JOB 21

1Xitzun ttzak'we'n Job ex tma: 2Aju tumel mas ba'n tu'n ttzaj cyk'ukba'ne nc'u'je, atzun tu'n tcub cybi'ne nyole. 3Ten cypasense oc nyoline, ex nbajlenxi yoline, ba'n cyxmayine wi'je ka cyajbile. 4Mya tuc'il xjal in chin k'ojine; cyja'tzun ma baj npasense. 5Chin cyque'yintze ex che elel sec'paje wi'je, ex mi'n che k'ajte. 6Ka ma chin ximane wi'jxe, in chin el sec'paje ex in tzaj lu'lun nximlale. 7¿Tiku'n cucx cyten ke xjal mya ba'n, in che tijin ex in chmet cyk'inumabl? 8Nno'c cyque'yin oc in che ch'iy ke cyc'wa'l ex ke tal cychman, ax cytxlaj in che ch'iy ex ba'n ate'. 9Tuj txubtxaj ate' tuj cyja, mi a'l jun in xobtzan cye ex minti' in cub cycastiw tu'n Dios. 10Ke cytor cucx in che c'wa'lin; nno'c ten cyal ke ttxu cywacẍ ex minti' in cub cyal na'nxtok tjapun tk'ijlalil. 11In che schan ke cyc'wa'l ex in che lipan ic tza'n ke tal ẍne'l. 12In che bitzan tuc'il tzalajbil ex in che t'icpaj ti'j t-sonil chnab arpa, tuc'ix tampor ex xux. 13Tuj tzalajbil in pon baj cychwinklal ex tuj cheba in che cyim. 14Che chi te Dios: Pa'mil tiba ki'je, mi'n kajbile tu'n kbinteye aju in tma'na tu'n tbant ku'ne. 15¿Ti toclen Dios aju at tipumal tu'n tbant tcyakil tu'n? ¿Ilpetzun ti'j tu'n kajben te? ¿Ti kganar ti'j tu'n kcubsan twitz? Che chi. 16Tcyakilju at cye ke xjal mya ba'n, mya cyu'nx in cnet. Mi'n waje tu'n nximane ic tza'n cye. 17Mi jun maj in cub yupj cyspic'un ke xjal mya ba'n. Mi jun maj in tzaj mya ba'n cyibaj. Mi jun maj in jaw k'ojl Dios cyuc'il ex mi jun maj in che c'ixbisanjtz tu'n. 18Mi jun maj in che el sputj ic tza'n in xi ikan ttxa triw tu'n xcyakinpaẍ. 19Ma cymaye, cbel tk'o'n Dios cycastiw ke c'wa'l tu'n tlaj ju mya ba'n o cybincha cyman, che chiye. Pero ax te xjal mya ba'n cxel chjonte ju mya ba'n o tbincha, tu'ntzun tel tnic' ti'j. 20Oc ttzaj tk'oj Kman aju at tipumal tu'n tbant tcyakil tu'n, axte xjal mya ba'n oc c'molte castiw tu'n. 21Oc tcyim, ¿ti toclen ti'j aju cbajel cyxol keju ate' tuj tja? 22(Pero, ¿alcye jun jacu txi tk'o'n xnak'tzbil te Dios, aju Dios in che oc tk'o'n tuj xjel keju ma' cyoclen?) 23At junjun xjal in che cyim atx nim cyipun, in che tzalaj ex txubtxaj ate', 24nimcu at cye ex ba'n ta' cyximlal. 25Ex at junjuntl, puro tuj c'ixc'oj in che cyim ex minti' otok che ten ch'in tuj txubtxaj. 26Masque icju, pero cycyakil che pol tuj mukbil; cycyakil che bajel chyo'n cyu'n ẍuk'. 27Ba'n wu'ne alcye in cub cyximane wi'je ex alcye nabl mya ba'n k'i'n cyu'ne. 28In baj cykanine cyxolxe: ¿Jatum ta' ja'lo tja ju xjal mya ba'n ex puro cyuw tmod? Che chiye. 29¿Na'nxpetzun cyyoline cyuc'il ke xjal in che bet cyuj nimcu lugar? ¿Na'nxpetzun cybinteye ke yol in cyma'n? 30Oc in tzaj tk'oj Dios in tzaj t-sama'n jun mya ba'n cyi'j xjal, atzunte xjal mya ba'n minti' in baj ti'j, che chi. 31Mi a'l jun nno'c k'mante te tibaj twitz alcyeju tbinchben, ex mi a'l jun in cub k'onte tcastiw ti'j tbinchben. 32Octzun t-xi k'i'n tuj mukbil, cycyakil xjal lepch ke ti'j, at ke nejni ex at ke lepchix nno'c cyxk'ukin tuj mukbil, ax icx ju tx'otx' puro bunin twitz tna'n. 34Nok gan cyajbile tu'n toc cyk'ukba'ne nc'u'je. Puro nic'aj yol tcyakilju in cyma'ne, chi Job.

will be added

X\