JOB 29

1Oc ten Job yolil juntl maj ex tma: 2Nokwit ba'n npone ic tza'n ntene ojtxi, tej cwentintok kine tu'n Dios, 3tej in tzaj tk'o'ntok spic'un tuj nbeye, ex tu'n jlu in chin bettoke segurxix tuj klolj; 4tej matok k'i'n wipune ex cwentin njaye tu'n Dios; 5tej attok Dios wuc'ile, aju at tipumal tu'n tbant tcyakil tu'n, ex ate' ke nc'wa'le ntxlaje; 6tej in cyk'o'ntok ke ttxu nwacẍe nim lech, ex tej attok nim chibj aseyt nne'l cyi'j tze' awa'n cyxol abj, 7tej in cub ke'ye ttzi tpwertil tnam junx cyuc'il ke aj sanjelal. 8Oc in chin ilwaje cyu'n ke cu'xun, in che el lak'e', atzun ke tij xjal in che jaw we' tu'n cyniman weye, 9icxpe ke xjal at cyoclen, in che cubtok txule' ex nno'c cyyec'un tal cyk'ab cytzi' tu'n mi'n cyk'ajt; 10xi cycolin ke cawil tu'n cyyolin ex mer bi'x nno'cx lac'e' cyak' tuj cyc'o'n. 11Oc in chin ilwaje cyu'n xjal ex ka oc cybinte nyole, in chin tzaj k'olbe'ne cyu'n ex in che yolin ba'n wi'je, 12porque in chin colintoke cyi'j xjal minti' cyman ex cytxu' ex cyi'j xjal meba, akeju mi a'ltok jun in onin cyi'j. 13Oc in chin onine cyi'j keju ch'ixtok cynaj, in tzaj cyk'o'n chjonte weye ex oc in chin onine cyi'j ke meba xu'j, nimxix in che tzalaj. 14Tcyakilju in bant wu'ne tz'aklxix ex tuj tumelxix ex ic tten jlu te weye ic tza'n nxbalune toc wi'je tcyakil k'ij. 15Mer ic tza'n tbak' witzbaj kine cye ke moẍ ex mer ic tza'n kambaj kine cye ke cox, 16mer ic tza'n mambaj kine cye keju minti' at cye, ex colol kine cyi'j ke xjal minti' ojtzki'n cywitz wu'ne. 17E naj wu'ne ke xjal mya ba'n, ex el wi'ne cye aju otok tzyet cyu'n. 18Tuj nximbetze ka nimtok tuj nk'ije tu'n tten ic tza'n tajlal ttxa tza'n, ex tu'n ncyime otok chin tijine ex ax tuj njaye. 19Ictok ntene ic tza'n jun wi' tze' awa'n ttzi a', in che ac' tk'ab tu'n tk'ab che'w konic'an. 20Cucxtok in chin jaw nimsa'ne cyu'n xjal ex minti'tok in baj wipune. 21Cycyakil xjal xi cybi'n ke nyole ex e cub txule' tu'n t-xi cybi'n ke nconseje. 22Nbajlenxi yoline mi a'l jun o k'ajt. Ba'nxix e ela ke nyole te cye, 23in che ayontok ti'j nyole ic tza'n in che ayon xjal ti'j jbal tuj tk'ijlalil ta'w cyak. 24Oc in chin jaw tze'ne cyuc'il, minti' in xi cyniman ex minti' nne'l cyi'n cywitz wi'je tu'nju in chin tzalaje. 25In cawine cyibaj ex cub nximane alcye tu'n tbant cyu'n, ic tza'n jun rey in cub nej cywitz ke t-soldad. Tej in che bisuntok, xi nk'ukba'ne cyc'u'j.

will be added

X\