JOB 7

1Cyuwxix tank'ibl jun xjal tzalu twitz tx'otx', ic tten ic tza'n tajbebl jun soldad, 2ex ic tza'n jun majen otok sict, tajbil tu'n tojlan ch'in t-xe xlecun, ex ic tza'n jun ak'nal in ayon jtoj tzul twi tc'u'j. 3Ictzun weye, ela'xi xjaw minti' ch'in in chin tzalaje, tcyakil konic'an nnic'x yajbil wu'ne. 4Oc in chinxe tal, matij nne'la konic'an tuj nwitze; ex in cub nximane ¿jnic' or tu'n njaw we'ye? Nim in chin sicte, tol wic'e tuj ncoẍbile ocxi ttzaj t-xe cya'j. 5Nojni ti'j nximlale cyu'n ẍuk', ma tz'el pok'j ntz'umile ex ma tzaj poj tuj ẍil ti'j nximlale. 6Ma tzul lak'e' tk'ijlalil tu'n ncyime, mas in ojkelan tu'n tel lak'e' ic tza'n nnic'x k'ot twabl telar, minti'x oybil weye. 7Na'ntza aya Nman Dios, aju nchwinklale ic tten ic tza'n jun xjik'baj c'u'j ex mlayx chin tene tuj txubtxaj. 8Mi a'l jun c'oquel que'yinte nwitze porque chin najele oc toc tk'o'na twitza wi'je; c'oquel tk'o'na twitza wi'je ex chin najeltzune. 9Ic tza'n muj in bet ex in cub naj, icxtzun ju xjal in xi' tuj mukbil; mlayx tz'ajtz meltz'aj juntl maj, 10mlay tzul juntl maj tuj tja jatum otok ten. 11Cyja'tzun mlay txi ncoline tu'n nyoline. Tuc'il ta'w ex tuc'il nim nbise ctzyetel nyoline ti'j ju nnic'x wu'ne. 12¿Baka ic kine ic tza'n jun nintz txcup at tuj mar, tu'nju nno'c tk'o'na jun xk'ukil weye? 13Ka ma nmaye: Ckebel nc'u'je oc ncub coẍeye ex kape c'elel nbise oc nxi'ye tal, ka nchiye, 14pero in chin oc t-xobtza'na cyu'n witzic', ex in chin oc t-sec'pu'na oc in chin cub t-xk'umsina. 15Maslo ba'n tu'n tcub tjatz'o'na nkule, mas ba'n tuj nwitze tu'n ncyime twitzju tu'n wank'ine. 16Mlay tzic'x mastl wu'ne. Mi wajtle tu'n wank'ine. Chin tk'oncja; aju nchwinklale ic tten ic tza'n jun xjik'baj c'u'j. 17¿Ti t-xilen ju xjal tu'nju ma' t-xilen tuj twitza? ¿Tiku'n nimxix in ximana ti'j? 18¿Tiku'n nno'c t-xk'ukina tcyakil k'ij ex coc'x nno'c tuj malbil tu'na? 19¿Tiku'n minti' nne'l ti'n twitza wi'je, ex minti' in chin cyaj tk'o'na jun rat tuj txubtxaj? 20Ka ma nbinchaye il, ¿titzun mya ba'n in nbincha'ne ti'ja tu'n jlu, aya xk'ukil cye xjal? ¿Tiku'n ma chin oc tk'o'na ic tza'n jun aj k'oj tu'n toc tzokpaja wi'je? Baka in chin labte ti'ja. 21¿Tiku'n minti' in cub tnajsa'na wile? ¿Tiku'n minti' in cub tnajsa'na aju mya ba'n o nbinchaye? Porque ch'ix ncyime; oc cjyola wi'je, ex mi a'ltl kine.

will be added

X\