JOB 15

1Xitzun ttzak'we'n Elifaz aju aj Temán ex tma: 2Aju xjal at tnabl minti' in tzaj ttzak'we'n tuc'il jun yol nokx gan, ex minti' in tma'n jun yol minti' ttxolil; 3minti' in tclon tib tu'n yol nokx gan ex tu'n yol minti' tajben. 4Tu'n tyola mya tuj tumel mlay che nimantl xjal twitz Dios; ex mlay che na'ntl Dios. 5Tu'n t-ximbetza mya ba'n in yolina icju, ex in ajben ju yol te sbubl tu'na. 6Mya il ti'j tu'n t-xi nma'ne at tila, porque tu'nx ju yol in tma'na in tchic'bana at tila. 7¿Maj in ximana ti'j ka aya tnejel xjal bant tu'n Dios twitz tx'otx', ex ka minti'tok ke witz ate' tej tbanta tu'n Dios? 8¿Ope tena cyxol ke k'ol nabl ttxlaj Dios, ex o'cxpe teya at tnabla twitz tx'otx'? 9¿Alcye ba'n tu'na aju minti' ba'n ku'ne? ¿Alcye tzki'n tu'na aju minti' tzki'n ku'ne? 10Kxole at ke tij xjal wen, mas tij xjal ke twitz tmana. 11¿Maj ch'in nne'la tuj twitza tu'nju ax Dios in k'ukbante tc'u'ja ex cheba in ko yoline teya? 12¿Tiku'n nok in tx'a'l ti'j tc'u'ja, ex tiku'n in che etz wacpaj ke tbak' twitza tu'n tk'oja? 13¿Tiku'n in tzaj ttx'u'jila ti'j Dios ex nimxix tyola mya ba'n in tma'na ti'j? 14Minti' jun xjal sak tuj tanmi ex minti'wt tpaltil. 15Milpe cyi'j ke t-anjel minti' nno'c ke' tc'u'j, ex mya'lpe sak nne'l ju cya'j tuj twitz, 16pyortzun te xjal jumajx tz'il ex ic'bil, in pon tc'u'j ti'j mya ba'n ic tza'n jun xjal in c'an a' oc ttzaj txketle'n ti'j. 17Chin tbintza, cxel nma'ne teya aju ma tz'el nnic'e ti'j, 18aju o tzaj cytx'olba'n keye ke xjal at cynabl. O tz'el cycano'n cyi'j ke cyxe'chel, 19akeju o'cxcu cye xi k'o'n tx'otx', ex minti' baj cysmon cyib cyuc'il ke stranjer xjal. 20Tuj tcyakil tank'ibl xjal mya ba'n, nim yajbil in tzaj ti'j. Aju xjal in yajlan cye mastl, mya ma' tuj tk'ij. 21Bi'x in sec'paj tu'nju tk'ajk'ajel in tbi'n; aju k'ij mas ba'n ta' tna'n, atzun k'ij in che oc tzokpaj ke elek' ti'j. 22Minti' tumel tu'n ttzokpaj tuj klolj; banin tten jun spad ti'j tu'n tcub byo'n. 23C'ajbel t-ximlal te cychi' c'utz; bi'n tu'n mlay tzic'x ti'j tu'n tnaj. 24Oc ttzaj klolj nim cjawil xob, ctzajel nim tbis ex ctzajel baj tc'u'j, ic cyten jlu ic tza'n jun rey banin tten tu'n toc tzokpaj k'ojlel. 25Atzun jlu in baj ti'j ju xjal in jaw ti'n tib ti'j Dios, ex in jaw tniman tib twitz Dios aju at tipumal tu'n tbant tcyakil tu'n, 26nno'c tzokpaj ti'j Dios, ex tocx jun makbil tuj tk'ab te tcolbil tib. 27Puro gord ke tk'o'tx ax icx tc'u'j. 28Ke tnam jatum najl che bel xitj; cyjel cycolin xjal cyja ex nok tuj byujin che cyjel ten ke ttx'akan. 29Mlay tz'oc k'inun te ela' k'ij, ex mlay chmet tk'inumabl. 30Mlay tzokpaj tuj klolj. Ic c'oquel ic tza'n jun awal in tz'e'y t-xul tu'n k'ak' ex in xi ikan t-xmacal tu'n cyk'ik'. 31Mi'n tz'oc ke' tc'u'j ti'j ju nokx gan, katzun ma ke' tc'u'j ti'j, axte cbel sbu'n. 32Ic c'oquel ic tza'n jun tze' na'nxtok tpon tk'ijlalil cbel tzkij tk'ab ex mlay tzaj t-xul. 33Ic tten ic tza'n jun tk'ab uva mlay k'anax twitz, ic tza'n tze' olivo nne'l tz'ak t-xmacal. 34Ke xjal mya ba'n mlay tzaj cyiyjil, ex cbel tz'e'y cyja tu'n k'ak' tu'nju otok che k'inumax tu'n pwak mya tuj tumel nne'l cykanin cye xjal. 35Ke xjal lu in cub cyximan tu'n cybinchante mya ba'n, ex atzun in bant cyu'n. Ex nojni tuj cyanmi tu'n sbubl.

will be added

X\