JEREMÍAS 50

1Atzun tkanil lu tzaj tma'n Kman te Jeremías ti'j tnam Babilonia aju tnam cye aj Caldey: 2Cymanxe tkanil ti'j jlu, cychic'banxe cye nasyon, cyi'n jawe jun techal twitz cya'j tu'n tyec'unjtz tkanil lu, mi'n cub cyewane, cymanxe cyja': Ma cub ti'j Babilonia, ma tzaj tch'ixwi cydios xjal, Bel tbi, ex ma tzaj t-xobil cydios xjal, Merodac tbi, ma tzaj cych'ixwi ex cyxobil ke tilbilal nno'c cydiosin. 3Porque tuj tx'otx' tuj tbank'ab k'ij in ojkelan ttzaj jun nasyon tu'n toc tzokpaj ti'j, ex c'oquel Babilonia tu'n te jun tzkij tx'otx'. Mi jun cpol najal juntl maj tuj, mi xjal ex mi alumaj, porque cycyakil che elex ok. 4Chi Kman: Tuj tk'ijlalil tzul che tzajel aj Israel ex aj Judá in che ok' wen jyolte weye, akine Cyman ex Cydios. 5Cxel cykanin alcye be in xi' tuj tnam Sión, ex atzun che xe'l in cyma'n cyja': Ko'ke tuc'il Kman, kjunan oc kib tuc'il tu'n tbant ti'j jun kyol tuc'il te jumajx, aju mlayx tzic' tna'njtz ku'n, che chi. 6Ke xjal etzan wu'ne ic cyten ic tza'n ke ẍne'l tzpetni ke; ma che el tzpet ti'j cybe cyu'n ke pastoril cye ex ma che cyaj colin twi witz. Nok cyja' cyic' twi' junjun witz ex ma tzic' tna'l cype'n cyu'n. 7Cycyakil aj k'oj e oc noj cyi'j bi'x e je'x chyo'n cyu'n, ex cyma aj k'oj cyja': Mya ako'ye at kile, porque ma che binchan il twitz Cydios aju tz'aklxix, aju oc ke' cyc'u'j ktzan cyxe'chel ti'j. 8Cyetz oke tuj tnam Babilonia, cyetze tuj cytx'otx' aj Caldey, cyoque ic tza'n ke tman chip in che cub nej cywitz ke ẍne'l. 9Porque ctzajel nsama'ne nimcu c'loj soldad tuj tx'otx' tuj tbank'ab k'ij, mojl cyyol tu'n cyoc tzokpaj ti'j tnam Babilonia, cbajel cytxolban cyib ti'j ex cbel ti'j cyu'n. Akeju k'ojlel lu nim cynabl, oc t-xi cyxo'n plech minti' in txalpuj ch'in cyk'ab. 10Cxel cyi'n aju at cye aj Caldey, cxel cyi'n tcyakilju in pon cyc'u'j ti'j. Akine Dios in chin k'mante jlu. 11Akeye aj Caldey e oque elek' ti'j ju at cye ke xjal etzan wu'ne, e jaw tzalaje nimxix, e jaw t'icpaje ic tza'n jun tal vac tuj cha'x c'ul, ex e jaw wijine ic tza'n ke chej. 12Pero ctzajel tch'ixwi cytanmiye jatum e itz'je, ex c'oquel te mas ch'in toclen cyxol mastl nasyon. C'oquel te tzkij tx'otx', puro tz'la'j cyjel ten ex mi jun xjal cnajal tuj. 13Mi a'l jun xjal cyjel ten tuj tu'n tlaj tk'oj Kman ti'j; o'cx c'oquel tcyakil te jun tzkij tx'otx'. Cycyakil keju che ic'el bet tuj, che jawil sec'paj ti'j ex che xmayil ti'j oc cylonte aju castiw otok tzaj cyibaj. 14Cybincham cytene akeye k'i'n xobl plech cyu'ne, cytxolin baj cyibe ti'jele tnam Babilonia. Mi'n tzaj cylasmiye cyi'j plech, cyxo'nxe cycyakil plech cyi'j, porque o che binchan il twitz Dios. 15Che sch'ine ti'jele oc cyoc tzokpaje ti'j. Ma txi cyk'on cyib aj Babilonia tuj cycwente, ma che cub xitj ke ja ma' cywa'l te cycolbil cyib, ma che cub xitj ke muro toc ti'jele tnam, porque atzun k'ij lu ma xelin tu'n Kman ti'j cybinchben mya ba'n; e t-xelin cyu'ne cyi'j, cybinchame cyi'j ic tza'n cye o cybincha cyi'j mastl tnam. 16Mi'n cyaj cyk'o'ne jun xjal tuj Babilonia tu'n tcub tk'o'n tawal ex ka tu'n tjaw tchmo'n twitz. Oc cylonte xjal akeju otok che pon k'i'n pres tuj Babilonia, oc tcub xitj tnam tu'n tlaj k'oj, che ajel meltz'aj tuj cytanmi, teyle junjun c'ajel ok tuj ttanmi jatum tzajni. 