JOB 19

1Tmatzun Job: ¿Jtojtzun txi cycoline tu'n cyyajlane wi'je ex tu'n nc'ixbisanjtze tu'n cyyole? 3Ela' majxi chin oc cyic'le'ne; ¿minti'pe in tzaj cych'ixwiye tu'nju in cybincha'ne wi'je icju? 4Ex masque at wile, pero o'cx weye cbel ncastiwoye tu'n tlaj. 5Atzun cyeye nno'c cyk'on cyibe mas ba'n nwitze, ex nno'c cyma'ne tibaj nwitze aju yajbil weye. 6Tz'elx cynic'e ti'j, ate Dios ma tzaj k'onte yajbil wi'je, ex tu'n Dios ma chin ocx k'o'ne tuj c'obil. 7Masque in chin jaw sch'ine: At jun nno'c tzokpaj wi'je, nchiye, pero mi a'l in tzaj tzak'wente weye; in chin kanine onbil ex mi a'l in xi binchante wi'je. 8Ma baj mako'n nbeye tu'n Dios tu'n mi'n wexe; ex cyuj ke tk'ab nbeye puro klolj ma tz'oc tu'n. 9Ma tz'el ti'n tcyakil nk'inumable, ex ma tz'el ti'n woclene. 10Bi'x ma chin naje tu'n, ic tza'n jun ja in cub xitj. Ic ma chin oque tu'n, ic tza'n jun tze' in jatz lacut tloc'; minti' jatum tu'n toc ke' nc'u'je. 11Ma tzaj nim tk'oj wi'je ex ma chin oc k'o'ne tu'n ic tza'n jun aj k'oj. 12Ma che tzaj tlajo'n cycyakil t-soldad wi'je; ma che cub ten ti'jele njaye ex ma bant cyten tu'n cyoc tzokpaj wi'je. 13Tu'n Dios ma che el tlak'ba'n ke wermaniye ex ke wamiwoye wi'je, ex ma chin oc cyk'o'n ic tza'n minti' ojtzki'n kine cyu'n. 14Ke xjal at nxilene cyuc'il ma chin cyaj coline cyu'n, ex ke wamiwoye ma tzic' nna'njtze cyu'n. 15Keju najl tuj njaye cyuc'ix ke nmajene xu'j, mer ic tza'n minti' ojtzki'n nwitze cyu'n, mer minti'tl nne'l cynic' wi'je. 16Ka ma tzaj ntxco'ne jun nmajene xinak, minti'tl in chin tzaj ttzak'we'n masque ma chin cubsane twitz. 17In chin el ic'une tu'n nxu'jile tu'n tlaj nim t-xew nxewe tuj ntzi'ye; ex minti' in che ul lak'e' ke wermaniye ntxlaje tu'n tlaj nyabile. 18Ax icx ke tal k'a in chin el ic'une cyu'n; ex matok in chin jaw we'ye, lu ke in che xmayin wi'je. 19Ke xjal merxix wamiwoye ma chin el ic'une cyu'n; ex keju c'ujla'nxix wu'ne ma jaw cyi'n cyib wi'je. 20Ma chin oc tzkije wen, minti' nchibjale, o'cx nbakile at ex pen ma chin cyaj ank'ine. 21Tzaj tz'e'y cyc'u'je wi'je, akeye wamiw, porque tu'n Dios ma chin c'ixbisanjtze. 22¿Tiku'n in che yajlane wi'je ic tza'n in tbincha'n Dios? ¿Bajxpetzun jatz cyganiye tu'n cyyajlane wi'je; baka nok jun majxi jlu? 23Nokwit at jun cub tz'ibante nyole ex tu'n tcyaj tz'ibet tuj jun libro. 24Nokwit at jun cub tz'ibante twitz plom ex ka twitz abj tu'n jun tal c'uxbil tz'u'p twi', tu'n tcyaj ten te jumajx. 25Ba'n wu'ne aju colol wi'je itz'te, ex ccolil wi'je tzalu twitz tx'otx'. 26Ex masque ma naj nchibjale, pero acuwe kin chin que'yil twitz Dios. 27Acu kine chin que'yilte cyu'n ke tbak' nwitze, ex mya junxitl. Nimxix waje tu'n toc nque'yine. 28Ex ka ma cymaye: ¿Alcye tumel tu'n tcub ti'j tnabl ku'n? Tu'nx til Job ma tzaj ju yajbil ti'j, ka che chiye. 29Tu'ntzun jlu che xobe twitz spad, porque aju spad lu atzun in ajben tu'n Dios tu'n tcub tcastiw xjal mya ba'n. Tz'elx cynic'e ti'j ka at jun jwes tu'n t-xi binchante wi'je.

will be added

X\