JOB 6

1Tzyettzun tyolin Job ex tma: 2Nokwit tz'ocx malo'n tuj jun balans tcyakilju nbise ex ju mya ba'n ma tzaj wi'je, 3maslo alxix twitz arena at ttzi mar. Cyja'tzun cyuw ma chin yoline. 4Ate Kman aju at tipumal tu'n tbant tcyakil tu'n, ma che oc t-xo'n ke tplech wi'je, ex aju venen toc cywi' ma txi bet tuj nximlale. Ma tzaj nimxix nxobile toclen tzokpaj Dios wi'je. 5¿Baka in k'ajt ttxa'n jun bur ka at cha'x c'ul te twa? ¿Ex baka in muyin jun wacẍ ka at twa? 6¿Atpe jun xjal in xi tchyo'n jun ti'xti ka minti' atz'an ti'j? ¿Atpe tc'oc'jal t-sakal jos tjunal? 7Porque aju minti'tok waje tu'n t-xi nwa'ne nej, atzunju in xi' wu'ne ja'lo. 8Cuchiwt tzaj tk'o'n Dios aju cxel nkanine te; cuchiwt tu'n tjapun tu'n aju wajbile. 9Cuchiwt cub t-ximan Dios tu'n nnaje tu'n te jumajx. 10Masque lu kine in chin c'ixbiye tu'n ta'w, in chin tzalaje, ex k'ukl nc'u'je tu'nju minti' ma cub wewane tley ju Dios Xjan. 11Minti'tl wipune tu'n tic'x ta'w wu'ne, ¿ti gan cucx tu'n wank'ine? 12Mya ic wipumale ic tza'n jun pic, ex mya ic tza'n k'an c'uxbil. 13Mlay bant ncwentin wibe wu'nx wibe, ex mi a'l jun onil weye. 14Jun xjal at tuj yajbil at tc'u'j tamiw ti'j, masque mya tz'aklxix twitz Kman aju at tipumal tu'n tbant tcyakil tu'n. 15Atzun cyeye, akeye wamiwoye, minti' ma cybinchaye jlu weye, ic cytene ic tza'n a' in tzkij tuj tk'ab xak. 16Ic cytene ic tza'n a' mya sak twitz, smo'n tuc'il ttxa che'w; 17pero in cub naj ttxa che'w ex in tzkij a' tuj tk'ab xak, ex oc ttzaj ta'w cyak bi'x in cub naj a'. 18Tu'n jlu ke xjal in che bet in che el tzpet ti'j cybe tu'n tlaj a', ex cyja' in che'x tuj be tuj tzkij tx'otx', ex atzun in che cyim. 19Ke xjal aj Temán ex aj Sabá in ke' cyc'u'j cyi'j ke tk'ab xak lu oc in che'x tuj jun cybe, 20pero oc in che pon ttzi tk'ab xak lu, minti' in cnet a' cyu'n, in tzajtzun cybis ex bi'x in naj cynabl. 21Ictzun cytene wuc'ile: Nno'c cyque'yine nimxix mya ba'n ma tzaj wi'je ex in tzaj t-xobil cyi'je. 22Pero minti' jun ti'xti in xi nkanine cyeye, ex minti' in chin kanine pwak cyeye tu'n nclete, 23ex minti' in chin kanine tu'n nclete cyu'ne twitz jun aj k'oj, ex mi tu'n ncolpete cyu'ne tuj cyk'ab ke xjal mya ba'n. 24Cyk'ontze jun xnak'tzbil weye, jacu chin cub txule'ye bilte; cyk'mantze alcye npaltile ma nbinchaye. 25Mi a'l jun jacu tz'el ic'unte jun xnak'tzbil ka tuj tumelxix; ex atzun cyeye ma che yoline mya tuj tumel wi'je. 26Cyeye nok in che xo'ne yol wi'je, ex aju nyole tzcaj nne'la te cyeye ex minti' tajben tuj cywitze. 27Jacu bant cyu'ne tu'n tjaw cyi'ne swert ti'j jun c'wa'l minti' tman ex ttxu' tu'n toc te cymajene, ax icx jacu txi cyc'ayine jun cyamiwoye. 28Cyque'yintze tuj nwitze ex cymantze weye ka in chin nic'ane yol. 29Cycolinxe aju yol ma cymaye wi'je, mi'n che oque mya tz'aklxix; tz'elx cynic'e ti'j, in chin yoline tuj tumel. 30¿Nic'al yolpetzun kine tuj cywitze? ¿Minti'petzun nne'l nnic'e ti'j aju in xi nma'ne?

will be added

X\