JOB 18

1Xitzun ttzak'we'n Bildad aju aj Súa, ex tma: 2¿Jtoj ba'n t-xi tcolin xjal lu tu'n tyolin? Nokwit at tumel tyol jaculo ko yolin tuc'il. 3¿Tiku'n in ko oc tk'o'n ic tza'n jun txcup ex in ko oc tk'o'n minti' knabl? 4¿Chipetzuna ka tu'nju in baj tc'ixbisan tiba tu'n ttx'u'jila, cyjel ten twitz tx'otx' minti' xjal tuj ex ka che ic'el ke pic tuj cylugar? 5Cbel yupj spic'un at tuc'il xjal mya ba'n ex cbel yupj k'ak' at tuj tja, 6aju tcandil cbel yupj; minti'tl spic'un ctel tuj tja. 7Masque at tipun tu'n tbet pero cbel numj, ex aju mya ba'n in cub t-ximan ti'j juntl, te tex c'ajbel. 8Cbel ten jun c'obil tuj tbe, ex cbel tz'ak tuj c'obil lu. 9Cbel ten jun sakbak jatum cbel tkan, oc tic'x ax c'oquel tbalk'i'n tib sakbak ti'j tkul tkan. 10Minti' k'ancha'l c'obil tcub tuj be tu'ntzun ttzyet tuj oc tic' bet. 11Tuj tcyakil part in tzaj t-xobil ti'j; oc in bet mer ic tza'n at jun lajolte tna'n. 12In baj tipun tu'n we'yaj; aju mya ba'n banin tten tu'n ttzaj ti'j. 13In baj wa'n ttz'umal tu'n yabil, ex cheba in xi chyo'n t-ximlal tu'n yabil cyuwxix. 14C'eletz k'i'n tuj tja jatum ta'tok tuj txubtxaj, ex cxel jawo'n tu'n tpon twitz tajwil camic. 15C'oquel k'o'n tk'ak'al tja ex cxel chitun asufre tibaj tetzbil tu'n tnaj. 16Ic tten ic tza'n jun tze' tzkij tloc' ex tzkij ke tk'ab. 17C'ic'el tna'njtz cyu'n xjal, ex mlay tzaj na'n tbi juntl maj. 18C'elex k'i'n tuj spic'un tu'n tpon tuj klolj; ex c'elex lajo'n tzalu twitz tx'otx'. 19Minti' jun tc'wa'l ex mi tiyjil cyjel ten tuj ttanmi; minti' jun cye keju ate' tuj tja che cyjel ank'in. 20Octzun tbinjtz tuj tcyakil lugar aju otok baj ti'j, oc che sec'pajtel xjal ex ctzajel t-xobil cyi'j. 21Atzun cbajel ti'j xjal mya ba'n ex minti' ojtzki'n Dios tu'n, chi Bildad.

will be added

X\