1 Ch'ix tjaw baj nxewe; ch'ix tpon bajsbil te nchwinklale; in ayon mukbil wi'je tu'n npone tuj. 2 Ntxlaje o'cx ke xjal xmayil ate'; in che oc tzokpaj wi'je tuc'il cytx'u'jil. 3 Pero aya Nman yolina wi'je; ¿alcyetzun juntl ka mya aya jacu binchante? 4 Aya o tz'el tzpet-sante cynabl, mi'n tak'a ambil tu'n tcub wi'je cyu'n. 5 Ke xjal nok tu'n pwak in xi cyc'ayin ke cyamiw, tzul yajbil cyi'j cyc'wa'l tu'n jlu. 6 Ma tbinchaya tu'n cyxmayin xjal wi'je, ex tu'n toc cytzuban tuj nwitze. 7 Niban toc muj cyi'j tbak' nwitze tu'n ta'w; jumajx ma tz'oc wi'je. 8 Ke xjal tz'aklxix in che jaw labin wi'je oc woc que'yine cyu'n; in tzaj cyk'oj ex in chin oc cyk'o'n te jun aj il. 9 In cyma'n ka tz'aklxix ke ex minti' cybinchben mya ba'n. 10 Pero cytzaje cycyakile ex mlay cnet jun xjal wu'ne cyxole atwit tnabl. 11 Ch'ix tjapun baj tuj nk'ije, aju in cub nximane ex aju wajbile tu'n tbant minti' in japun. 12 Atzun cye nno'c cyk'o'n konic'an ic tza'n k'ijl; masque at klolj pero in cyma'n ch'ix tul spic'un. 13 Aju weye in chin ayon ti'j, o'cx tu'n npone tuj cynajbil cyimni ex tu'n ncub pale'ye tuj kxopin. 14 Aju mukbil mer ic tza'n nmane c'oquel, atzun ke ẍuk' mer ic tza'n ntxu'ye ex wanbe. 15 ¿Jatum ba'n toc ke' nc'u'je? ¿Jatum ba'n tcnet k'ukbabl nc'u'je? 16 ¿Ocpe cbelex k'ukbabl nc'u'je junx wuc'ile tuj cynajbil cyimni, tu'ntzun wojlane junx tuc'il tuj kuk?
