JOB 8

1Tzyettzun tyolin Bildad aju aj Súa, ex tma: 2¿Jtoj txi tcolina tu'n tyolina icju, in yolina ic tza'n jun nintz cyk'ik'? 3Ate Dios aju at tipumal tu'n tbant tcyakil tu'n mlay baj tmeltz'u'n aju tz'aklxix ex aju jikun ti'j. 4Malo che binchan ke tc'wa'la il twitz Dios, tu'ntzun jlu ma tzaj cycastiw tu'n. 5Ka ma txi tkanina onbil te Dios aju at tipumal tu'n tbant tcyakil tu'n, ex ka ma txi tkanina te tu'n ttzaj k'ak'an tc'u'j ti'ja, 6ka minti' tila ex ka ma tbinchaya aju tz'aklxix, c'oquel cwentina tu'n ex ctzalajela juntl maj tuj tjaya ex ti'j tcyakilju at teya, ic tza'n nej. 7Aju tk'inumabla at nej myaxix nim, atzunju tzul k'o'n te tibajxi, nimxix wen. 8Kaninxa cye ke ojtxi xjal, xnak'tzam tiba ti'j cyojtzkibl cyman. 9Atzun ke, ma c'itzke ko' ex minti' ch'in ba'n ku'n; aju kank'ibl tzalu twitz tx'otx' ic tten ic tza'n jun xlecun. 10Pero ke ojtxi xjal jacu che yolin tuc'ila, ex jacu tzaj cyk'o'n nimcu xnak'tzbil teya. 11Aju ajlaj ex aju tkan chum o'cx in che ch'iy jatum at nim a'; 12masque icju, pero cha'xtok ex na'nxtok cyjaw tx'emit, nej in tzkij cywitz mastl c'ul. 13Icxtzun in baj cyi'j ke xjal nnic' tna'l Dios cyu'n; minti' jatum tu'n toc ke' cyc'u'j; 14jatum nno'c ke' cyc'u'j minti' tipun, ic tza'n jun twitz nok', ex ic tza'n jun tchemaj xin. 15Ka ma che oc k'eje' ti'j tchemaj xin, mlayx tipa' tu'n mi'n tcub lakj; ka ma t-xi cyk'o'n cyalil tibaj tchemaj xin, mlayx xcye' tjak' cyalil. 16Ke xjal mya ba'n, ic cyten ic tza'n cha'x c'ul tcub ti'j k'ij in tzaj ch'iy cyxol tcyakil tkan awal; 17nim tloc' in xi bet cyxol abj ex in che baj tzyet ke abj tu'n tloc', 18pero ka at jun ma jaw bakonte te jatum tcub, mi a'l jun jacu tz'el tnic' ti'j ka attok jun c'ul o cub ten tuj lugar lu. 19Cyja'tzun tten in baj tzkij, ex jatum otok cub ten in tzaj pok'l mastl c'ul te t-xel. 20Minti' in cyaj tcolin Dios aju xjal minti' tpaltil, ex minti' in onin cyi'j ke xjal mya ba'n. 21Cjawil tze'na juntl maj tu'n Dios ex cjawil sch'ina tu'n tzalajbil. 22Atzun ke aj k'oj ti'ja ctzajel cych'ixwi, ex cbel xitj cyja ke xjal mya ba'n.

will be added

X\