JONÁS 3

1Tzaj yolin Kman tcabinmaji'n tuc'il Jonás ex tma: 2Chux k'oncu beya, txi'ya tuj nintz tnam Nínive ex k'manxa aju cxel nma'ne teya, chi Kman. 3Cubtzun be tu'n Jonás ex xi' tuj tnam Nínive ic tza'nx otok tma Kman te. Ma tijxix aju tnam Nínive, oxe k'ij in xi ti'n tu'n tbaj kbetin tuj. 4Ocxtzun Jonás tuj tnam ex jun k'ij o bet in tma'n cyuwxix wen: —Tuj 40 k'ij ja'lo cbajel xitj tnam Nínive. 5Ke xjal aj Nínive e ocslan ti'j Dios, etz jun tkanil cyu'n tu'n tcub cyyo'n we'yaj, ex cycyakil, tza'nx ke tij xjal ax icx ke c'wa'l, oc cyk'o'n cyxbalun ch'i'x twitz te jun techal ka otok tz'ajtz ti'j cyanmi. 6Tejtzun tpon tkanil tuc'il rey te tnam Nínive, ax icx te jaw we' tuj tk'ukbil jatum in cawin, el ti'n t-xbalun tbanil, oc tk'o'n t-xbalun ch'i'x twitz, ex cub ke' tuj tza'j. 7Entons ate rey cyuc'ix ke xjal ma' cyoclen ate' ttxlaj, ex cyk'o'n tkanil tuj tcyakil tnam ti'j jun ley in tma'n cyja': Mi jun xjal cwa'l, mi ke alumaj, ka ẍne'l ex ka wacẍ. Mi'n che wa'n ex mi'n che c'an a'. 8Nok o'cx cyk'o'n oque cyxbalune ch'i'x twitz cyi'je tuc'ix cyi'j alumaj, ex che cubsane twitz Dios tu'n tcyakil cyipune, ex teyle junjun tu'n tcyaj tcolin tmod mya ba'n ex ju mya ba'n in cybincha'n cyi'j mastl ma bet-xi k'ij ex cucx ja'lo; 9kape jacu tzaj chewix tc'u'j Dios ex kape jacu tzaj k'ak'an tc'u'j ki'j tu'n mi'n kcyim, che chi. 10Tej ttil Dios aju cybincha xjal tuj Nínive, tza'n tten oc tilil cyu'n tu'n tcyaj cycolin cybinchben mya ba'n, cub t-ximan Dios tu'n mi'n tbinchante mya ba'n cyi'j, ex minti' tzaj tk'o'n castiw cyibaj, aju otok tma nej.

will be added

X\