JOB 32

1Tej tcyil keju ox xinak cucx in tma'n Job ka minti' til, xi cycolin tu'n cyyolin tuc'il. 2Attok jun xinak Eliú tbi, tcy'ajal Baraquel aju aj Buz ex tiyjil Ram, tzaj tk'oj ti'j Job tej tbinte cucx in tma'n Job ka tz'aklxixte, atzunte Dios mya tz'aklxix tuj twitz Job. 3Ax icx tzaj tk'oj cyi'j keju ox tamiw Job, tu'nju minti' cnet tumel cyu'n tza'n tten tu'n cytzak'wet tyol Job cyu'n, o'cx otok cyma ka at til Job. 4Tu'nju mas cu'xuntok Eliú cywitz keju ox tamiw Job, cub tyo'n tej cybaj yolin. 5Pero tej tque'yinte ya minti'tl bant ttzak'wet tyol Job cyu'n, tzajtzun tk'oj, 6ex tzyettzun tyolin cyja': 7Cub nximane cyja': E cyyolin keju at nim cyojtzkibl, e ttzaj cyyec'un tij xjal cynabl ma cyc'am tuj nimcu abk'i. 8Pero ax icx cycyakil xjal at cynabl, porque ate Kman aju at tipumal tu'n tbant tcyakil tu'n o tzaj tk'o'n cychwinklal tu'n tten cynabl. 9Mya tu'nju nim tabk'iyil jun xjal at tnabl, ex mya tu'nju tij xjal nne'l tnic' ti'j alcyeju tz'aklxix. 10Cyja'tzun ma txi nma'ne: Chin cybintze, ax icx weye at cabe nyole tu'n t-xi nma'ne. 11Ma chin cub txule'ye bilte ex ma nbiye cyyole xi cyma'ne. Ma nbiye tej in che jyontoke alcye yol tu'n t-xi cyma'ne, 12ax icx ma wile mi a'l jun cyeye ma cnet tumel tu'n tza'n tten tu'n tbant ttzak'wet tyol Job. 13Tu'ntzun mi t-xi cyma'ne ka at-xix cynable, ate Dios cxel tzak'wente tyol Job ex mya jun xjal. 14Pero minti' jun yol ma tma Job wi'je, ex mya ax ke yol che xel ntzak'we'ne te ic tza'n cyeye ma txi cyma'ne. 15Aya Job, akeju ox xinak lu ma naj cynabl ex minti' in cnet yol cyu'n tu'n ttzak'wet tyola cyu'n. 16¿Ba'npe cucx tu'n wayontle, yaque ma txi cycolin tu'n cyyolin tu'nju minti' ma cnet tumel tu'n ttzak'weta cyu'n? 17Ax icx weye chin yolile ti'j ju yol in che yolin ti'j ex cxel nma'ne aju ba'n wu'ne. 18Nim yol at wuc'ile ex mlayx tzic'x wu'ne tu'n mi'n t-xi nma'ne. 19Ic in tene ic tza'n jun bols tz'u'm ac'aj ex ch'ix tel tzakj tu'n ta'l twitz uva minti' jatum tu'n tetz. 20Oc chin yolile tu'ntzun tjatz baj nyole ex cxel nk'o'ne jun yol te tzak'webl teya. 21Mlay txi nma'ne jun yol mejorxix tponlen nok tu'n tcub nsbu'ne jun xjal, parej chin yolile cyi'je. 22Ax toc, mya nak'l kine tu'n tcub nsbune jun xjal tu'n mejor yol, porque ka ma nbinchaye icju, jacu cub ncastiwoye tu'n Dios aju ch'isal weye.

will be added

X\