JOB 36

1Cucx oc ten Eliú yolil ex tma: 2Ten ch'intl tpasensa ex cxel nxnak'tza'ne, porque atx mastl yol tu'n t-xi nma'ne tu'n ncoline ti'j Dios. 3C'ajbel wu'ne aju wojtzkible nimxix, tu'ntzun t-xi nma'ne ka ax toc aju in tma'n aju Binchal weye. 4Cxel ncyuwsa'ne teya; mlay txi nma'ne jun nic'aj yol; lu kine wa'l twitza, akine jun xjal at nimxix nnable. 5Ate Dios at nimxix tipumal ex at nimxix tnabl, ex minti' nne'l tic'un aju xjal minti' til. 6Mlay cyaj ank'in ju xjal mya ba'n tu'n, pero in xi tbincha'n cyi'j ke meba xjal; 7cucx in colin cyi'j ke xjal tz'aklxix ex in che oc tk'o'n te cawil junx cyuc'il ke rey, ex nno'c tk'o'n ma'xix cyoclen. 8Pero ka c'alo'n ke tu'n caden, ex ka in che c'ixbisanjtz tu'n ta'w, 9in xi tma'n Dios cye alcye il otok cybincha ex tza'n tten otok jaw cyniman cyib. 10In yolin Dios cyuc'il tu'n tjikumanjtz ti'j cynabl ex in xi tma'n cye tu'n tcyaj cyk'o'n ju mya ba'n. 11Ka ma txi cyniman ex ka ma tz'ocx cyk'on cyib tjak' tcawbil, che tzalajel ex oc che tel tuj txubtxaj tuj ch'intl cyank'ibl atx. 12Pero ka minti' ma txi cyniman, che cymel ex minti'x otok tz'el cynic' ti'j. 13In tzaj nimxix cyk'oj aj il; masque presin ke, pero minti' in che kanin onbil. 14Cu'xunx ke oc cycyim ex aju bajsbil te cychwinklal ch'ixbajilxix. 15Aju xjal in c'ixbisanjtz, in clet tu'n Dios tuj c'ixbisabl; ex tu'nju ta'w in tzaj, nne'l tnic' ti'j Dios. 16Ax icx teya oc cletela tu'n Dios cyuj ke xobajil, ctzajel tk'o'n nimxix teya, ctzokpetela tu'n, ex cbajel noj twi tmesa tu'n cyu'n ke chibj tbanilxix. 17Atzun ja'lo tibaja ma japun baj t-sentens ju xjal mya ba'n, ex mlay mayet tu'na ka ma tz'oca tuj xjel ti'j ex ka ma cub t-sentensa. 18Cwentim tiba tu'n mi'n ttzaj tc'mo'na cotzbaj mya tuj tumel ex tu'n mi'n t-xi tk'on tiba tu'n tbinchanteya jun mya ba'n nok tu'n tlaj nim pwak. 19Oc ttzaj bis ti'ja, mlay tz'ajben tk'inumabla ex tipumala te onbil teya. 20Mi'n txi tachina tu'n ttzaj konic'an oc in che cub naj ke xjal tuj tnam. 21K'onca cwent ti'j tu'n mi'n taj meltz'aja binchal mya ba'n, porque tu'n jlu ma tzaj c'ixc'oj ti'ja. 22K'onc tcwenta ti'j tipumal Dios. Mi jun xnak'tzal in pon ic tza'n te Dios; 23mi a'l jun jacu k'mante te Dios alcye cbantel tu'n, ex mi a'l jun jacu tz'oc k'mante te ka mya tuj tumel aju otok tbincha. 24Cycyakil xjal in jaw cynimsa'n aju tak'unben Dios; ax icx teya tzulx tc'u'ja ti'j tu'n tjaw tnimsa'na. 25Cycyakil xjal jacu tz'oc cyque'yin, masque najchak tzaj cyque'yin. 26Ma'xix toclen Dios ex mlay tz'el knic' ti'j; ax icx mlay bant kajlan ti'j tabk'iyil. 27Tu'n Dios in tzaj tchmo'n junjun tz'uj a' tuj jun tcubil, ex jurat nno'c tu'n te jbal. 28Nne'tz chitj jbal tuj muj ex in cub tilj twitz tx'otx'. 29¿Alcye jun nne'l tnic' ti'j tza'n tten in bet muj ex tza'n tten in k'ajt k'ancyok twitz cya'j? 30Tu'n Dios in tzaj koptz'aj xle'laj cya'j tibaj mar, atzun t-xe'pun mar bi'x in cyaj klolj tcyakil. 31Ictzun tten in cawin Dios cyibaj cycyakil xjal ex in tk'o'n nimxix cywa. 32Tuj tk'ab Dios ta' k'ancyok ex in pon ti'j jun ti'xti jatum taj Dios tu'n tpon. 33Aju tk'ajk'ajel k'ancyok in tk'o'n tkanil ka at tulel cyk'ik' jbal, ex tu'nju tk'oj Dios in tzaj cyk'ik' jbal.

will be added

X\