17Ic cyten aj Israel ic tza'n jun pe'n ẍne'l tzpetni ke, ma che baj sputj cyu'n balun. Nej ma che'x chyo'n tu'n rey te Asiria, te tibajxi ma baj tokin cybakil tu'n Nabucodonosor aju rey te Babilonia. 18Cyja'tzun akine Dios aju Tajaw Tcyakil ex Cydios aj Israel cxel nma'ne jlu: Cbel tcastiw rey te Babilonia wu'ne, cyuc'ix ke tnam in cawin cyibaj, ic tza'n o nbinchaye ti'j rey te Asiria. 19Che pol meltz'aj juntl maj aj Israel tuj cytx'otx' wu'ne, ic che oquel ic tza'n ke ẍne'l, ctel nim cywa twi witz Carmelo, tuj tx'otx' Basán, tuj tiwitz tx'otx' cye aj Efraín ex tuj Galaad, ex cnojel cyc'u'j wu'ne. 20Akine Dios cxel nma'ne jlu: Tuj tk'ijlalil tzul cbajel jyet cyil aj Israel ex aj Judá pero mlay cnet, porque cbel nnajsa'ne cyil keju otok che cyaj ank'in. 21Cyoc tzokpaje cyi'j xjal najl tuj tx'otx' Merataim ex cyi'j keju najl tuj tx'otx' Pecod, cyoc tzokpaje cyi'j ex che cybyoncuye. Cybinchame tcyakil ic tza'nx ma txi nma'ne cyeye. Akine Dios in chin k'mante jlu. 22In binjtz tk'ajk'ajel k'oj tuj tx'otx' ex ma tzaj jun matij xitbil. 23Ic tten Babilonia ic tza'n jun martiy, o che baj c'ixbisa'n cycyakil nasyon tu'n, pero ma cub tokj ex ma cub buchj. Ma che jaw sec'paj cycyakil nasyon tej ma cyil aju ma baj ti'j Babilonia. 24Ma cub nk'o'ne jun c'obil ti'ja aya Babilonia, ex minti' ma tna'ya ma cub tz'aka tuj. Ma tzyeta tu'n porque ma jaw ti'n tiba wi'je, akine Dios. 25Ma jaket tja Kman jatum c'u'n ke tmacbil in che ajben tuj k'oj, ex ma che etz ti'n tu'n cyajben te tu'nju at ttx'u'jil, porque at jun ttarey Kman aju Tajaw Tcyakil tu'n tbant tuj nasyon cye aj Caldey. 26Cytzaje tuj tcyakil part tu'n cyoc tzokpaje cyi'j, cyjako'ncxe cytx'utx', cychmon baje tcyakil ti'xti at tuj tnam ex cyxitun baje; mi jun tu'n tcyaj ten. 27Cybyoncuye cycyakil cysoldad, cysamanxe jatum ta' biybil cye. Ay bec'bil cywitz, ma pon tk'ijlalil tu'n tcub cycastiw. 28In binjtz tk'ajk'ajel cywi' keju ma che tzokpaj tuj tnam Babilonia, ma che pon tuj tnam Sión tu'n t-xi cychic'ba'n tza'n tten ma xelin tu'n Kman Dios, tu'n tlaj cybinchben aj Babilonia mya ba'n, tu'nju cub cyxitun tja Dios. 29Cytxcontze cycyakil keju ba'n che xo'n plech tu'n cyoc tzokpaj ti'j tnam Babilonia, cytxolbanx cyibe ti'jele tu'ntzun mi jun tu'n tex tzokpaj; e tchjet cyu'n ic tza'nx cybinchben. Cybinchame cyi'j ic tza'nx cye o cybincha cyi'j mastl xjal, porque ma jaw cyniman cyib nwitze, akine Dios xjan cye aj Israel. 30Cyja'tzun, akeju cu'xun at cyxol, che bel byo'n cyuj ke cay, ex che cymel cycyakil cysoldad tuj k'ij lu. Akine Dios in chin k'mante jlu. 31Ate Kman aju Tajaw Tcyakil in tma'n cyja': Aya nasyon jawni twitz, ma tzaj nk'oje ti'ja, ma pon tk'ijlalil tu'n tcub tcastiwoya. 