JOB 4

1Tzyettzun tyolin Elifaz aju aj Temán ex tma: 2Ax toc Job, myalo ba'n tuj twitza ka at jun ma yolin tuc'ila, pero mlay bant tu'n mi nyoline tuc'ila. 3Nimcu xjal ma txi tk'o'na xnak'tzbil cye ex oc cyipun nimcu tu'na, akeju otok che cub numj. 4Nimcu xjal otok che jaw tolj xi tma'na cye tu'n mi tbaj cyc'u'j nok o'cx tu'n cyjaw we', ex e tzyet naj tu'na akeju cyja'tok cycub tz'ak. 5Atzun ja'lo tej saj yajbil ti'ja, ma tzaj baj tc'u'ja ex minti'tl tipuna. 6Ic tza'n teya, aya jun xjal ajbel te Dios tz'aklxixa ex mi jun tpaltila, ¿tiku'n minti' in ke' tc'u'ja ti'j Dios? 7Ximanxa ti'j ka na'n tu'na: ¿Atpe jun xjal minti' til o tzaj yajbil ti'j? 8O wile ex o tz'el nnic'e ti'j, ke xjal in cybincha'n mya ba'n ex in che yajlan cyi'j ke cyuc'il, axtzun jlu in tzaj cyi'j. 9Oc in tzaj tk'oj Dios cyi'j ex oc in xi t-xupin cyi'j, bi'x in che naj te jumajx. 10Masque in che tzanun ic tza'n ke balun, bi'x in che k'ajen oc tetz buchun twitz cye' tu'n Dios. 11Che cymel ic tza'n ke balun minti' in cnet cycanb, ex ke cyal cytxu balun bi'x che bajel sputj. 12At jun yol pon wuc'ile, pen o nbiye porque nok tuj jasan tzaj k'ma'n. 13Te konic'an pon jlu wuc'ile, otok che tan xjal; at jun nwitzic'e oc, bi'x tzaj nbise tu'n. 14Tzaj nim t-xobil wi'je, ex tcyakil nximlale tzaj lu'lun. 15Ic' juban ch'in cyk'ik' nwitze, bi'x tzaj salin wi'je. 16Lu jun o wile wa'l tcub, pero minti' el nnic'e ti'j tijil. Minti' jun in k'ajt, pero te tibajxi o nbiye jun tk'ajk'ajel chi cyja': 17¿Jacupe tz'oc xjal tz'aklxix ic tza'n te Dios? ¿Maspelo sak tuj tanmi xjal ic tza'n te Dios aju binchante te? 18Minti'lpe in ke' tc'u'j Dios cyi'j ke tmajen ate' tuj cya'j; in cnetpe cypaltil ke anjel tu'n Dios, 19pyortzun te xjal, baka at tipun, ic tten ic tza'n jun ja tx'otx' binchamaj tibaj kuk, ex ic tten ic tza'n jun pu't in cub puch'l. 20Ate xjal ba'n ta' te prim, ya te kale otok naj; bi'x cymel te jumajx ex mi a'l jun c'oquel tcwent ti'j. 21Ic tten tank'ibl xjal ic tza'n jun nok' in cub lakj; in cyim xjal na'nxtok toc tnabl, chitzun ju yol nbiye.

will be added

X\