1 Xi tma'ntl Kman te Job cyja': 2 Atzun teya, taja tu'n woque tuj xjel tu'na, akine aju at wipumale tu'n tbant tcyakil wu'ne, ex ¿cucxpe c'oquel tzokpaja wi'je tu'n tyola? 3 Xitzun ttzak'we'n Job te Kman: ¿Ti ba'n t-xi nma'ne? Ic tza'n weye, baka ma' nxilene. Mas ba'n tu'n mi nk'ajte. 5 O chin yolinxe ex minti' mastl yol tu'n t-xi nma'ne. 6 Tzajtzun yolin Kman juntl maj tuc'il Job tuj txkan cyk'ik' jbal ex tma: 7 Yec'untz tipumala weye ja'lo ex tzak'wentza ke nxjele lu: 8 ¿Tajpeya tu'n ttzaj tma'na ka mya tz'aklxix kine ex ka at wile, atzun teya tu'n toc tk'on tiba te tz'aklxix? 9 ¿Maspetzun nim tipumala nwitze? ¿Jacupe k'ajt k'ancyok tu'na ic tza'n in k'ajt wu'ne? 10 Ka ax toc tu'na at tipumala ic tza'n weye, k'o'nc toclena te ma'xix, k'o'nc tajwalila ex k'o'nc t-spic'umala, tu'ntzun tjaw nimsa'na wen. 11 Que'yinxa keju in jaw cyniman cyib, tzajx nim ttx'u'jila cyi'j ex che tmansin cuba ke. 12 Ax toc ba'n tu'n cynaj tu'na oc t-xi tque'yina cyi'j, che betz'an baja ke binchal mya ba'n nok jatum ate'. 13 Che tmakun cu'xa cycyakil tuj tx'otx' ex lamo'n ocxa ke tuj presbil cye cyimni. 14 Katzun ma bant tcyakil jlu tu'na, atzun c'elel nnic'e ti'j ka tu'nx tipumala jacu bant tclonte tiba. 15 Ximana ti'j nintz txcup Behemot tbi, aju nch'isbene ic tza'n aya. Ba'n wa'n c'ul ic tza'n wacẍ. 16 Puro cyuw tchibjal toc ttzal ti'j ex ju tchibjal toc tjak' tc'u'j at nim tipun. 17 Puro cyuw tje', mer ic tza'n tze' wi'ten, ex ke tbotx'il tcux, mojmoj cyten. 18 Ke tbakil mer ic tza'n jun tubo k'an c'uxbil ttx'otx'il, ex mer ic tza'n barret. 19 Atzun wak'unbene jlu mas ma' toclen; o'cx wu'ne jacu cub ti'j, porque akine in binchante te. 20 Ke witz jatum in che sakchan ke txcup in tzaj cypok'sa'n c'ul te twa. 21 Nno'cx bune' tjak' t-xlecumal tze' ex nno'cx tewan tib tjak' tkan ajlaj tuj soban. 22 Ke tze' in cyk'o'n xlecun tibaj ex atzun nno'cx ten cyjak' ke chjaj ate' ttzi tk'ab xak. 23 Ka ma ch'iy nima minti' in xob, masque japun a' tjak' ttzi', pero minti' in tzaj baj tc'u'j. 24 ¿Alcye jun jacu tzaj tzyunte te tu'n tjatz ti'n ke tbak' twitz ex ka tu'n tex tk'o'n jun sakbak tuj ttxa'n?
