JEREMÍAS 7

1Tzajtzun yolin Kman tuc'il Jeremías ex tma cyja': 2Tencuya ttzi ja te c'ulbil ex atzun chic'banxa tkanil lu: Cycyakile akeye aj Judá in che octze ttzi ja lu tu'n cyc'ulune te Kman, cybintze tkanil lu 3tu'n Kman aju Tajaw Tcyakil, aju Cydios aj Israel: Cych'expume cybinchbene ex cybinchame ba'n, tu'ntzun cucx tu'n cyank'intle twitz tx'otx' lu. 4Mi'n tz'oc ke' cyc'u'je cyi'j keju in che cub sbunte cyeye ex in cyma'n: Lu tja Kman lu, lu tja Kman lu, lu tja Kman lu. 5Ka ax toc ma ch'expet cymodiye ex cybinchbene, ka ma che oque tz'aklxix jun tuc'il juntl, 6ka mi ma che oc tene yajlal cye stranjer xjal, ex ke c'wa'l minti' cyman ex cytxu', ex ke meba xu'j, ex ka mi'n ma cub cybyo'ne ke xjal minti' cyil tuj lugar lu, ex ka mi'n ma che c'ulune cywitz junxitl dios aju ctzajel mya ba'n cyibaje tu'n cylaj, 7octzun che cyjel nk'o'ne tu'n cucx cyank'intle twitz tx'otx' lu, aju xi nk'o'ne cye ktzan cyxe'chele te jumajx. 8Nim in ke' cyc'u'je cyi'j ke yol te sbubl, akeju minti' cyajben. 9In che elk'ane, in che byone xjal, in cybincha'ne aj pajil, in xi cyma'ne jun yol ax toc twitz Kman pero nok tten cyu'ne, in cub cypatune storac twitz Baal, ex in che c'ulune cywitz junxitl dios minti' ojtzkin cyu'ne, 10ex te tibajxi in che ule tuj njaye lu, aju o'cx at tajben te c'ulbil weye, ex in cyma'ne: Minti' bis ki'je, ba'n tu'n kbinchanteye nok alcye kajbile. 11¿Apetzun tajben njaye te tja elek' tuj cywitze? Ma wile tcyakilju in cybincha'ne. Akine Dios in chin k'mante jlu. 12Cyxi'ye tuj Silo, aju tnejel lugar jaw nsc'o'ne tu'n ttzaj na'n nbiye tuj, bixtzun cyile ti o baj ti'j wu'ne tu'n tlaj cybinchben aj Israel mya ba'n, akeju etzan wu'ne. 13Chi Kman in tma'n: Masque ela'xi maj txi nma'ne cyeye ti'j cytene mya ba'n, pero minti' in chinx cynimane; in chin txocone cyi'je, pero minti'x in chin tzaj cytzak'we'ne. 14Cyja'tzun, aju o bant wu'ne ti'j lugar Silo, axtzun cbantel wu'ne ti'j ju ja lu, aju pa'maj o'cx tu'n tajben te c'ulbil weye, aju xi nk'o'ne cyeye ex cye ke cyxe'chele, ex aju k'ukl cyc'u'je ti'j. 15Che ic'el nlajo'ne nwitze ic tza'n e jic' nlajo'ne ke cyermaniye, ke tiyjil Efraín. 16Chi Kman tzaj tma'n te Jeremías: Mi'n na'na Dios ti'j tnam lu, mi'n cubsana nwitze ex mi'n tzaj yolina weye cyi'j. Mi'n cucx tzaj tkanina weye, porque mlay tzaj nbi'ntle. 17¿Minti'petzun nno'c tque'yina aju in cybincha'n aj Judá cyuj cytanmi ex cyuj cay te Jerusalén? 