JOB 20

1Xitzun ttzak'we'n Zofar aju aj Naamat, ex tma: 2Nim in chin ximane ex ma baj npasense; cyja'tzun wajbile tu'n t-xi ntzak'we'ne. 3Ma tz'el nch'ixwiye tu'n tyola, pero ba'n wu'ne alcye cxel ntzak'we'ne teya. 4┬┐Minti'petzun ba'n tu'na icxix ttenju atxix tej tcub ten xjal twitz tx'otx': 5Aju ttzalajbil xjal mya ba'n nok ch'in in ten; aju tachbil nok ch'in tuj in ten? 6Masque japun baj tnimbil tib twitz cya'j, ex masque pon tacl twi' jatum ta' muj, 7cnajel ic tza'n ttxa alumaj, ex mlay cybi ke tamiw jatum otok pon. 8Cbel naj ic tza'n jun witzic', ex ic tza'n jun in tzaj yec'un te xjal konic'an mer ic tza'n tuj witzic', ex mi a'l jun jacu cnet xjal lu tu'n. 9Keju e ten junx tuc'il ex oc cyque'yin twitz, mlay tz'oc cyque'yin twitz juntl maj. 10C'ajel cyk'o'n tc'wa'l juntl maj aju otok tz'el telk'a'n cyman cye ke meba. 11Atxtok tipun ex cu'xunxtok oc tcyim ex oc t-xi k'i'n tuj mukbil. 12Aju mya ba'n puro chi' nne'la te te, ex in baj tlek'an tak' aju ttxubtxajal; 13ax in cub tc'u'n ju ttxubtxajal tuj ttzi' ex cheba in txubt tc'o'n ti'j. 14Octzun tcu'pun tuj tc'u'j nno'c ic tza'n tvenen lobaj. 15In jatz t-xa'n aju k'inumabl otok txi tbalk'u'n; in jatz ti'n Dios tu'ntzun mi cucx tten tuj tc'u'j. 16In tz'ubantok ti'j tvenen lobaj, ex atzun venen lu cbel byonte te. 17Mlay achin ti'j lech ex ka ta'l cab aju nimxix ic tza'n nima. 18Tcyakil aju otok tcamba c'ajel tk'o'n juntl maj; mlay tz'oc te tajwil ex mlay achin ti'j tk'inumabl. 19Porque e cub tyajla'n ke meba ex e cyaj tcolin; oc tk'on tib te tajwil ke ja, akeju mya tu'n otok che jaw tbincha'n. 20Minti' in cyaj conporm ti'j nimcu at te, ex tcyakilju in pon tc'u'j ti'j in cnet tu'n. 21minti' jun ti'xti in cyaj ten tu'n tu'n mi t-xi tchyo'n. Cyja'tzun mlay ten ba'n nim k'ij. 22Ka mas nimxix at te, mas tbis in tzaj; ctzajel nimcu mya ba'n ti'j. 23Oc toc ten nojsalte tc'u'j, ctzajel nim tk'oj Dios ti'j: ex ctzajel nim ttx'u'jil Dios ti'j. 24Ka ma tz'el ok twitz byolte te tu'n spad, jacu tza'w tu'n jun plech k'an c'uxbil. 25Aju plech c'oquex xuypaj tuj t-ximlal, atzun twi plech c'elex tuj ttx'otx'. Ctzajel nimxix xobajil ti'j. 26Txolin ti'j tu'n nim klolj. Cbel tz'e'y tu'n k'ak' tuc'ix tcyakil tja. Aju k'ak' lu mya il ti'j jun xupilte tu'n tjaw c'ant. 27Tuj cya'j c'elel til tuj k'ancha'l, ex aju tx'otx' ck'malte alcye til. 28Oc ttzaj nim tk'oj Dios tibaj, cnajel tcyakil tk'inumabl tu'n. 29Atzun jlu banimaj tu'n Dios teju xjal mya ba'n, atzun jlu ctzajel k'o'n te tu'n Dios.

will be added

X\