1 Cucx o yolin Eliú ex tma: 2 Akeye at cynable ex xnak'tzamni keye, cybintze ke nyole. 3 Aju ẍcyinbaj ba'n tu'n alcye t-xilen junjun yol, ic tza'n kc'o'n in tna'n ke tc'oc'jal. 4 Icxtzun tten jlu, ba'n tu'n kximan ti'j alcye yol tz'aklxix ex ba'n tu'n tcub kximan ti'j alcye ba'n tuj kwitz. 5 Chi Job in tcyuwsa'n cyja': Minti' wile, pero tc'i' Dios txi tbincha'n wi'je. 6 Ka ma txi nma'ne at wile, chin nic'ale yol; aju ẍil toc wi'je minti' in bant masque minti' o chin binchane il, chitzun. 7 Mi a'l juntl ic tza'n te Job. Nim in xmayin ti'j Dios; 8 at tgan tu'n toc tjunin tib cyuc'il ke xjal binchal mya ba'n ex tu'n tbet cyuc'il ke xjal mya ba'n ke. 9 In tma'n: Minti' ch'in in tcamba'n ju xjal nno'c tilil tu'n tu'n ttzalaj Dios ti'j. 10 Cyja'tzun, akeye xjal at cynable chin cybintze. Ate Dios aju at tipumal tu'n tbant tcyakil tu'n minti' in tbincha'n jun mya ba'n ex ka aju mya tz'aklxix. 11 In tk'o'n Dios chojbil te teyle junjun xjal ic tza'nx cybinchben; in cub tk'o'n cycastiw xjal ic tza'nx cybinchben. 12 Ax toc ate Dios aju at tipumal tu'n tbant tcyakil tu'n minti' in tbincha'n jun mya ba'n, ex minti' in tbincha'n aju mya tz'aklxix. 13 Mi a'l jun o tz'oc k'onte toclen tu'n tcawin tibaj tcyakil twitz tx'otx'. 14 Ka ma tz'el ti'n cyxew ke xjal, aju in k'onte cychwinklal, 15 cycyakil-lo che cymel ex che oquel juntl maj te kuk. 16 Ka at tnabla chin tbintza; k'o'nc twi'ya ti'j nyole. 17 Nokwit nne'l tic'un Dios aju tz'aklxix, mlaywitlo bant tcawin. ¿Tza'ntzun tten in tma'na ka mya ba'n aju in tbincha'n Dios? 18 ¿Nno'cpe tma'n tibaj cywitz ke rey ex ke xjal ma'xix cyoclen: Ploj cymodiye, mya ba'n keye? 19 Minti' nno'c tque'yin aju cyxilen ke cawil, minti' in che tzaj t-xtalin mas ke k'inun cywitz ke meba, porque tu'n Dios e cub bincha'n cycyakil. 20 Jurat naj in che cyim xjal tuj tmij ak'bil, in che jaw tilj xjal ex in che cub naj; keju at nim cyipun in che naj, pero mya tu'n xjal in che cyim. 21 Toc twitz Dios ti'j tza'n in che bet xjal ex toc twitz ti'j jatum in che bet. 22 Minti' jun klolj kxopinxix jatum jacu txi tewan tib jun xjal binchal mya ba'n. 23 Mya il ti'j tu'n t-xi tma'n Dios cye xjal jtoj tu'n cypon xtisil twitz. 24 Oc nne'l ti'n Dios cyoclen ke xjal ma' cyoclen, mya il ti'j tu'n tbaj t-xjelin alcye cybinchben, ex in xi tk'o'n cyoclen ke jlu cye txkantl. 25 Porque ba'n tu'n Dios aju in cybincha'n; octzun toc konic'an in che naj tu'n. 26 Tuj lugar jatum ba'n tu'n cyque'yin cycyakil ti'j in che baj tasyalin, ic tza'n in che baj asyalin ke xjal mya ba'n ke, 27 porque el cypa'n cyib ti'j ex minti' o cyajbe tu'n t-xi cyniman ke yol tu'n cybet tuj tumel. 28 E baj cyyajla'n ke xjal meba, atzun ke meba e oc ten na'l Dios ex o che tzaj bi'n tu'n Dios. 29 Pero ka minti' in tzaj ttzak'we'n Dios, ¿alcyetzun jacu k'mante ka mya ba'n in tbincha'n, ka minti' ma tzaj tk'o'n twi' ti'j cyyol xjal? Toc twitz cyi'j ke tnam ex cyi'j ke xjal, 30 tu'ntzun mi'n tcawin tuj tnam jun xjal mya ba'n ex sbul. 31 ¿Baka o txi tma'na te Dios: Ma chin tzpete ti'j ex mi'n chin binchane il juntl maj, 32 yec'untza weye alcye ke npaltile minti' nne'l nnic'e ti'j, ka at mya ba'n o bant wu'ne, mlay nbinchaye juntl maj? Chiwta. 33 ¿Maj tajbila tu'n ttzaj tk'o'n Dios chojbil teya ic tza'n tajbila ex masque otok tz'el tic'una Dios? Axa cbel ximante ex mya a kine, k'mantza aju ba'n tu'na. 34 Ke xjal sec' cynabl, akeju in che bin ti'j nyole, cyuc'ix ke xjal at cynabl, oc cyma' weye cyja': 35 In yolin Job ti'j aju minti' nne'l tnic' tij; minti' cytxolil ke tyol. 36 Ba'n tu'n toc Job tuj malbil, porque ke tzak'webl in tzaj tma'n, mer ic tza'n ttzak'webl jun xjal mya ba'n. 37 Mya nok o'cx ma binchan Job il, ax icx miban bin; kwitzx nno'c ten xmayil ti'j Dios ex cucx tyolin ti'j Dios.
