1 Tzyettzun tyolin Job ex xi' tyol ti'j ju k'ij tej tul itz'j ex tma: 3 —Cuchiwt tu'n tnaj ju konic'an tej woc tene tuj talbil ntxu'ye, ex cuchiwt tu'n tnaj ju k'ij tej witz'je. 4 Nokwit oc ju k'ij te konic'an tej witz'je ex nokwit ic' tna'l tu'n Dios tu'n mi'n tjawil k'ij. 5 Nokwit oc yupj tu'n txkan k'ek muj ex bi'xwit ocx naj tuj, ex nokwit yupj twitz k'ij tu'n ttzaj xobajil. 6 Nokwit bi'x xi naj ju konic'an lu tuj kxopin ex minti'wt oc tajlal cyxol ke mastl k'ij te xjaw ex te abk'i. 7 Nokwit minti' e itz'j c'wa'l tuj konic'an lu, ex nokwit minti' jaw tk'ajk'ajel cywi xjal tu'n tzalajbil tej tul itz'j jun ne'. 8 Nokwit otok txi' cyyol ke aj k'ij ti'j ju k'ij lu, akeju ba'n txi niman cyyol tu'nju nintz txcup at tuj mar, Leviatán tbi. 9 Nokwit minti' e c'ant ke che'w te prim lu, ex nokwit minti' jawil k'ij aju in che ayon xjal ti'j, ex minti'wt tzaj t-xe cya'j. 10 Cuchiwt tu'n tnaj ju konic'an lu, aju o tak' ambil tu'n witz'je, tu'nju minti' mayet tu'n aju c'ixc'oj ma tzaj wi'je. 11 ¿Tiku'n mi in cyime tuj talbil ntxu'ye, ex tiku'n mya bi'x in cyime texju or tej witz'je? 12 ¿Tiku'n in cub k'o'ne twi tkan ntxu'ye, ex tiku'n tzaj k'o'n nch'u'ye tu'n ntxu'ye? 13 Nokwit bi'x in cyime tej wul itz'je, luwtlo kine in chin tan tuj txubtxaj ex luwtlo kine in chin ojlan tuj txubtxaj, 14 cyuc'il ke rey ex cyuc'il ke mastl xjal at cyoclen ttxlaj rey, akeju in baj cybincha'n ke nmak cypantyón, 15 ex ka cyuc'il ke cawil, akeju in baj cychmo'n nim k'an pwak ex sak pwak tuj cyja. 16 ¿Tiku'n minti' in cu'x maku'ne ic tza'n jun c'wa'l minti' in japun tk'ij tu'n tul itz'j, ex ka ic tza'n ke c'wa'l otok che cyim oc cyul itz'j? 17 Oc cycu'x makut ke xjal binchal mya ba'n, ya mlay che yajlantl cyi'j cyuc'il, ex ke xjal otok che sict wen, atzun in che ojlan. 18 Atzun in che ten ke pres tuj txubtxaj, ex ya mi a'l caporal tu'n tyolin cyuw cye; 19 atzun in che pon ke xjal ma' cyoclen ex ke ch'in cyoclen, ex ju majen tcyaj tjak' tcawbil patrón, atzun in tzokpet. 20 Tiku'n in tzaj tk'o'n Dios spic'un te xjal nim nnic'x tu'n? 21 In ayon tu'n tcyim, pero minti'x in cyim; mas in jyon ti'j camic twitzju k'inumabl tcu'x tjak' tx'otx'. 22 Maxitzun ctzalajel xjal lu oc tcu'x maku'n. 23 Nok in tacpaje' xjal tu'n Dios, porque mako'n tbe tu'n tuj tcyakil pac'. 24 Minti' ch'in in chin wa'ne, nok o'cx in chin ayayane; ex oc in chin ayayane, mer ic tza'n tk'ajk'ajel txkan a' minti' in we' tu'n tk'ajt. 25 Tcyakilju in chin xobtoke ti'j ex aju mas tzaj t-xobil wi'je, ma tzaj wi'je. 26 Minti' in chin ojlane ex minti' in chin tene tuj txubtxaj; minti' in chin tene tuj tzalajbil, nok o'cx in chin yajlanjtze.
