JOB 35

1Tzyet tyolin Eliú juntl maj ex tma: 2¿Maj ba'n tuj twitza Job, tu'nju in tma'na ka minti' tila twitz Dios? 3Porque o txi tma'na te Dios cyja': ¿Ti tajben weye tu'nju minti' ma nbinchaye il? Chitzuna. 4Akine chin xel tzak'wente teya ex cye ke tamiwoya. 5Que'yinxa twitz cya'j ex que'yinxa, baka nika' tjax muj tibaja. 6Ka ma binchana il, minti' jacu baj ti'j Dios tu'n; masque nimxix il ma bant tu'na, minti' jun mya ba'n jacu tbinchaya ti'j. 7Ex ka ba'n in tbincha'na, minti' jun in xi tk'o'na te tu'n jlu, minti' jun ba'n in tbincha'na te. 8Aju tila in tbincha'n mya ba'n ti'j jun xjal ic tza'nx aya, ex aju tbinchbena ba'n in tbincha'n ba'n ti'j jun xjal ic tza'nx aya. 9Tu'n ta'w yajbil in che sch'in ke xjal, ex in che jyon ti'j alcye jun tu'n tclonte cye tuj cyk'ab keju at nimxix cyipun; 10pero minti' in che jyon ti'j Dios aju binchante cye, aju in tzaj k'onte tzalajbil oc ttzaj xobajil, 11aju in tzaj k'onte mas nim knabl twitz cye txcup ex ke chyu'j in che lipan twitz cya'j. 12In che sch'in, pero minti' in che tzaj tzak'we'n tu'n Dios, porque mya ba'n ke ex in jaw cyniman cyib. 13Ate Dios aju at tipumal tu'n tbant tcyakil tu'n minti' in tzaj tbi'n cyyol keju mya ax toc che yolin. 14Masque in tma'na ka minti' in tila twitz Dios, pero ayona ti'j, porque in tque'yin Dios aju in baj ti'ja. 15In tma'na ka minti' in tzaj tk'oj Dios ex mlay tzaj tk'o'n castiw ex minti'xix nno'c tk'o'n cwent ti'j il. 16Cyja'tzun aya Job in tma'na ke yol minti' cytxolil, nimxix in yolina ex minti' ch'in tojtzkibla.

will be added

X\