JOB 10

1Ma baj nganiye tu'n wank'ine. Cjawitz nma'ne tcyakil yajbil wi'je, ctzyetel nyoline tu'n tlaj ju ta'w in nna'ne tuj wanmiye. 2Aya Nman Dios, mi'n cub tk'o'na nsentense, k'mantza alcyetzun mya ba'n ma nbinchaye. 3Aya ch'isal weye, ¿ba'npetzun tu'n nyajlanjtze tu'na ex tu'n wel tic'una, ex atzun ti'j cyximbetz xjal mya ba'n tu'n tjaw tzalaja? 4¿Baka junx que'ybil cye ke ti'xti tuj twitza ic tza'n tuj cywitz ke xjal? 5¿Baka junx ta' tuj tk'ija ic tza'n tuj tk'ij jun xjal in cyim? 6¿Tiku'ntzun in jyona ti'j npaltile ex wile; 7masque ba'n tu'na minti' wile, ex mi a'l jun jacu clonte weye tuj tk'aba? 8Aya o binchante weye tu'nx tk'aba, ex atzun ja'lo tajbila tu'n nnaje tu'na. 9Na'ntza ti'j tx'otx' in cub tbincha'na: ¿Maj chin c'oqueltzun tk'o'na juntl maj te kuk? 10Tbinchaya nximlale ic tza'n in bant cyes ti'j lech oc tbaj ttzyun tib; 11tzaj tk'o'na nchibjale ex ntz'umile, baj tmojba'na ke nbakile ex ke nbotx'ile; 12tzaj tk'o'na nchwinklale, in chin tc'ujla'na, ex nok tu'nju cwentin kine tu'na, cucx itz'x kine ja'lo. 13Atzun ja'lo ma tz'el nnic'e ti'j, tuj tanmiya at jun t-ximbetza tuj ewaj ta': 14toc tcwenta wi'je, mya yajcu nbinchaye il tu'ntzun tcub tk'o'na nsentense ti'j wile. 15Ka at wile bec'bil nwitze; ex ka minti' wile ax icx mlay chin jaw tzalaje tu'n jlu; ma tzaj nch'ixwiye ex ma tzaj nim nbise tu'na. 16Ka ma jaw wi'n wipune tu'n nyoline, ctzajela wi'je ic tza'n jun balun tu'n ntzyete, ex in tbincha'na tbinchbena nim tipumal tu'n nnaje tu'na. 17Cucx in che pon ti'na ke testiw twitza k'malte mya ba'n wi'je; aju tk'oja wi'je cucx tch'iy; minti' in xi tcolina tu'n toc tzokpaja wi'je ic tza'n txkan soldad. 18¿Tiku'n tzaj tk'o'na ambil tu'n wul itz'je? Bi'xwit in cyime ex mi junwtlo oc que'yinte weye. 19In tzajxwitloye tuj talbil ntxu'ye ex bi'xwitlo in cu'x maku'ne, icwitlo tza'n minti' otok chin tene twitz tx'otx'. 20Tu'nju ch'in tuj nk'ije pa'mil tiba wi'je. Chin tk'oncja tu'n ntene ch'in tuj tzalajbil, 21na'nxtok tu'n nxi'ye tuj nbeye jatum mlay chin ajtz meltz'aje, tuj ju najbil jatum minti' spic'un, o'cx klolj at, 22tuj najbil o'cx kxopin at tuj ex minti' ttxolil, jatum junx ta' spic'un tuc'il klolj, chi Job.

will be added

X\