JOB 37

1Oc t-xi nbi'ne cyk'ik' jbal in jaw putin wanmiye ex mer ic tza'n ch'ixmi in jatz ok. 2Cybinxe tk'ajk'ajel twi Dios nne'tz tuj ttzi'; in jululun ic tza'n k'ancyok. 3In xi tkoptz'i'n Dios xle'laj cya'j tuj tcyakil twitz cya'j, in tzaj tuj jun pac' ttxa'n tx'otx' tu'n tpon tuj juntl pac'. 4Jurat in binjtz tk'ajk'ajel twi Dios, jun tk'ajk'ajel twi' ma'xix toclen; ex oc tbinjtz tk'ajk'ajel k'ancyok, cucx in che tzaj koptz'aj tkan k'ancyok. 5Oc tk'ajt tk'ajk'ajel twi Dios, nimcu tbinchben ma'xix cyxilen in che bant tu'n, ex in tbincha'n tbinchben ma'xix t-xilen mlay tz'el knic' ti'j. 6In tma'n Dios tu'n tcub ttxa che'w tibaj tx'otx' ex tu'nxte in tzaj nintz jbal. 7Ex tu'n jbal in che cyaj ten xjal tuj cyja, tu'ntzun tel cynic' ti'j ka tu'n Dios jlu. 8Ke txcup in che ocx tuj cyjul ex atzun in xi cyewan cyib. 9Tuj tnayaj k'ij in tzaj cyk'ik' jbal ex tuj tbank'ab k'ij in tzaj ta'w che'w. 10Tu'nju t-xew Dios in tzaj t-xupin, nno'c a' tu'n, te ttxa che'w ex ke a' ma'xix in che tuxix tu'n. 11Tu'n Dios at a' tuj muj ex nne'tz tkan k'ancyok tuj muj tu'n. 12Tuj tcyakil twitz tx'otx' in lemtz'aj tkan k'ancyok twitz cya'j, tu'n tjapun tu'n alcyeju in tma'n Dios. 13Tcyakil jlu in ajben tu'n Dios tu'n ttzaj cycastiw xjal ex ka tu'n t-xi tyec'un t-xtalbil cye. 14Chin tbintza Job, ximana ti'j tcyakil aju ma' t-xilen in bant tu'n Dios. 15¿Ba'npe tu'na tza'n tten in cawin Dios ti'j tcyakil jlu, ex tza'n tten in koptz'aj tkan k'ancyok tuj muj? 16¿Ba'npe tu'na tza'n tten ikan muj tu'n cyk'ik'? A jlu jun techal ti'j tnabl Dios tz'aklxix. 17¿Ba'npe tu'na tza'n tten in mek't t-ximlala tuj t-xbaluna oc in xupin cyk'ik' aju in tzaj tuj tnayaj k'ij? 18¿Jacupe bant tu'n tonina ti'j Dios tu'n t-xi cylic'pu'na cya'j, ex tu'n tcyaj ten minti' in yucch ic tza'n jun espej c'uxbil? 19Ko t-xnak'tzantza alcye ba'n t-xi kma'ne te Dios, porque tuj klolj ato'ye ex minti' ba'n ku'ne. 20Weye mlay nnimari wibe tu'n nyoline tuc'il Dios, porque a jlu jacu tz'ajben te xitbil weye. 21Mlay kil t-spic'umal k'ij oc nno'c klolj twitz tu'n muj, katzun ma tz'el xupin muj tu'n cyk'ik', atzunte cya'j in cyaj k'ancha'l. 22Mer ic tza'n t-spic'umal k'an pwak in yec'unjtz tuj tbank'ab k'ij oc tbaj txolin ti'j Dios tu'nju nimxix tajwalil. 23Mlay ko canun ti'j alcye t-ximbetz Dios aju at tipumal tu'n tbant tcyakil tu'n, porque ate cyuwxix ex tuj tjikumal ti'j in bant tu'n nok alcye taj. Tz'aklxix te Dios ex minti' in che baj tyajla'n ke xjal nok cucx. 24Cyja'tzun in che xob xjal twitz Dios; misicyer cyxilen ke xjal at cynabl tuj twitz.

will be added

X\