JOB 31

1O cub nk'o'ne jun nleye ax wi'je, tu'n mi'n tpon nc'u'je ti'j jun k'apoj. 2¿Alcyetzun chojbil in tzaj tuj cya'j cye xjal, tu'n Dios aju at tipumal tu'n tbant tcyakil tu'n? 3¿Mya'petzun tibajx ju xjal binchal mya ba'n ex ju xjal aj il in cub tz'ak ju mya ba'n? 4¿Minti'petzun in que'yin Dios ti'j ju in nbincha'ne, ex minti'petzun nno'c tk'o'n cwent ti'j tza'n in chin bete? 5In nma'ne axix toc, minti' ma bant nnic'ane yol, ex misicyer jun xjal ma tz'oc nnic'ane ti'j tu'n tcub nsbu'ne. 6Ba'n tu'n woque tuj balans tz'aklxix tu'n Dios ex atzun c'elel tnic' wi'je ka minti' wile. 7Ka ma tz'el npa'n wibe ti'j ju be axix toc, ka ma pon nc'u'je ti'j jun ti'xti ex ka ma tz'el cnet jun ti'xti tuj nk'abe mya weye, 8e tnic'ben juntl ti'j ju awal o cu'x wawa'ne ex e tjatz baket aju awal o cu'x wawa'ne. 9Ka o txi nnimane tyol jun xu'j tu'n ncub tane tuc'il, ex ka o chin cub tene xk'ukil ti'j t-xu'jil nvesine tu'n tetz wi'ne, 10ba'n tu'n toc nxu'jile te tmajen juntl ex ba'n tu'n tcub tan juntl xinak tuc'il. 11Nokwit icju, puro ch'ixbajilwitlo nbinchbene, ex tuj tumelxlo tu'n tcub ncastiwoye. 12Iclo tten aju nbinchbene lu ic tza'n jun k'ak' in baj tz'e'y nimcu tu'n ex jaculo naj tcyakilju at weye tu'n. 13Tej ttzaj cyma'n ke nmajene weye ti'j jun ti'xti minti' cub tuj cywitz, tcyakil maj xi nnimane aju cykanbetz. 14¿Alcyetzun juntl tumlal tu'n nyec'unte wibe twitz Dios? ¿Alcyetzun ntzak'weble te oc ttzaj tkanin weye ti'j ju nbinchbene? 15Axte Dios o binchante keye tuj talbil ktxu'ye; tza'nx o txi tk'o'n cychwinklal ke nmajene, icx weye o tzaj tk'o'n. 16Minti' cub nxc'ayine tu'n t-xi nk'o'ne aju at tajben cye meba, ex minti' wak'e ambil tu'n tic'x we'yaj cyu'n ke meba xu'j. 17Minti' in cub tene wa'l ti'j nwaye junx weye, ax icx xi nsipane cye meba c'wa'l. 18Atxix tej c'wa'l kine o nbinchaye ba'n cye meba c'wa'l, ic tza'n akine cyman, ex cucx in coline cyi'j ke meba xu'j. 19Tej toc nque'yine ka at jun cyja'tok tcyim tu'n tlaj minti' t-xbalun ex ka at jun meba minti' txaybil te, 20ax cylan ke nẍne'le xi nk'o'ne te cyxbalun tu'n cymek't ex o tzaj cyk'o'n chjonte weye ti'j jlu. 21Misicyer oc nk'o'ne nk'abe ti'j jun meba nok tu'nju wamiw wibe cyuc'il ke jwes. 22Ex katzun mya ax toc jlu, entons ba'n tu'n cybaj tokj ke nk'abe ex e cyel tz'ak cyi'j ke nsemile. 23Nokwit minti' in xobe twitz ju castiw tu'n Dios, minti'wtlo ẍin we'ye twitz, tu'nju ma' toclen. 24Mya ti'j k'an pwak o ke' nc'u'je ex minti' cub nximane tu'n ntene segur tu'n. 25Aju tzalajbil at weye, mya tu'nju at nim nk'inumable ex mya tu'nju at nim pwak wuc'ile. 26Tej twile aju k'ij in c'ant ex aju xjaw in bet tbanilxix che que'yin, 27minti' ma chin c'ulune cye tuj ewaj ex minti' ma tz'el ntz'ubane tuj nk'abe tu'n nk'olbene cye. 28Nokwit ma bant jlu wu'ne, mas ba'nwitlo tu'n tcub ncastiwoye, porque ka in chin c'ulune cye, entons in cub wewane aju Dios at tuj cya'j. 29Minti' o chin tzalaje ti'j mya ba'n o tzaj cyi'j ke aj k'oj wi'je ex minti' o chin tzalaje tej ttzaj jun bis cyi'j. 30Misicyer o tzaj nkanine jun castiw cyibaj, ex minti' o wajbeye tu'n ttzaj camic cyi'j. 31Ka at jun cyxol keju e ten wuc'ile o tajbe tu'n tbinchante jun mya ba'n ti'j jun stranjer xjal, 32minti' jun stranjer xjal cyaj nk'o'ne tuj cay te konic'an. Xi nk'o'ne cyposad ke betin xjal. 33Misicyer ma cub wewane npaltile, ic tza'n in cybincha'n junjun xjal, ex minti' ma nbinchaye tu'n tten jlu wu'ne tuj ewaj 34nok tu'n tlaj nxobile cywitz xjal. Minti' ma tz'ocx nlamon wibe t-xe ja tu'n mi'n nk'ajte nok tu'n mi'n wel ic'une cyu'n keju at nxilene cyuc'il. 35¿Minti'pe jun xjal in bin ti'j nyole? Aju in xi nma'ne, axix toc tcyakil jlu. Ja'lo ba'n tu'n ttzaj ttzak'we'n Dios ju nyole, aju Dios at tipumal tu'n tbant tcyakil tu'n. Aju aj k'oj wi'je ba'nwt tcub ttz'iban alcye wile tuj twitz, 36ex jaculo txi wi'ne tu'n tcyakil nc'u'je ex jaculo tz'oc te weye ic tza'n jun coron in ajben te jun techal te nimbil oc cjawix tuj nwi'ye. 37Jaculo txi nk'o'ne tajlal tcyakil nbinchbene twitz Dios ex jaculo chin pon lak'e'ye ttxlaj minti' nch'ixwiye. 38Ka in tma'n ntx'otx'e ka at jun mya ba'n o nbinchaye ti'j, ex ka in che ok' ke surc tu'nju in che bisun; 39ex ka atcu jun o tz'el welk'ane twitz tawal, ex ka o che cub nyajla'ne ke ak'nal twitz tx'otx', 40entons ba'n tu'n ttzaj tpok'sa'n ntx'otx'e ch'i'x c'ul te t-xel triw ex ju c'ul mya ba'n te t-xel sebad, chi Job. Ex atzun pon baj tyol Job te tcolbil tib.

will be added

X\