JOB 38

1Tzajtzun yolin Dios tuj cyk'ik' jbal ex tma: 2¿Alcyetzuna tu'nju in tma'na ka mya tuj tumel aju in cub nximane ex aju in bant wu'ne? Ma tmaya ke yol minti' cynabl. 3Bincham ttena ka ax toc tu'na, ex tzak'wentza ke nxjele lu: 4¿Jatum ta'toka tej tcub nk'o'ne t-simyentil tx'otx'? K'mantza weye ka ba'n tu'na. 5¿Ba'npe tu'na alcye cub ximante nic'pun tu'n toc, ex alcyeju ak'nal at nim tnabl binchante te? 6¿Titzun tcub tjak' tk'ukbil ex alcyetzun cub k'onte nintz abj te tzuybil te, 7tej in che bitzantok cycyakil ke che'w t-xe cya'j junx cyuc'il cycyakil ke anjel in che tzalaj tuj cya'j? 8Tej tjatz tilj mar tuj tx'otx', ¿alcye oc k'onte tlamel tu'n twe'? 9Xi nk'o'ne muj te txaybil te mar ex k'ek muj tu'n tbaj bok'it tuj. 10Cub nk'o'ne jun techal jatum tu'n twe' mar ex bi'x oc nk'o'ne tal tlamel. 11Ex xi nma'ne te: Atzun tzul we'ya tzalu ex o'cxtzun tzul we'ya, mlay tzic'a tibaj ex atzun cpol baj pulin tipumala. 12¿Tuj tank'ibla ope txi tma'na jun maj tu'n ttzaj spic'e' t-xe cya'j ex tu'n tjawil k'ij, 13tu'ntzun tpon baj spic'un tuj tcyakil twitz tx'otx' ex tu'ntzun tbaj tchto'na ke binchal mya ba'n? 14K'ancha'lintzun tilbilal twitz tx'otx' ic tza'n oc nno'c tc'a' jun xbalun. 15In cub t-xc'ayin Dios spic'un cye ke binchal mya ba'n ex atzun in pon baj twi'ylal tu'n cybinchante mya ba'n. 16¿Ope txi aja que'yilte max t-xe' nintz mar jatum in jatz jlet twi a'? 17¿Ope tzaj yec'un teya aju tpwertil cynajbil cyimni kloljxix wen? 18¿Ba'npe tu'na nic'pun twitz tx'otx'? K'mantza weye ka ax toc ba'n tcyakil jlu tu'na. 19¿Jatum c'u'n spic'un ex klolj? 20¿Tzinpe in bant tu'na tu'n cyxi t-sama'na max t-xe cya'j ex tu'n cyajtz meltz'aj tu'n cyul tuj cyja? 21Ba'nlo tu'na porque baka ne'xi tabk'iyila; otoklo itz'ja tej cybant jlu. 22¿Ope txi aja que'yilte jatum c'u'n ttxa che'w wu'ne ex sakbakun, 23tu'ntzun cytzaj nsama'ne tuj tk'ijlalil yajbil ex tk'ijlalil oc toc k'oj? 24¿Alcye be in xi ti'n tkan k'ancyok oc tcub koptz'aj? ¿Alcye tumlal in baj t-sipan tib cyk'ik' twitz tx'otx', aju in tzaj tuj tjawitz k'ij? 25¿Alcye in jakonte tbe jbal tu'n ttzaj nim? ¿Alcye in yec'unte tbe tkan k'ancyok ex cyk'ik' jbal, 26tu'ntzun ttzaj jbal tuj tzkij tx'otx' jatum minti' xjal najl tuj, 27ex tu'n ta'lin ti'j tzkij tx'otx', tu'ntzun ttzaj tpok'sa'n cha'x c'ul? 28¿Atpe tman jbal ex atpe tman tk'ab che'w? 29¿Alcye ttxu' tk'ab che'w ex alcye ttxu' nintz yelo? 30¿Al u'n nno'c a' cyuw wen ic tza'n abj, ex nno'c tibaj nintz mar cyuw wen tu'n? 31¿Jacupe bant tu'na tu'n cyoc tc'alo'na jun c'loj che'w Pléyades cybi tu'n cyten junx? ¿Jacupe bant tu'na tu'n cyel tpju'na juntl c'loj che'w, Orión cybi, tu'n tel cypa'n cyib? 32¿Apeya nne'tz k'inte ju che'w jakol t-xe cya'j oc tpon or tu'n tjawil? ¿Apeya ẍaklul cye jun c'loj che'w Osa Mayor cybi ex juntl c'loj Osa Menor cybi? 33¿Lo'npe tu'na aju ley tcub cyibaj ke che'w twitz cya'j? ¿Apeya in k'onte ju ley lu twitz tx'otx'? 34¿Jacupe txi tma'na te muj tu'n ttzaj nim jbal tibaja tu'n? 35Ka ma txi tma'na te tkan k'ancyok tu'n t-xi' tuj juntl part, ¿jacupe tzaj ttzak'we'n teya cyja': Lu kine lu, alcye taja tu'n tbant wu'ne, chipe? 36¿Alcye xi k'onte nabl tuj tanmi xjal? Alcye xi k'onte tojtzkibl? 37¿Alcye jun at nimxix tnabl tu'n tel tnic' ti'j nic'pun muj at? ¿Alcye jun jacu tz'etz k'inte jbal tuj muj tu'ntzun ttzaj tk'o'n jbal, 38tu'n toc tkukil tx'otx' te xok'l ex tu'n cyoc k'e't ke k'ubin jun ti'j juntl? 39¿Apeya in tzaj jyonte cycanb ke ttxu balun tu'n cychyo'n ke tal ti'j ocxi cynoj, 40oc in xi cyewan cyib tuj cyjul ex oc in che cub ten xk'ukil tjak' chc'ul? 41¿Alcye in k'onte cywa joj oc in che jyon ke cyal ti'j cywa ex in che k'ajt wen oc in che kanin cywa weye?

will be added

X\