18Ke cyc'wa'l in che chmon si', ke mambaj in cub cyk'o'n k'ak' ex ke xu'j in che xyok'in tk'otjil pan, tu'n t-xi cyk'o'n pan te cydios aju toc tbi “Xu'j Rey te Tuj Cya'j”, ex in xi cyk'o'n vin te oyaj cye junxitl dios, nok tu'n ttzaj nk'oje cyi'j. 19Baka wi'je in cybincha'n mya ba'n, cyi'jx in cybincha'n mya ba'n lu, cyu'nx in cub cyk'o'n cych'ixwi. Akine Dios in chin k'mante jlu. 20Tu'ntzun jlu tzul nim ntx'u'jile ti'j lugar lu ex cyibaj ke xjal, ax icx cyi'j ke alumaj, cyi'j ke tze' ate' tuj cojbil ex ti'j awal. Ic c'oquel nk'oje ic tza'n jun k'ak' mlay yupj. Akine Dios in chin k'mante jlu. 21Ate Kman aju Tajaw Tcyakil, aju Cydios aj Israel in tma'n cyja': Cypatun cube nok jte'x alumaj cyaje ex nok jte'x chojbil, ex cychyo'nxe cychibjal. 22Tej cyetz wi'ne ke cyxe'chele tuj Ejipt minti' xi nma'ne cye tu'n tcub cypatun alumaj tibaj altar, ex mi tu'n ttzaj cyk'o'n chojbil weye. 23Aju weye xi nma'ne cye, tu'n tbant cyniman weye tu'ntzun woque te Cydios, atzun cye tu'n cyoc te jun tnam etzan wu'ne. Ax icx xi nma'ne cye tu'n tjapun cyu'n aju xi nma'ne, tu'ntzun tel ba'n te cye. 24Pero minti' e niman weye ex minti' tzaj cyk'o'n cywi' ti'j nyole. Nok o'cx o cybincha mya ba'n tu'nju puro cyuw cyanmi. Minti' e ajtz meltz'aj wuc'ile, nok ttzal cyi'j ajtz cyk'o'n nwitze. 25Atxix tej cyetz ke cyxe'chele tuj Ejipt, ax icx ja'lo, cucx ma che tzaj nsama'ne ke nmajene cyuc'il, akeju nsanjele. 26Atzun cye minti' ma chinx cyniman ex minti' ma tzaj cyk'o'n cywi' ti'j nyole, nok o'cx ma cub cycyuwsa'n cyanmi, mas nim mya ba'n ma cybincha ic tza'n cybincha ktzan cyxe'chel. 27K'manxa tcyakil jlu cye masque mi'n tzaj cyk'o'n cywi' ti'ja; che txcontza masque mi'n tzaj tzak'we'na cyu'n. 28K'manxa cye: Atzun ke xjal lu miban che niman te Kman aju Cydios, ex mi'n cyaj tu'n cycawinjtz. Te jumajx ma tzic' tna'l cyu'n tu'n cyyolin ax toc. 29Akeye aj Jerusalén, cymatzo'n el ttzmal cywi'ye ex cyxo'mixe. Cybitzanxe jun bitz bisbajil cywi' ke tal witz tz'la'j cyi'j, porque in k'ojl Kman cyi'je, ma che cyaj coline ex ma che el ic'une tu'n. 30Chi Kman in tma'n: Ma cybincha aj Judá mya ba'n nwitze, ma tz'ocx cyk'o'n ke tilbilal mastl dios puro ic'bil ke tuj ja o'cx at tu'n tajben te c'ulbil weye, ex ma tz'oc cyk'o'n njaye xjan te minti' tajben. 31Ma jaw cybincha'n jun altar Tofet tbi tuj chk'ajlaj Ben-hinom, tu'n tcub cypatun ke tal cycy'ajal ex ke tal cyme'jel; a jlu minti' o txi nma'ne cye tu'n tbant cyu'n ex minti'lpe ul tuj nximbetze icju. 32Cyja'tzun chi Kman: Tzul tk'ijlalil tu'n mi'ntl toc k'ma'n Tofet tbi ju lugar lu ex mi lugar Ben-hinom, nok o'cx Chk'ajlaj te Biybil c'oquel tbi. Ex ax tuj lugar Tofet che belex makut ke cyimni tu'n tlaj minti' juntl lugar. 33Aju cyximlal ke cyimni lu c'ajbel te cychi' c'utz ex te cychi' txcup, ex mi a'l jun cxel sec'punte cye ti'j cychi'. 34Bi'x che bel naj ke bitz te ic'sbil k'ij wu'ne cyuj ke tnam ate' tuj Judá ex cyuj ke cay te Jerusalén, cyuc'ix ke bitz te tzalajbil ex ke bitz te casamyent; enter tnam cyjel ten mer ic tza'n jun tzkij tx'otx' minti' xjal tuj.

will be added

X\