JEREMÍAS 9

1Nokwit jacu tz'oc nwi'ye ex ke tbak' nwitze ic tza'n jun twi a', tu'ntzun njaw ok'e k'ijl ex konic'an tu'n cylaj ke nxjalile ma che cyim. 2Nokwit jacu cnet jun tal nposadiye tuj lugar minti' cynajbil xjal tuj, tu'ntzun wel lak'e'ye najchak cyi'j ke nxjalile, porque cycyakil ma tz'el cypa'n cyib ti'j Dios, cycyakil jumajx mya ba'n ke. 3In che xo'n nic'aj yol cyi'j cyuc'il ic tza'n in che'x xo't plech tu'n xobl te. Tuj tnam lu o'cx in che yolin ti'j nic'aj yol, minti' in che yolin axix toc; mas il in cybincha'n junjun k'ij ex minti' nne'l cynic' wi'je. Akine Dios in chin k'mante jlu. 4Mi'n tz'oc ke' cyc'u'je cyi'j cyamiwoye ex mi ti'j cyermaniye, porque akeju cyerman cyib in sbun jun ti'j juntl ex akeju xjal cyamiw cyib in jaw cynic'an yol jun ti'j juntl. 5Teylex te junjun in sbun ti'j juntl, minti' jun in yolin axix toc; ma nak'et cytzi' tu'n cynic'an yol ex jumajx mya ba'n cybinchben. 6Chi Kman cyja': Puro nic'aj yol in cyma'n, cucx in che sbun ex minti' cyajbil tu'n tel cynic' wi'je. 7Cyja'tzun chi Kman aju Tajaw Tcyakil, in tma'n cyja': ¿Ti juntl cbantel wu'ne cyi'j ke xjal etzan wu'ne? Che oquex nk'o'ne tuj k'ak' tu'ntzun tel baj ttz'ilil cyi'j. 8Aju cytzi' ic tten ic tza'n jun plech ba'n biyun, nok nic'aj yol in cyma'n. In xi cyk'olbe'n ke cyuc'il tu'n cyc'ujlalil, pero nok tten cyu'n, porque nok tcu'x ti'j cyc'u'j tu'n cybinchante mya ba'n cyi'j. 9¿Mi'npetzun tzaj cycastiw wu'ne tu'n tlaj cybinchben lu? ¿Mi'npetzun txi nk'o'ne t-xel cybinchben xjal mya ba'n lu? Chi Kman. 10Chin ok'ele ex chin wuyile cyi'j ke witz ex cyi'j ke chk'ajlaj jatum in che wa'ntok wacẍ, porque ya minti' alumaj cyuj ex misicyer xjal in bet cyuj; ya minti' in che binjtz alumaj in che muyin; cyuc'ix ke chyu'j ex ke txcup ma che ex ok. 11Nok ttx'akan tnam Jerusalén cyjel buye' wu'ne ex te cynajbil wech c'oquel; misicyer jun ti'xti cyjel ten cyuj ke tnam ate' tuj tx'otx' Judá wu'ne, ex minti' xjal cyjel ten cyuj. 12¿Alcye jun at nimxix tnabl tu'n tel tnic' ti'j jlu? ¿Al e ma txi tyec'un Kman jlu tu'n tbant tchic'bante cye mastl? ¿Tiku'n ma naj tx'otx' ex ma tz'oc ic tza'n jun tzkij tx'otx' jatum misicyer jun in bet tuj? 13Atzunte Kman tzaj ttzak'we'n: Ma binchet tcyakil jlu porque ma cyaj cycolin aj Israel nleye, aju xi nk'o'ne cye; minti' ma chinx cyniman ex minti' ma japun nleye cyu'n. 14Nok o'cx ma cybincha aju cyex cyajbil ex ma che c'ulun cywitz ke tilbilal Baal, ic tza'n e tzaj xnak'tza'n cyu'n cyman. 15Cyja'tzun, akine Dios aju Tajaw Tcyakil ex Cydios aj Israel in xi nma'ne jlu: Cxel nk'o'ne cywa puro c'a ex cxel nk'o'ne cyc'a a' xi'yni venen tuj. 16Che bajel nsputune cyuj ke nasyon minti' ojtzki'n cyu'n mi cyu'n ke cyman, ex che xel nsama'ne ke soldad k'ojlel cyi'j ocxi cycub baj cycyakil. 17Ate Kman aju Tajaw Tcyakil in tma'n: Cyk'ontz cywi'ye ti'j jlu, cytxcontze ke xu'j o'cx cyak'un tu'n cyoc ten ok'el, tu'n cyul nej; cyi'ntze keju mejor che ok'. 18Ax toc, e cytzaj naj tu'n cyoc ten ok'el ki'j; e tel nim ta'l kwitz cyu'n ex e tbaj noj ttxo'w kwitz tu'n ta'l kwitz. 19In binjtz tk'ajk'ajel ok'el tuj tnam Sión: Ay, ma ko naj. Nim kch'ixwi ma tzaj. Il ti'j tu'n tcyaj kcolin ktanmi porque ma che baj naj ke kja, che chi xjal. 20Akeye xu'j, cybintze aju tyol Kman, cyk'ontz cywi'ye ti'j ju in tma'n: Cyxnak'tzanxe ke cyale xu'j tu'n tbant cyok', atzun cye ke cyuc'ile xu'j tu'n cywuyin. 21Porque ma tz'ocx camic ttzi tventanil kja ex ma tz'ocpun tuj knajbil, tu'n cybaj naj ke c'wa'l ate' cyuj cay ex ke cu'xun ate' cyuj plas. 22Aju cyximlal cyimni ma che cyaj pale' ic tza'n cytxa' alumaj tuj cojbil, ex ic tza'n junjun che'l triw in cyaj tz'ak tu'nju chmolte, ex mi a'l jun in jaw sc'onte. A Kman in k'mante jlu. 23Chi Kman: Mi'n jaw tniman tib ju xjal at nabl, tu'nju at tnabl, mi ju at nim tipun tu'nju at nim tipun, ex mi ju k'inun tu'nju at tk'inumabl. 24Ka at jun taj tu'n tjaw tniman tib, e tjaw tniman tib tu'nju ojtzki'n kine tu'n ex ma tz'el tnic' wi'je, ka akine Dios in nbincha'ne tcyakil tu'n nc'ujlalile, tuj tumelxix ex tz'aklxix, porque atzun jlu in chin tzalaje ti'j. Akine Dios in chin k'mante jlu. 25Akine Dios in chin k'mante jlu: Tzul tk'ijlalil tu'n tcub cycastiw wu'ne cycyakil keju sircunsidarimaj ke ex keju mya sircunsidarimaj, 26ic tza'n ke aj Ejipt, aj Judá, aj Edom, aj Amón, aj Moab, ex cycyakil keju najl tuj tzkij tx'otx' ex nne'l cymatzo'n ttzmal cywi' ttxlaj cyẍcyin, porque cycyakil nasyon lu, mya sircunsidarimaj ke pero ax icx cycyakil aj Israel mer ic tza'n mya sircunsidarimaj ke, porque minti' ma japun cyu'n aju yol cyaj bant ti'j wu'ne cyuc'il.

will be added

X\