1 Tcyimlenxitzun Moisés aju tmajen Dios, o yolin Kman tuc'il Josué aju onil te Moisés ex tcy'ajal Nun, ex chi Kman te cyja': 2 Ma cyim nmajene Moisés, atzun ja'lo aya cxel uc'inte cye aj Israel, tu'n cypon max jlajxi nima Jordán tuj tx'otx' cxel nk'o'ne cye. 3 Tcyakil tx'otx' jatum cbajel cybetine cxel nk'o'ne cyeye, ic tza'nx o txi ntziyane te Moisés. 4 Aju tmojonil cytx'otx'e ctzajel ke' max ttxa'n tzkij tx'otx', tu'n tpon baj tuj tiwitz tx'otx' Líbano; ex tu'n ttzaj ke' jatum ta' nima Éufrates tuc'ix tcyakil cytx'otx' aj Hetey, ex cpol baj ttzi Nintz Mar tuj telex k'ij. 5 Mi a'l jun cbel ti'ja tu'n tuj tcyakil k'ij oc ttena twitz tx'otx'; akine chin tel tuc'ila ic tza'n in tene tuc'il Moisés; mlayx tz'el npa'n wibe ti'ja ex mlay cyaj ncolina. 6 Tenx tipuna ex cyuwx tc'u'ja. Aya cbel sipante cytx'otx' ke xjal lu, aju cyetzbil xi ntziyane cye cyxe'chel. 7 O'cx cxel nma'ne teya tu'n tten nimxix tipuna ex cyuwx tc'u'ja, ex tu'n tjapun tu'na tcyakilju ley xi tk'o'n nmajene Moisés teya; japunx tu'na ex mi'n tz'el tpa'n tiba ti'j, tu'ntzun tel ba'n tcyakilju cbantel tu'na. 8 Cucx yolina ti'j ju yol tz'iban tuj libro te nleye, ex ximana ti'j k'ijl ex konic'an, tu'ntzun tbinchanteya aju in tma'n. Ka ma bant tu'na icju, tcyakilju cbantel tu'na ba'n c'elel. 9 Akine in chin k'mante teya tu'n tten tipuna ex cyuwx tc'u'ja. Mi'n xoba ex mi'n baj tc'u'ja, porque akine Tmana aju Tdiosa chin tele tuc'ila nok jatumchak cxe'la, chi Dios te Josué. 10 Xitzun tma'n Josué cye nejenel cyxol aj Israel alcye tu'n tbant cyu'n: 11 Cyxi'ye cyxol cycyakil xjal ex cymanxe cye tu'n tbant tten cywa tu'n t-xi cyi'n tuj cybe, porque tuj ox k'ij ja'lo ko ic'ex tuj nima Jordán tu'ntzun kc'monte aju tx'otx' tzul tk'o'n Kman Dios te ketzbil. 12 Ax icx xi tma'n Josué cye tiyjil Rubén ex cye tiyjil Gad ex cye mij tiyjil Manasés: 13 —Cyna'ntze aju o tma Moisés cyeye, aju tmajen Dios, tej tmante tu'n ttzaj k'o'n ju tx'otx' lu te cyeye tu'n Kman Dios, tu'ntzun cynajane twitz. 14 Cyk'on cyaje cyxu'jile tzalu, cyuc'ix ke tal cyc'wa'le ex cyalune, tuj tx'otx' aju tzaj tk'o'n Moisés cyeye jlajtzi nima Jordán. Atzun ke xinak ma pon cyipun, ba'n tu'n t-xi cyi'n cymacbil in ajben tuj k'oj, ex e cycub nej cywitz ke cyerman, tu'ntzun cyonin cyi'j tuj k'oj. 15 Ocxi ttzaj tk'o'n Kman jun lugar cye jatum tu'n cynajan, ic tza'n ma tzaj k'o'n cyeye, ex ocxi cyoc te tajwil tx'otx' tzul tk'o'n Kman cye, ba'ntzun tu'n cyajtze tzalu twitz cytx'otx'e jlajtzi nima Jordán tuj tjawitz k'ij, tu'ntzun cyoque tajwil tx'otx' lu, aju tzaj tk'o'n Moisés cyeye, aju tmajen Dios, chi Josué cye. 16 Atzun cye xi cytzak'we'n: —Cbantel ku'ne tcyakilju ma tzaj tma'na keye, ex ko xe'le nok jatum ko xel t-sama'na. 17 Tcyakil maj cxel knimane ic tza'n xi knimane Moisés. Nok o'cx kajbile tu'n t-xi' Kman tuc'ila ic tza'n o bet tuc'il Moisés. 18 Ka at jun ma tzic' tibaj tyola, ex ka minti' ma txi nimana tu'n, il ti'j tu'n tcyim. Nok o'cx kajbile tu'n tten tipuna ex cyuwx tc'u'ja, che chi.
