JOB 12

1Xitzun ttzak'we'n Job ex tma: 2Ax toc o'cx akeye at cynable cyxol cycyakil xjal, ex oc cycyime minti' juntl at tnabl ic tza'n cyeye. 3Pero ax icx weye at nnable, ex mya mas ch'in nnable cywitze. ¿Alcye jun minti' ba'n tcyakil jlu tu'n? 4Nej in chin cubsane twitz Dios ex in chin tzaj tbi'n, atzun ja'lo in che tze'n ke wamiwoye wi'je masque minti' wile ex minti' npaltile. 5Aju xjal ba'n ta' nne'l tic'un aju myaxix ba'n ta'; minti' tbis ti'j tu'n t-xi tlamo'n aju cyja'tok tic' tz'ak. 6Ke xjal elek' at tzalajbil tuj cyja, keju cyc'i' che niman Dios txubtxaj in che ank'in, aju cyipumal nno'c cyk'o'n te cydios. 7Kaninxa cye txcup ex ka cye chyu'j; jacu tzaj xnak'tza'na cyu'n. 8Ax icx te tx'otx' ex ke cyiẍ ate' tuj mar, ba'n t-xi tkanina cye tu'n ttzaj xnak'tza'na cyu'n. 9¿Atpe jun na'nx tbinte ka tu'n tk'ab Dios o bant tcyakil? 10Tuj tk'ab Dios ta' cychwinklal cycyakil keju itz' twitz tx'otx', ax icx cyanmi cycyakil xjal. 11Aju ẍcyinbaj ba'n tu'n alcye t-xilen junjun yol, ic tza'n kc'o'n in tna'n ke tc'oc'jal. 12Ke tij xjal at cynabl; ax ju cyabk'iyil ma tzaj k'onte cynabl. 13Pero ate Dios at nim tnabl ex at nim tipumal, in cub t-ximan alcyechak taj, ex in japun tu'n. 14Aju in cub t-xitun Dios, mi a'l jun jacu jaw binchante juntl maj, aju ma tz'ocx tjpu'n Dios, mi a'l jun jacu tzokpinte te. 15Ka ma we' jbal tu'n, tcyakil ctzkijel; ka ma tzaj tzokpaj jbal tu'n, cnajel tx'otx'. 16Tu'n tipumal cbel ti'j tcyakil. Tuj tcwent Dios ta' ju xjal in cub sbu'n tuc'ix ju in sbun. 17Nne'l ti'n cynabl ke xjal k'ol nabl ex in tzpet cynabl ke cawil tu'n. 18Nne'l ti'n cyoclen ke rey ex in che'x ti'n pres. 19Nne'l ti'n cyoclen ke pal ex keju nim cyoclen. 20Ke k'ol nabl, akeju k'uklxix cyc'u'j xjal cyi'j, in che cyaj ten minti' cyyol, ex nne'l ti'n cyojtzkibl ke tij xjal. 21Nne'l tic'un ke xjal nim cyoclen, ex nne'l ti'n cyipun keju at cyipun. 22In tzaj ttx'olba'n aju cyximbetz xjal at tuj ewaj ex in cub tk'o'n tuj spic'un aju attok tuj klolj. 23In xi tk'o'n cyipun ke nasyon ex in che cub t-xitun, in che el t-sputun ex in che oc tchmo'n juntl maj. 24Nne'l ti'n cynabl ke nejenel cyuj ke tnam ex in che'x naj tu'n tuj jun lugar minti' cynajbil xjal tuj, minti' be tu'n tcnet cyu'n jatum tu'n cyxi', 25jatum nok xmacan in che bet tuj klolj, nok in tacpaje' cyic' ic tza'n c'al k'e'n.

will be added

X\