1 Tcyakil jlu o wile cyu'n ke tbak' nwitze, o nbiye cyu'n ke nẍcyine, ex ma tz'el nnic'e ti'j. 2 Aju cyeye ba'n cyu'n, ax icx weye ba'n wu'ne; ex mya mas ch'in nnable cywitze. 3 Pero wajbile tu'n nyoline tuc'il Dios aju at tipumal tu'n tbant tcyakil tu'n, wajbile tu'n nyoline tuc'il tu'n nbinteye tiku'n ma tzaj jlu wi'je. 4 Cyeye nok in jaw cynic'ane yol; ic cytene ic tza'n jun doctor minti' jun xjal in banix tu'n. 5 Nokwit ba'n tu'n mi'n cyk'ajte, tu'n jlu jaculo che oc k'o'ne cyu'n xjal at cynable. 6 Cybinchame xtalbil, cybintze, cyk'o'nc cywi'ye ti'j yol cxel nmane te ncolbil wibe. 7 ¿Che chipetzune ka in che coline ti'j Dios tu'nju nic'aj yol in cyma'ne, ex ka in che ajbene te Dios tu'n cyyole te sbubl? 8 ¿Cyajpeye tu'n cyonine ti'j Dios ex tu'n cycoline ti'j? 9 ¿Ti jacu baj ka tajbil Dios tzic' twitz tuj cyanmiye? ¿Jacupe cub cysbu'ne Dios ic tza'n jun xjal? 10 Ka nok tten cyu'ne cyajbile tu'n cyonine ti'j, c'oquel tma'n Dios tibaj cywitze. 11 Oc che sec'pajtele tu'n tajwalil Dios ma'xix ex ctzajel cyxobile tu'n. 12 Tcyakil cyyole in cyma'ne minti' tajben, junx ta' ic tza'n tza'j; ex aju cycolbil cyibe mer ic tza'n jun muro tx'otx' minti' tipun. 13 Ja'lo mi'n che k'ajte oc chin yolile ka ma tzaj nok alcyex wi'je. 14 Cxel woyin nchwinklale tu'n ncyime. 15 Masque chin cub byo'ne tu'n Dios, o'cx chin ayole ti'j, o'cx waje tu'n toc nma'ne ncolbil wibe tecu. 16 Mya yajcu atzun ta' ju colbil weye, porque jun xjal mya ba'n mlayx tz'ocx max twitz Dios. 17 Cybincuye, cyk'o'nc cywi'ye ti'j tcyakilju cxel nchic'ba'ne. 18 Cxel nma'ne ju colbil wibe, ex ba'n wu'ne ax toc jlu. 19 Ka at jun ma tz'el tnic' ti'j ka at wile, jacu mi'n chin k'ajte ex jacu chin cyime. 20 K'ontza o'cx cabe nkanbetze, aya Nman Dios, ex mlay cub wewan wibe twitza. 21 Mi'n cucx ncub tc'ixbisa'na, ex mi'n tzaj tk'o'na nimxix t-xobil wi'je. 22 Chin ttxconxa ex cxel ntzak'we'ne; ex ka akine tu'n nyoline nej, atzun teya tu'n ttzaj ttzak'we'na. 23 K'mantza alcyetzun ke wile ex npaltile. ¿Alcyetzun ke mya ba'n o che bant wu'ne? 24 ¿Tiku'ntzun nne'l tewan tiba nwitze? ¿Tiku'n in tbincha'na wi'je ic tza'n ti'j jun aj k'oj? 25 Ic ntene ic tza'n jun t-xak tze' ikan tu'n cyk'ik', ¿tiku'n tajbila tu'n nnaje? Ic ntene ic tza'n tzkij ch'im, ¿tiku'n nno'c lpe'ya wi'je tu'n ntzyete tu'na? 26 In cub tk'o'na ncastiwoye nimxix ta'w, in tzaj tna'na aju mya ba'n o bant wu'ne tuj ncu'xumale. 27 Nno'c tc'alo'na nkane tu'n caden, toc twitza ti'j jatumchak in chin bete, ex toc twitza ti'j jatumchak tcublen nkane. 28 Niban tbaj k'ay nximlale ic tza'n jun tze' k'ayni, ex ic tza'n jun xbalun in baj tu'n poc', chi Job.
