JOB 30

1Atzun ja'lo in che tze'n wi'je ke cu'xun mas c'wa'lxix ke nwitze ex minti'wt e c'met ke cyman wu'ne tu'n cyten cyuc'il ke tx'yan in che cwentintok ke nẍne'le. 2¿Ti tajben weye aju cyak'unben xjal lu? Porque minti'tl cyipun 3tu'nju we'yaj nim ex tu'nju minti' at cye. Te konic'an el cytx'a'n tloc' tze' tzkij tuj tzkij tx'otx' minti' cynajbil xjal tuj, 4in jatz cybako'n ke itzaj puro c'a cyxol ke mastl c'ul, ex tuc'ix tloc' tal tze' retama tbi in xi cywa'n. 5Ic'un cywitz cyu'n ke xjal ex in che sch'in ke xjal oc in che oc lpe' cyi'j, mer ic tza'n elek' ke; 6in che najan cyuj ke tkan xak ex cyuj ke toy' pic ex cyuj jul. 7In che tzanun tjak' c'ul ic tza'n ke txcup oc toc cychmon cyib tjak' c'ul. 8Ke xjal lu minti'x cyajben, mya cyajlal ke tuj tnam, o che etz lajo'n cyu'n xjal. 9Atzun ja'lo in che xmayin wi'je ex in chin oc cyk'o'n te cytzebl. 10Ma chin el ic'une cyu'n ex in che el lak'e' wi'je ex nno'c cytzuban tuj nwitze. 11Ja'lo, tu'nju ma tz'el ti'n Dios wipune ex ma chin baj tc'ixbisa'n, cyja'tzun minti' in che xob nwitze. 12Nnu'l cychmon cyib ntxlaje ex in chin cub tz'ake cyu'n, in che oc tzokpaj wi'je ex nno'c tilil cyu'n tu'n ncub cybyo'n. 13In cub cymako'n tuj nbeye tu'ntzun ncub cybyo'n ex mi a'l jun nno'c mayonte cye ti'j. 14Mer ic tza'n oc in che ocx tzokpaj xjal tuj jun toy' muro catl, cyja'xtzun in che tzaj tzokpaj wi'je tuc'il nim cyipun. 15Ma tzaj nimxix t-xobil wi'je, ma tz'el woclene ic tza'n cyk'ik' in bet; tcyakilju at weye ma cub naj ic tza'n muj. 16Mi'n wajtle tu'n wank'ine; ma chin tzyete tu'n c'ixbisabl. 17Ma pon ta'w max cyi'j ke nbakile; minti' jun ak'bil miwt in chin c'ixbisanjtze. 18Ti'j nkule ma chin tzaj tzyu'ne tu'n Dios ex tu'n tipun ma baj tchito'n nxbalune. 19Ma chinx t-xo'n tuj xok'l, mer ic kine ic tza'n kuk ex ic tza'n tza'j. 20In chin kanine onbil teya Dios, ex minti' in chin tzaj ttzak'we'na, in chin cubsane twitza ex minti' in chin tzaj tbi'na. 21Cyuwxix ma chin baj tc'ixbisa'na ex ma tz'oc tzokpaja wi'je tuc'il nim tipumala. 22In tk'o'na ambil tu'n nxi ikane tu'n cyk'ik', ex tu'n nbaj chito'ne tu'n cyk'ik' jbal. 23Ba'n wu'ne taja tu'n ncyime, tu'n npone tuj lugar banimaj cye cycyakil xjal. 24¿Baka minti' o chin onine cyi'j ke meba ex o che clet wu'ne tuj cymebayil? 25¿Baka minti' o chin ok'e ti'j xjal nnic'x c'ixc'oj tu'n, ex baka minti' o tzaj k'ak'an nc'u'je ti'j xjal minti' at te? 26In chin ayontoke tu'n ntene tuj tzalajbil, ex te t-xel jlu, tzaj ju mya ba'n wi'je; in chin ayontoke ti'j spic'un, ex te t-xel jlu ul ju klolj. 27Aju wanmiye in putin ex minti' ojlabl te, o'cx bis in ayon wi'je. 28Bisbajil atine tuj nchwinklale, minti' in chin exe ti'j tkan k'ij; in chin kanine onbil cywitz cycyakil xjal. 29Ma chin oque mer ic tza'n cyerman ke xo'j ex ic tza'n cyamiw ke chyu'j avestrúz cybi. 30Aju ttz'umal nximlale ma tz'oc k'ek que'yin ex nim in julin wi'je tu'n ta'w cyak. 31Aju cyk'ajk'ajel ke chnab arpa ex xux ma tz'oc te weye te c'ixc'oj ex ok'el.

will be added

X\