1 Chi Kman cyja': Ctzajel nsama'ne jun cyk'ik' cyuwxix wen te xitbil te tnam Babilonia, ex tu'n cynaj ke xjal najl tuj, akeju aj k'oj wi'je. 2 Che tzajel nsama'ne xjal te najchak, tu'n t-xi cyi'n tcyakil ju at tuj tnam Babilonia ic tza'n in xi tikan cyk'ik' ttxc'omil triw, ex minti' xjal mi ti'xti cyjel ten tuj. Oc tpon tk'ijlalil tu'n cynaj, che oquel tzokpaj aj k'oj cyi'j tuj tcyakil part. 3 Cyxkinin ele xobl plech, akeye ba'n che xo'ne plech, cyk'o'nque c'uxbil cyi'je aju in ajben tuj k'oj. Mi'n tzaj k'ak'an cyc'u'je cyi'j ke cu'xun ate' tuj Babilonia, cybyoncuye cycyakil ke soldad. 4 Cyuj cycyakil tnam cye aj Caldey che bajel xayu'n xjal tu'n lans ex che cyjel pale' cyuj cay cyimni ke. 5 Na'nx cycyaj ncoline aj Israel ex aj Judá, akine Dios aju Tajaw Tcyakil, masque ma noj tuj cytanmi tu'n il ex masque o che binchan il nwitze, akine Dios xjan cye aj Israel. 6 Cyex oke tuj Babilonia, cyclom cyibe alcye jacu bant tclonte tib, tu'ntzun mi'n cycyime tu'n tlaj cyil aj Babilonia. Ma pon tk'ijlalil tu'n t-xelin tu'n Kman ti'j cybinchben mya ba'n ex tu'n tcub cycastiw ic tza'nx cybinchben. 7 Ic tten Babilonia tuj nk'abe ic tza'n jun tal copa k'an pwak ttx'otx'il tcu'x vin tuj, in chyo'n cywi' cycyakil xjal twitz tx'otx' tu'n, cyja'tzun bi'x tzacj cynabl xjal najl cyuj cycyakil nasyon, akeju xi cyc'a'n vin lu. 8 Te jurat naj ma cub tz'ak tnam Babilonia ex bi'x ma baj xitj. Cyoc tene ok'el ti'j, cyi'ntze remey te k'anbil te ẍil ti'j, aver ka jacu banix. 9 Ma tz'oc kk'o'ne remey ti'j Babilonia pero minti' ma banix, cycolin cyaje, ko ex tzalu, cu taj teylex te junjun tuj ttanmi, porque ma'xix ju tcastiw ma cub ex bi'x ma naj te jumajx. 10 Ma txi tbincha'n Kman ki'j; chux keye, ko' k'malte tuj tnam Sión aju ma tbincha Kman aju Kdios. 11 Ma cub t-ximan Kman tu'n tcub t-xitun tnam Babilonia, ex ma txi tma'n cye ke rey te tnam Media tu'n cyk'ojin ti'j tu'ntzun t-xelin tu'n Kman cyi'j, ex tu'n t-xelin tu'n ti'j ju o cybincha ti'j tja. Cyjaku'n baje cywi' ke plech ex cytzyume ke makbil in che ajben tuj k'oj, 12 Cyyec'un jawe bander tu'n cyoc tzokpaje ti'j muro toc ti'jele tnam Babilonia, cyk'oncuye mas nim cyajlal soldad, cyk'oncuye txkan soldad te xk'ukil, ex cycub ten txkantl tuj ewaj nok list cyten, porque cbantel tu'n Kman aju o cub t-ximan tu'n tbinchante cyi'j ke xjal najl tuj tnam Babilonia. 13 Aya tnam Babilonia tcuba cyxol ke nima matijxix ex nimxix tk'inumabla at, ya ma pon k'ij tu'n tnaja, ma pon baj k'ij tu'n ttena. 