JOB 41

1Yajtzunju nintz txcup Leviatán tbi, ¿jacupe jatz tu'na tu'n answel? ¿Jacupe c'alet tak' tu'na tu'n jun cy'jaj? 2¿Jacupe tz'ex tk'o'na jun cy'jaj tuj ttxa'n ex ka tu'n tjaw tjac'u'na tjak' ttzi' tu'n jun answel? 3¿Jacupetzun cubsan twitza tu'n ttzaj tz'e'y tc'u'ja ti'j ex cheba tu'n ttzaj tma'n teya? 4¿Baka jacu bant tu'na tu'n ttzaj ttziyan teya tu'n toc te tmajena te jumajx? 5¿Jacupe tz'oc tena sakchal tuc'il ic tza'n tuc'il jun chyu'j? ¿Jacupe c'alet tu'na tu'n toc te cychak ke tal tme'jela? 6¿Jacupe che lijensin ke tzyul cyiẍ ti'j? ¿Jacupe cub cykesin tu'n t-xi cyc'ayin? 7¿Jacupe txi' tz'upl tplecha tuj ttz'umal ex jacupe txi' tz'upl tlansa tuj twi'? 8Nokpe ka ma pon tk'o'na tk'aba tibaj, jurat c'oquel tzokpaj ti'ja; mlay tzic' tna'l tu'na ex mlay tbinchaya juntl maj. 9Nok o'cx ka ma tz'oc que'yin aju nintz txcup Leviatán tu'n jun xjal, jurat naj jacu cub numj xjal tu'n t-xobil. 10Ka at jun ma tz'ocx ic'len te, in tzaj naj tk'oj ex mi a'l jun jacu tnimari tib tuc'il. 11¿Alcye jun xjal jacu clet ex mi'n tza'w ka ma tz'oc tzokpaj ti'j? Mi jun tuj enter twitz tx'otx'. 12Mlay tz'el ti'j tu'n nyoline ti'j t-ximlal tbanilxix que'yin ex ti'j tipumal nimxix. 13¿Alcye jun jacu tz'el k'inte ttz'umal toc ti'j ex ka tu'n t-xoptz'aj ttz'umal aju in ajben te tcolbil tib? 14¿Alcye jun jacu tz'el jachinte tuj ttzi' tu'n cylaj ke twitz te' txolin cyel ex xobajilxix che que'yin? 15Aju ttzal ti'j mer ic tza'n makbil txolin cyel ti'j ex cyuw ke wen ic tza'n abj, 16tlatz'in tib jun ti'j juntl; mi ju cyk'ik' mlay tz'ocx tuj; 17cymojban cyib ex cyk'e'tin cyib wen, mi a'l jun jacu tz'el pa'nte cye. 18Oc in tzaj k'ajt tuj ttxa'n, mer ic tza'n tkan k'ancyok, ex ke tbak' twitz in che koptz'aj wen ic tza'n k'ij oc tjawil te prim. 19Mer ic tza'n tkan k'ak' nne'tz tuj ttzi', ex in che etz c'ech tuj. 20Nne'tz sib tuj ttxa'n, mer ic tza'n jun c'il a' in lokin tibaj k'ak'. 21Bi'x in c'ant xk'a'l tu'n t-xew ex nne'tz tkan k'ak' tuj ttzi'. 22Aju tkul puro cyuw wen, ex cycyakil xjal in tzaj cyxobil twitz ju txcup lu. 23Ax icxpe tchibjal cyuw wen, mer ic tza'n c'uxbil. 24Puro cyuw tanmi, mer ic tza'n jun abj ex ic tza'n jun cya'. 25Oc tjaw we' txcup lu, bi'x in che tzaj xob keju at nimxix cyipun ex in che el ok in che xob wen. 26Oc tak'pon tzokpi'n spad ti'j, ex ka lans ex ka plech ex ka lans ch'in tkan, minti' ch'in cyilwi. 27Mer ic tza'n ch'im nne'l c'uxbil tuj twitz, ex mer ic tza'n k'u'chin tze' nne'l k'an c'uxbil tuj twitz. 28Oc t-xi xo't plech ti'j mlay tz'el ok; oc t-xi xo't abj ti'j, mer ic tza'n ch'im in xi xo'n ti'j nne'l tna'n. 29Oc tak'pon tzokpi'n jun garrot ma' tc'itz ti'j, mer ic tza'n jun ajlaj nne'l tuj twitz ex in jaw tze'n ti'j tk'ajk'ajel lans ch'in tkan oc t-xi xo't ti'j. 30Oc t-xi tjakun tib twitz tx'otx', bi'x in xi julix tuj tx'otx', mer ic tza'n texlen ttzi punt. 31Bi'x in jaw pulin nintz mar ma' t-xe' tu'n, mer ic tza'n jun c'il in pulin a' tuj tibaj k'ak', ex cyja'tl nno'c tu'n ic tza'n jun c'il tcubil perjum in pulin tibaj k'ak'. 32Oc in bet tuj a' bi'x in cyaj tic'len puro sak, in koptz'aj ic tza'n ttzmal wibaj puro sak wen. 33Tuj enter twitz tx'otx' misicyer jun nch'isbene in pon ic tza'n te, minti' ch'in in xob. 34Oc in che'x tque'yin cycyakil txkantl txcup jawni ke, minti' nne'l xob cyi'j, porque a rey cye, chi Dios baj tma'n te Job.

will be added

X\