ttzi toy' jul ex cyi'n etze ke jwe' rey. 23Cybinchatzun aj Israel icju ex e je'tz cyi'n ke rey tuj toy' jul; etz cyi'n rey te Jerusalén, rey te Hebrón, rey te Jarmut, rey te Laquis, tuc'ix rey te Eglón. 24Tejtzun cyul k'i'n twitz Josué, e tzajtzun ttxco'n Josué cycyakil ke xinak aj Israel, ex xi tma'n cye ke nejenel cye soldad akeju ate' tuc'il: Che lak'etze ex che we'cuye tibaj cykul ke rey lu. Atzun cye nejenel o cybincha icju, 25ex xi tma'n Josué cye: Mi'n che xobe ex mi'n baj cyc'u'je; nok o'cx tenx cyipune ex cyuwx cyc'u'je, porque ax jlu cbantel tu'n Kman cyi'j cycyakil aj k'oj cyi'je. 26Te tibajxi e cub tbyo'n Josué ke rey lu, ex xi tma'n tu'n cyjaw yoban junjun ti'j junjun wi' tze', ex ax cyojxsa'n tejxi toc kax. 27Tejtzun ch'ixtok tex k'ij xi tma'n Josué tu'n cycu'tz k'i'n cywi' ke tze', ex tu'n cyocx k'ot tujx toy' jul jatum cyewantok cyib. Ex octzun cymaksi'n ttzi toy' jul tu'n junjun matij abj, ex ax ate' ke abj lu ja'lo. 28Tujx k'ij lu cub ti'j tnam Maceda tu'n Josué ex bi'x naj tu'n te jumajx; e cub tbyo'n tu'n spad cycyakil ke xjal najlke tuj tnam lu, ex mi jun cyaj ank'in tu'n. Ic o tbincha ti'j rey tuj tnam Maceda ic tza'nx o tbincha ti'j rey tuj tnam Jericó. 29Cyic'lenxitzun Josué cyuc'ix ke aj Israel tuj tnam Maceda, e pon tuj tnam Libna ex e oc tzokpaj ti'j. 30Ax icx xi tk'o'n Kman tnam lu tuj tk'ab, tuc'ix ju rey at tuj. Cub tbyo'n cycyakil xjal tu'n spad, mi jun cyaj ank'in tu'n, ex o tbincha ti'j rey tuj tnam Libna ic tza'nx o tbincha ti'j rey tuj tnam Jericó. 31Cyic'lenxi Josué cyuc'ix ke aj Israel tuj tnam Libna, e pon tuj tnam Laquis, atzun e cub ten twitz tnam ex e oc tzokpaj ti'j. 32Tujtzun tcabin k'ij tzaj tk'o'n Kman tnam Laquis tuj cyk'ab, ex cubtzun cybyo'n ke aj Israel cycyakil xjal tu'n spad akeju najlke tuj tnam lu, ic tza'nx otok tenba tnam Libna. 33Atzunte Horam aju rey te tnam Gezer o tzaj cyuc'ix ke t-soldad colil ti'j tnam Laquis, pero bi'x o naj rey cyuc'ix ke t-soldad tu'n Josué, ex mi jun xjal cyaj ank'in tu'n. 34Cyic'lenxi Josué cyuc'ix ke aj Israel tuj tnam Laquis, e pon tuj tnam Eglón, ex atzun e cub ten twitz tnam ex e oc tzokpaj ti'j. 35Tujx k'ij lu cub ti'j tnam cyu'n ex cub cybyo'n cycyakil xjal tu'n spad; akeju najl tuj tnam bi'x e cub baj cyu'n te jumajx, ic tza'nx otok che tenba ke xjal tuj tnam Laquis. 36Cyic'lenxi tuj tnam Eglón e pon tuj tnam Hebrón, ex e oc tzokpaj ti'j. 37Tejtzun tcub ti'j tnam cyu'n, bi'x cub cyxitun te jumajx ex cub cybyo'n tu'n spad aju rey cyuc'ix cycyakil xjal najlke tuj tnam lu, ax icx e cub cybyo'n ke xjal najlke cyuj ke tnam cyvesin cyib tuc'il, ic tza'nx otok cybincha ti'j tnam Eglón. 38Cyic'lenxi Josué cyuc'ix ke aj Israel tuj tnam Hebrón, e pon tuj tnam Debir ex e oc tzokpaj ti'j, 39cub cybyo'n tu'n spad aju rey at tuj tnam, cyuc'ix ke xjal najlke cyuj ke tnam cyvesin cyib tuc'il. Mi jun xjal najl tuj tnam Debir o cyaj ank'in; cycyakil e baj naj cyu'n, ic tza'nx otok cybincha ti'j tnam Hebrón, ti'j tnam Libna ex cyi'j ke cyrey. 40Cyja'tzun tten o tzyet tcyakil tx'otx' lu tu'n Josué. E cub ke rey tu'n, akeju ate' tuj tiwitz tx'otx', keju ate' tuj tx'otx' Néguev, keju ate' tuj chk'ajlaj ex keju ate' tc'u'j witz. Tcyakil cub t-xitun ex cycyakil xjal e cub tbyo'n; mi jun cyaj ank'in tu'n ic tza'n otok tma Kman Dios te. 41Bi'x e cub tbyo'n Josué cycyakil ke rey ex tzyet tcyakil cytx'otx' tu'n, tzajx ke' max tuj Cades-barnea tejxi tpon baj max tuj Gaza, ex tcyakil tx'otx' Gosén tejxi tpon baj tuj tnam Gabaón, porque ate Kman Dios o tz'onin cyi'j tuj k'oj. 43Te tibajxi jlu ajtz Josué cyuc'ix cycyakil aj Israel tu'n cyul tuj campament tuj Gilgal.

will be added

X\