14 Ate Kman aju Tajaw Tcyakil ma txi tma'n jun yol axix toc tu'nx tib: Che ul nim aj k'oj ti'ja wu'ne ic tza'n cybaj ẍplon, ex cxel cybitzan bitz te cambabl ti'ja. 15 Tu'n tipumal Kman o bant tx'otx', tu'n tnabl cub tk'o'n tk'ukbil ex tu'n tojtzkibl xi tlic'pu'n cya'j. 16 Oc tk'ajt Dios in tzaj julin a' twitz cya'j, in tzaj ti'n muj tuj ttxa'npun enter tx'otx' tu'n tjapun twitz cya'j, in tzaj koptz'aj tkan k'ancyok tu'n tuj tmijil tkan jbal ex nne'tz ti'n cyk'ik' jatum c'u'n tu'n. 17 Cycyakil xjal minti' cynabl ex minti' nne'l cynic' ti'j. Ctzajel cych'ixwi keju in che cub binchante tilbilal tu'n toc cydiosin, tu'nju puro sbul ke tilbilal ex mya itz' ke. 18 Nokx gan ke ex minti' cyajben; oc tpon tk'ijlalil tu'n ttzaj jwisi tu'n Kman, che najel. 19 Mya ic tten aju Tdios Jacob, aju binchante tcyakil aju at. Acu jaw sc'onte cye aj Israel te jun tetzbil, ex atzun tbi jlu, Kman Tajaw Tcyakil. 20 Aya tnam Babilonia ic ttena tuj nk'abe ic tza'n jun martiy, ex ic tza'n ke nmacbile in che ajben tuj k'oj, ajbena wu'ne tu'n cycub xitj ke nasyon ex ke cawbil. 21 Ajbena wu'ne tu'n cynaj ke chej, cyuc'ix ke xjal cyjax cyibaj, cyuc'ix ke carwaj ex ke yucul cye. 22 Ajbena wu'ne tu'n cynaj ke xinak ex ke xu'j, ke tij xjal ex ke k'a, ke cu'xun ex ke k'apoj, 23 ajbena wu'ne tu'n cynaj ke pastor cyuc'ix ke cyẍne'l, ke ch'oquil tx'otx' cyuc'ix ke cywacẍ, ke cawil ex ke xjal at cyoclen cytxlaj. 24 Pero cywitzxe cbel nk'o'ne tcastiw tnam Babilonia ex cycyakil aj Caldey, tu'n tlaj tcyakil mya ba'n cybincha ti'j tnam Sión. Akine Dios in chin k'mante jlu. 25 Aj k'oj kine ti'ja aya tnam Babilonia. Ic ttena ic tza'n jun witz xitul tcyakil. Ma baj t-xituna tcyakil twitz tx'otx'. Akine Dios cxel nma'ne jlu: Cxel nnukpi'ne nk'abe tu'n tcub tcastiwoya wu'ne, ctzajel ntolina twitz jun pic ma' twa'l ex c'oquela wu'ne ic tza'n jun witz otok baj tz'e'y. 26 Mi jun abj ctzajel k'i'n ti'j ttx'akan tnam Babilonia tu'n cyjaw binchet ke ja juntl maj tzalu, te jumajx c'oquel tnam te tzkij tx'otx'. Akine Dios in chin k'mante jlu. 27 Cyyec'un jawe bander twitz cya'j, cyk'ajtzan oque chun cyuj ke nasyon, cybinchame cyten ke nasyon tu'n cyoc tzokpaj k'ojlel ti'j tnam Babilonia, cychmon oque ke nasyon Ararat, Mini ex Askenaz tu'n cyoc tzokpaj ti'j, cyk'o'nque jun nejenel tu'n tcub nej tuj k'oj. Che ojkelinx ke chej cyu'ne ic tza'n in che'x lipan ke ẍplon nimxix cyajlal. 28 Cybinchame cyten ke nasyon tu'n cyoc tzokpaj ti'j; akeju rey te Media cyuc'ix ke gobernador ex ke nejenel at cyxol ex cycyakil ke xjal jatum in che cawin. 29 Ma tzaj lu'lun tx'otx' ex in yucch wen, porque ma japun tu'n Kman aju ximamaj tu'n ti'j Babilonia, tu'n toc te jun lugar tzkij tx'otx' minti' xjal tuj. 30 Ke soldad te Babilonia ma txi cycolin tu'n cyk'ojin ex ma tz'ocx cylamon cyib cyuj ke ja te cycolbil cyib, ya minti'tl cyipun, ma che oc ic tza'n ke xu'j. Ma tz'oc k'o'n tk'ak'al cyja ex ma che baj piẍj ke pasador toc cyi'j tlamel tnam. 31 Tcyakil ttxa'nile tnam in che tzaj ke sanjel k'malte tkanil te rey te Babilonia ka otok cub ti'j enter tnam. 32 Ma che tzyet ke xajbil a' cyu'n aj k'oj, ma tz'oc cyk'o'n tk'ak'al tkan ajlaj in ch'iy tuj soban ex ma tzaj nim cyxobil ke soldad te Babilonia. 