1 Xitzun ttzak'we'n Job ex tma: 2 ¿Apetzun tumlal in onina ex tu'n tclonteya aju xjal minti' tipun? 3 ¿Tbanilpetzun ke tconseja ex ke t-xnak'tzbila in che'x tk'o'na teju xjal minti' ch'in ba'n tu'n? 4 ¿Alcye ma onin teya tu'nju ma tzaj tmana ke yol lu? ¿Alcye ma tzaj k'mante ke yol lu teya tu'nju ma yolina icju? 5 Ke cyimni in che lu'lun tu'n cyxobil cyuc'ix keju najlke max t-xe'pun mar. 6 Aju cynajbil cyimni k'ancha'l twitz Dios ex minti' tmaksil tcub. 7 Tu'n Dios xi tlic'pu'n cya'j tibaj ju minti'tok at ex jaw tyoban tx'otx' tibaj ju minti' at. 8 Tu'n Dios chmo'n a' tuj muj ex minti' in tzaj tz'ak muj tjak' talil; 9 nno'c klolj twitz xjaw tu'n, oc nno'c tk'o'n muj twitz; 10 ttxa'npun mar cub tk'o'n jun tmojonil tu'n tten spic'un tuj jun plaj ex tu'n tten klolj tuj juntl plaj. 11 Oc in cawin Dios, in che tzaj lu'lun ke nmak witz tu'n cyxobil, jatum k'ejl cub ju cya'j. 12 Tu'n tipumal Dios mayet mar; ex tu'nju tnabl cub ti'j nintz txcup Rahab tbi. 13 Tu'nju t-xew xi t-xupin, el spic'e' twitz cya'j; ex tu'n tk'ab cub byo'n aju lobaj cyuwxix ojkelan. 14 Aju ma kbi ti'j tbinchben nok ch'in; aju ma kbi ti'j tipumal, nok ch'in. ¿Alcye jun jacu tz'el tnic' ti'j tk'ajk'ajel tipumal in julin wen ic tza'n k'ancyok?
