JOB 33

1Cyja'tzun bintza ke nyole Job; k'o'nc twi'ya ti'j yol cxel nma'ne teya. 2Lu ma bant tten yol tu'n t-xi ntzak'we'ne teya: 3Axix toc aju chin yolile ti'j, cxel nma'ne aju axix toc ba'n wu'ne. 4Ate T-xew Dios aju at tipumal tu'n tbant tcyakil tu'n, cub binchante weye ex tzaj tk'o'n nchwinklale. 5Chin ttzak'wentza, ka jacu chin tzak'wete tu'na; bincham ttena tu'n tyolina wuc'ile. 6Aya ex akine junx elni ko' tuj twitz Dios; ax icx weye ti'j tx'otx' in bante. 7Cyja'tzun mi'n jaw xoba nwitze, porque mlay chin cawine cyuw tibaja. 8O nbiye tej tmanteya ke yol lu, chiya: 9Sakxix kine ex minti' wile, minti' npaltile ex minti' il o nbinchaye. 10Atzunte Dios in jyon tumel alcye tu'n toc t-si'man wi'je ex in chin oc tk'o'n ic tza'n aj k'oj ti'j; 11ma che oc tc'alo'n ke nkane tu'n caden ex nno'c tk'o'n tcwent ti'j tza'n in chin bete, chitzuna. 12Pero tcyakil aju in tcyuwsa'na mya tuj tumel, porque ate Dios mas ma' toclen cywitz xjal. 13¿Tiku'n nno'c tma'na tibaj twitz tu'nju minti' in che tzaj tzak'we'n ke tyola tu'n? 14Ate Dios in yolin tuj nimcu tumel, atzun ke minti' nne'l knic' ti'j. 15At maj in yolin konic'an tuj jun witzic' ex ka in tzaj tyec'un mer ic tza'n tuj jun witzic' oc in che tan xjal ex oc in tzyet cyc'u'j tu'n watl. 16Nno'cx tjasc'u'n Dios tuj cyẍcyin xjal, in che oc tmayo'n ex in tzaj cyxobil tu'n, 17tu'ntzun cyel tpa'n cyi'j cybinchben mya ba'n ex tu'n mi'n tjaw cyniman cyib. 18Cyja'tzun in che clet tu'n tu'n mi'n cynaj, in che clet tu'n tu'n mi'n cycyim. 19At maj in cawin Dios cyi'j xjal, in tzaj tk'o'n yabil cyi'j tuc'il nim ta'w tuj tcyakil cyximlal. 20Tcyakil cychi', icxpe aju mas c'oc'jxix, nne'l tic'un cyc'u'j. 21Nno'c tzkij cychibjal cyi'j ex in cyaj k'anchalin ke cybakil. 22Ya ch'ix cycyim ex ch'ix cyxi k'i'n tuj mukbil. 23Pero cyxol jun mil anjel, ka at jun nikayin ta' ttxlaj tu'n tyolin ti'j ex ka ma txi tma'n te alcye tu'n tbinchante, 24ka ma tzaj k'ak'an tc'u'j ti'j ex ka ma txi tma'n te Dios: Cloma ju xjal lu tu'n mi'n tcyim porque ma cnet chojbil til wu'ne, ka chi, 25c'eleltzun yabil ti'j ex c'oquel juntl maj ic tza'n tej cu'xunxtok. 26Oc cubsal twitz Dios ex ctzajel bi'n tu'n; ex tuc'il nim tzalajbil c'oquel cyque'yin cywitz tuc'il Dios ex cc'metel tu'n Dios juntl maj. 27Cxeltzun tma'n cye xjal: O chin binchane il, o nbinchaye aju mya tz'aklxix, pero minti' cub tk'o'n Dios ncastiwoye; 28nokpe ma chin clete tu'n te camic ex cucx toc nque'yine t-spic'umal k'ij. 29Atzunju in tbincha'n Dios cyi'j xjal nimcu maj; 30in che clet tu'n te camic ex in xi tk'o'n ambil tu'n cucx toc cyque'yin t-spic'umal k'ij. 31Chin tbintza Job ex k'o'nc twi'ya ti'j nyole; txulecuya acux in chin yoline. 32Ka at jun tyola tu'n ttzaj tma'na weye, chin ttzak'wentza; ka ax toc tyola, jacu txi nma'ne ka tuj tumel in yolina, 33pero ka minti' tyola, txulecuya bilte nyole, ex akine chin xel xnak'tzante teya tu'n toc tnabla.

will be added

X\