JOB 9

1Tzyettzun tyolin Job ex tma: 2Ba'n wu'ne ax toc jlu, mlay txi tma'n jun xjal ka minti' til twitz Dios. 3Ka at jun xjal taj tz'oc ten yolil tuc'il Dios tu'n tclonte tib, cyxol jun mil tyol Dios mi jun jacu tzak'wet tu'n. 4Ate Dios ma'xix tipumal ex nimxix tnabl, ¿alcye jun jacu cub twaban tib twitz ex jacu tzokpaj? 5Tu'n tk'oj Dios in che tzaj yucch ke witz; in che cub t-xitun ex minti' ba'n cyu'n alcye otok yucunte cye. 6Tu'n Dios in tzaj lu'lun tx'otx' ex in che baj yucch ke tk'ukbil tu'n. 7Ka ma tma Dios tu'n mi tjawil k'ij, ax mlay jawil, ex ka ma tma cye che'w tu'n mi tc'ant cyspic'umal, ax mlay che c'ant. 8Mi jun onin ti'j tej t-xi tlic'pu'n cya'j ex in bet tibaj mar in pulin wen. 9Ate baj binchante ke che'w tuj c'lojin: Jun c'loj Osa Mayor cybi, juntl c'loj Orión cybi ex juntl c'loj Pléyades cybi, ex jun c'loj che'w ate' tuj tnayaj k'ij. 10Nimxix tbinchben Dios in bant ma'xix t-xilen, ex mi a'l jun jacu tz'el tnic' ti'j. 11Ka ma tz'ex Dios nwitze mlay wile; c'ic'el tacl wi'je ex mlay nna'ye. 12Ka at jun ti'xti nne'l tetzan, ¿alcye jun jacu tz'oc mayonte te ti'j? ¿Alcye jun jacu txi kanin te: ¿Ti in tbincha'na, chiwt? 13Ka in tzaj tk'oj Dios mlayx chewix tc'u'j jurat naj; twitz cbel cymansin cyib keju mojl cyyol tuc'il Rahab, aju nintz txcup at tuj mar. 14¿Tza'ntzun tten tu'n tcnet yol wu'ne tu'n taj nmojtza'ne Dios? 15Masque minti' in bant il wu'ne twitz Dios, pero mlay bant ttzak'wet wu'ne; ate Dios jwes wi'je, o'cx jacu txi nkanine tu'n ttzaj k'ak'an tc'u'j wi'je. 16Ka ma tzaj ntxco'ne ex ka ma tzaj ttziyan tu'n tul, pero mlay txi nnimane ka jacu che tzaj tbi'n ke nyole. 17Jaculo tzaj t-sama'n cyk'ik' jbal tu'n nc'ixbisanjtze tu'n, ex jaculo tz'oc tk'o'n mas ẍil wi'je nokx gan. 18Jaculo tzaj nimxix bis wi'je tu'n, ex mlaylo tzaj tk'o'n ambil tu'n tjatz nxewe. 19Ka ma ko yolin ti'j alcye mas at tipumal, ax toc ate Dios at mas tipumal; ka kajbil tu'n toc tuj xjel, ¿alcye ctzajel txconte te tu'n tul? 20Masque minti' wile, pero ax ntzi'ye ck'malte ka at wile ex mya ba'n kine. 21Masque minti' wile, pero minti' tajben jlu weye; ma baj nganiye tu'n wank'ine. 22Tcyakil junx ta'. Atzun jlu ximan wu'ne: In che naj tu'n Dios ke xjal at cyil, ax icx keju minti' cyil. 23Ka minaben ma tzaj jun c'ixbisabl cyibaj xjal ex ka ma che cyim keju minti' cyil, nok in jaw tze'n Dios ti'j ju nnic'x cyu'n. 24In cyaj tk'o'n ke nasyon tuj cyk'ab xjal mya nimal Dios ke, ex nno'c tmaksi'n cywitz ke jwes. Ka mya tu'n Dios in bant jlu, ¿al u'ntzun? 25Aju nk'ijlalile ojkelxix tel, ex na'nx toc nque'yine aju ttxubtxajal. 26In ojkelanxix tel, ic tza'n ke barc cyuw che bet, ic tza'n jun t'iw in xi lipan ti'j tcanb tu'n ttzyet tu'n. 27Ka ma cub nximane tu'n tic' tna'l nbise ex tu'n t-xi nyec'une nwitze in tzalaj, 28tcyakil c'ixc'oj nna'jtz meltz'aj sec'pul weye, porque ba'n wu'ne mlay txi tniman Dios ka minti' wile. 29Katzun at wile tuj twitz Dios, nokxlo gan tu'n tjaw wipuman wibe. 30Masque tz'el ntx'jo'ne nk'abe tu'n jabón, ex masque tz'el njaku'ne tu'n ta'l tza'j, 31jaculo chinx t-xo'n Dios tuj soban, ex axpelo nxbalune jacu tz'el ic'unte weye. 32Nokwit xjal te Dios ic tza'nx kine, jacwitlo tz'aj ntzak'wene, ex jacwitlo txi nma'ne te tu'n kxi'ye tuc'il twitz jun jwes tu'n t-xi bincha'n ki'je. 33Nokwit at jun jwes kxole tu'n tcawin kibaje kcabile, 34tu'n tmayet Dios tu'n, tu'n mi'n cucx tcub ncastiwoye tu'n, ex tu'n mi'n cucx ttzaj tk'o'n xobajil wi'je, 35entons jaculo chin yoline tuc'il minti' nxobile, ex jaculo txi nma'ne te ka minti' wile.

will be added

X\