32Cjawil tolj ex cbel tz'ak aju nasyon jawni twitz, ex mi jun cjawil wabante te. C'oquel nk'o'ne tk'ak'al cycyakil tnam ate' tuj, ex tu'nju k'ak' lu, cbajel tz'e'y tcyakil cytxa'nile tnam. 33Ate Kman aju Tajaw Tcyakil in tma'n cyja': Nnic'x yajbil cyu'n aj Israel ex aj Judá. Tzyu'n ke cyu'n aj k'oj cyi'j ex cyc'i' tu'n t-xi cytzokpi'n. 34Pero aju tzokpilte cye nimxix tipun, ex atzun tbi jlu: Kman aju Tajaw Tcyakil. Axix toc atzun teju ccolil cyi'j cywitz aj k'oj tu'n cyten aj Israel tuj txubtxaj, atzun cye aj Babilonia ctzajel cyxobil tu'n. 35Chi Kman cyja': Che ul soldad k'ojlel ti'j tnam Babilonia ex cyi'j keju najl tuj, cyi'j ke nejenel cye xjal ex cyi'j keju at cynabl. 36Che ul soldad k'ojlel cyi'j ke aj k'ij ex che oquel te minti' cynabl. Che ul soldad k'ojlel cyi'j cysoldad ex che tzajel lu'lun tu'n cyxobil. 37Che najel cychej ex cycarwaj in che ajben te cyk'ojbil; ke soldad otok che tzaj cytxco'n tuj juntl nasyon te onil cye, che oquel minti' cyipun ic tza'n ke xu'j. Che ul soldad k'ojlel ti'j cyk'inumabl ex cxel cyelk'a'n. 38Che tzkijel ke toma in che pon tuj cytanmi; che ajel tzkij porque tuj tnam Babilonia at nim tilbilal cydios xjal ic'bilxix ke, ex cyu'ntzun ke jlu ma tzpet cynabl xjal. 39Cyja'tzun c'oquel tnam Babilonia te cyjul ke jil najl tuj tzkij tx'otx' ex te cyjul xo'j, ex tuj lugar lu che najal ke chyu'j avestrús cybi; te jumajx mlayx tz'oc juntl maj te cynajbil xjal. 40Cbel xitj ic tza'n e tenba ke tnam Sodoma ex Gomorra ex ke tnam cyvesin cyib cyuc'il. Mi jun xjal cnajal juntl maj tuj tnam lu, ex milpe jun xjal tu'n tten nok ch'in tuj. Akine Dios in chin k'mante jlu. 41Tuj tbank'ab k'ij tzul jun nasyon nimxix tipumal, ex nimxix cybaj rey in bant cyten tu'n cytzaj max ttxa'npun tx'otx'. 42Ma bant cyten tuc'il cyxobl plech ex tuc'il cylans; tx'u'j ke ex minti' in tzaj k'ak'an ch'in cyc'u'j, aju tk'ajk'ajel cywi' oc in che sch'in ic tten ic tza'n tk'ajk'ajel twi mar, ex cyjax ke cyibaj chej. Banin cyten tu'n cyoc tzokpaj k'ojlel ti'ja aya tnam Babilonia. 43Oc tbinte rey te Babilonia tkanil lu, bi'x che bel bakj ke tk'ab tu'n t-xobil, ctzajel ta'w c'ixc'oj ti'j ic tza'n jun xu'j oc nnu'l itz'j tal. 44Nok minaben chin tzajele ti'j, ic tza'n jun balun nne'tz tjak' chc'ul ttzi nima Jordán ex in tzaj ojkelan tuj cha'x c'ul jatum in che wa'n alumaj. Bi'x che elel ok aj Babilonia wu'ne, ex wu'ne cjawil nsc'o'ne jun xjal tu'n tbant jlu tu'n, porque, ¿alcye jun jacu pon ic tza'n weye? ¿Alcye jun jacu chin oque tuj xtis tu'n? ¿Alcye jun pastor ẍne'l jacu cub we' nwitze tu'n tk'ojin wuc'ile? 45Cybintze aju ma baj nnac'u'ne ti'j tu'n nbinchanteye ti'j Babilonia ex aju ma baj nximane tu'n tbant cyi'j ke xjal aj Caldey: Twitz tx'otx' che xel jawo'n ic tza'n ke ẍne'l minti' cyipun, che bel byo'n ex che bajel xitun ke cyja. 46Oc tcub xitj Babilonia ck'ajtel cyuwxix wen, bi'x ctzajel lu'lun tx'otx' tu'n ex aju tk'ajk'ajel cywi xjal cbinjtzel cyuj mastl nasyon.

will be added

X\