33 Porque ate Kman aju Tajaw Tcyakil ex Cydios aj Israel in tma'n cyja': Ic tten Babilonia ic tza'n jun pe'n jatum in cub wabat triw tu'n tel ttxc'omil, ex ch'ix tul canun tk'ijlalil tu'n toc chmet twitz awal. 34 Che chi aj Jerusalén, akeju najl tuj tnam Sión: Ma ko baj tpaẍu'n Nabucodonosor aju rey te Babilonia, ex ma ko'x tchyo'n; ma ko cyaj tk'o'n ic tza'n jun lak minti' tuj. Ic tten ic tza'n jun nintz txcup, ma ko'x tbalk'u'n, ma noj tc'u'j tu'n kk'inumabl ma tz'el ti'n ke ex ma ko etz tlajo'n tuj ktanmi. E t-xi cychjo'n aj Babilonia aju mya ba'n o cybincha ki'j ex e t-xi cychjo'n aj Caldey tu'nju nim xjal cub cybyo'n. 36 Chi Kman cyja': Akine chin xel binchante cyi'je, cxelil wu'ne cyi'j aj k'oj cyi'je, bi'x che ajel tzkij ke nima wu'ne ex ke twi a' at tuj Babilonia. 37 Nok ttx'akan tnam Babilonia cyjel ten; te cynajbil xo'j c'oquel ex minti' xjal cnajal tuj. Cycyakil xjal che jawil sec'paj ti'j ex che xmayil ti'j. 38 Cycyakil aj Babilonia che jawil wuyin ic tza'n ke balun, ex che jawil tzanun ic tza'n ke tal balun. 39 Octzun ttzaj el cyc'u'j wen, cbel nk'o'ne jun nintz wa'n cywitz tuc'ix cyc'a vin tu'ntzun cytzalaj ex tu'n tchyo'n cywi'; entons ctzajel cywatl ex mi'n tzul cynabl te jumajx. Akine Dios in chin k'mante jlu. 40 Che xel wi'ne ic tza'n in che'x k'i'n ke tal ẍne'l, ke tman chip ex ke tman ẍne'l tuj biybil cye. 41 Ma cub xitj ex ma cub ti'j tnam Babilonia aju puro ba'n yolbilte tuj tcyakil twitz tx'otx'. Bi'x in che jaw sec'paj ke nasyon oc cylonte aju otok baj ti'j. 42 Ma tz'ocx mar tuj tnam Babilonia ex ma cyaj mulk'aj tjak' a'. 43 Ke tnam at tuj tcwent ma che oc te jun tzkij tx'otx' xobajilxix, jun tx'otx' jumajx tzkij jatum mi jun xjal cnajal tuj, ex milpe jun xjal tu'n tten nok ch'in tuj. 44 Cbel tcastiw Bel wu'ne, aju tilbilal cydios xjal at tuj Babilonia, c'elel wi'ne te tcyakilju otok tz'el ti'n cye xjal nej, ex mlayx che pon juntl maj ke xjal te mastl nasyon tuj. Cbel xitj muro toc ti'jele tnam Babilonia. 45 Cyetze tuj tnam Babilonia akeye xjal etzan wu'ne, ex teylex te junjun clom tib tu'n mi'n tcyim, porque nimxix ntx'u'jile ma tzaj. 46 Mi'n che jaw sec'paje ex mi'n tzaj cyxobile tu'nju yol in bet cyxol xjal tuj tx'otx' lu; junxitl tten yol in bet cyxol xjal junjun abk'i, at yol ka in che k'ojin xjal tuj tnam ex ka in che k'ojin ke cawil cyxolx. 47 Cyja'tzun tzul tk'ijlalil che bajel nxitune ke tilbilal ate' tuj Babilonia. Ctzajel tch'ixwi tcyakil tx'otx' Babilonia ex cycyakil cyimni che bel pale' tuj tnam. 48 Che tzalajel cya'j ex tx'otx' tuc'ix tcyakilju at cywitz oc tcub xitj tnam Babilonia, porque tuj tx'otx' tuj tbank'ab k'ij che tzajel aj k'oj xitul te. Akine Dios in chin k'mante jlu. 49 Cbel xitj tnam Babilonia tu'n tlaj tcublen cybyo'n aj Babilonia ke aj Israel ex tu'n cylaj ke xjal cub cybyo'n tuj enter twitz tx'otx'. 50 Cyel oke ex mi'n che we'ye akeye ma che tzokpaj ex minti' ma che cyime; che ximane ti'j Kman oc cylak'e'ye najchak ex cyna'ntze tnam Jerusalén. 51 Cyeye in cyma'ne cyja': Ma tzaj kch'ixwiye tu'nju in che yasun xjal ki'je, nimxix kch'ixwiye ma tzaj, porque ma che ocx stranjer xjal cyuj Lugar Xjan te tja Kman, che chiye. 52 Cyja'tzun chi Kman cyja': Tzul tk'ijlalil che bajel nxitune ke tilbilal ate' tuj Babilonia, ex tuj tcyakil tx'otx' te Babilonia che ayayal xjal tu'n ẍil toc cyi'j. 53 Masque che jax aj Babilonia max twitz cya'j tu'n tjaw cybincha'n ke ja ma' cywa'l te cycolbil cyib, pero che xel nsama'ne aj k'oj cyi'j tu'n cybaj xitun. Akine Dios in chin k'mante jlu. 54 Cybinxe tk'ajk'ajel cywi xjal tuj Babilonia in che sch'in tu'n ta'w c'ixc'oj ex in che wuyin tuj tx'otx' cye aj Caldey, 55 porque ma cub xitun tnam Babilonia tu'n Kman ex bi'x ma we' tk'ajk'ajel cywi xjal tuj tnam. Ic cyten aj k'oj cyi'j ic tza'n mar in pulin wen. 56 Ma che ul aj k'oj xitulte tnam Babilonia, ma che tzyet ke soldad cyu'n ex ma baj cytokin ke cyxobl plech. Porque in cub tk'o'n Kman Dios cycastiw xjal ic tza'nx cybinchben. 57 Ate Rey, aju toc tbi Kman Tajaw Tcyakil, in tma'n cyja': Cchyo'l cywi' ke nejenel te Babilonia wu'ne, icx ke aj nabl ex ke cawil at cyxol, cyuc'ix ke xjal ma' cyoclen ex ke soldad, ex oc ttzaj cywatl, ya mi'n tzul cynabl te jumajx. 58 Akine Dios aju Tajaw Tcyakil in nma'ne jlu: Che bel xitj cycyakil muro ma' cywitz toc ti'j tnam Babilonia ex c'oquel cyk'ak'al ke tlamel tnam ma' cywa'l; nokx gan otok che ak'nan tnam xjal ex otok che sict ke nasyon ti'j ak'untl lu, nok tu'n tajben te twa k'ak'. 59 Tuj tcyajin abk'i ttzyetlen tcawin Sedequías aju rey te Judá, xi t-sama'n Jeremías jun tkanil tu'n t-xi ti'n Seraías aju tcy'ajal Nerías ex tal tchman Maasías, tej t-xi' tuj Babilonia tuc'il rey Sedequías, como atzun Seraías binchalte ti'j jatum tu'n ttan rey Sedequías. 60 Cu'xtzun ttz'iban Jeremías tuj jun libro tcyakil tkanil ti'j c'ixbisabl attok ttzajel tibaj tnam Babilonia ex tcyakilju k'mamaj ti'j tnam lu. 61 Ex xi tma'n Jeremías te Seraías cyja': Oc tpona tuj tnam Babilonia, nok tzic' tna'l tu'na tu'n tjaw t-sch'i'na tcyakil tkanil lu. 62 Ex cxel tma'na cyja': Aya Nman, o tmaya tu'n tcub t-xituna lugar lu ex mi jun cyjel ank'in tuj, mi ke xjal ex mi ke alumaj, porque c'oquel tu'na te tzkij tx'otx' te jumajx. 63 Octzun tbaj t-sch'i'na libro lu, c'alo'nca ti'j jun abj ex xo'nxa tuj nima Éufrates, 64 ex bix txi tma'na cyja': Cyja'xtzun cyjel mulk'aj tnam Babilonia tjak' a', ex mlay jaw binchet juntl maj tuj xitbilte ctzajel t-sama'n Kman. Ke xjal najl tuj bi'x che najel. Atzun in pon baj ke tyol Jeremías tzalu.
