JEREMÍAS 49

1Atzun tkanil lu tu'n Kman cyi'j aj Amón. ¿Minti'petzun cyc'wa'l aj Israel? ¿Minti'petzun cyc'wa'l te etzal cytx'otx'? ¿Tiku'ntzun ma che oc keju in che c'ulun twitz tilbilal Milcom, te tajwil cytx'otx' ke tiyjil Gad? ¿Tiku'ntzun ma che najan aj Amón tuj cytanmi aj Israel? 2Cyja'tzun akine Dios cxel nma'ne jlu: Tzul tk'ijlalil oc cybi' aj Amón, akeju najl tuj tnam Rabá, tk'ajk'ajel cywi soldad in che sch'in oc cypon k'ojlel cyi'j, ex aju tnam bi'x cbel xitj ex c'oquel k'o'n cyk'ak'al tnam ate' ti'jele. Entons che elex cylajo'n aj Israel ke aj Amón ex che oquel juntl maj tajwil cytanmi, aju otok tz'el cyi'n aj Amón tnejel. Akine Dios in chin k'mante jlu. 3Che ok'e akeye aj Hesbón, porque ma cub xitj tnam Hai. Che ok'e akeye xu'j aj Rabá. Cyk'on oque cyxbalune ch'i'x twitz ex che wuyine, cyjaw keline ic tza'n jun xjal loc, porque cxel k'i'n tilbilal dios Milcom tuj juntl nasyon, cyuc'ix ke pal in che ajben te ex ke xjal ma' cyoclen. 4¿Tiku'n in jaw cyniman cyibe tu'nju at cytx'otx'e chk'ajlaj tbanilxix wen? Akeye xjal miban che bine, o'cx nno'c ke' cyc'u'je ti'j cyk'inumable ma baj cychmo'ne ex in cyma'ne: ¿Alcye ba'n toc tzokpaj k'ojlel ki'j? 5Cyja'tzun tuj tcyakil part ctzajel nsama'ne xobajil cyi'je. Akine Dios Tajaw Tcyakil in chin k'mante jlu. Teylex te junjun cxel ti'n tbe oc cyel ok ex mi a'l jun c'oquel chmonte cye. 6Pero te tibajxi che ajetz wi'ne juntl maj aj Amón tu'n cyul tuj cytanmi. Akine Dios in chin k'mante jlu. 7Atzun tkanil lu cyi'j aj Edom, tu'n Kman aju Tajaw Tcyakil. ¿Minti'tlpetzun xjal at cynabl tuj tnam Temán? ¿Minti'tlpetzun jun consej cyu'n ke xjal at cynabl? ¿Mapetzun naj tcyakil cyojtzkibl? 8Akeye najl tuj Dedán cyex oke, cyxi'ye ewal cyibe cyuj toy' jul ma' cyxe', porque cbel nxitune cytanmi ke tiyjil Esaú oc tpon tk'ijlalil oc tcub cycastiw wu'ne. 9Oc in jaw chmet twitz uva, in cyaj ten junjun pnuj twitz, oc in che pon ke elek' konic'an, o'cx in xi cyi'n aju at tajben cye, 10atzun weye c'elel wi'ne tcyakilju at cye tiyjil Esaú, cyjel k'ancha'lin cyewbil wu'ne ex mlayx bant txi cyewan cyib, che bajel naj cycyakil cyc'wa'l, cyuc'ix cyerman ex cyvesin, ex mi jun cyjel ten. 11Che cyk'oncje ke meba c'wa'l wuc'ile, jacu che oc ncwentine, ex ba'n tu'n toc ke' cyc'u'j meba xu'j wi'je. 12Chi Kman: Akeju minti'tok tcubil cycastiw, ma cub cycastiw, yajtzun cyeye, ¿Mi'npetzun cub cycastiwoye? Il ti'j cbel cycastiwoye, mlay tzic'x ti'j. 13Akine Dios cxel nma'ne jun yol axix toc wu'nx wibe: Cbel xitj tnam Bosra ex c'oquel te jun tzkij tx'otx', che oquel ten xjal xmayil cyi'j ex ctzajel cykanin mya ba'n cyibaj, ax icx cycyakil mastl tnam ate' tuj tcwent, nok ttx'akan che cyjel ten te jumajx, chi Kman. 14Ma tzul jun tkanil wuc'ile tu'n Kman. At jun t-sanjel Dios ma tzul t-sma'n k'malte cye nasyon cyja': Cychmon oc cyibe tu'n cyoc tzokpaje ti'j tnam Edom. Cybincham cytene tu'n toc k'oj, chi t-sanjel Dios. 15Akeye aj Edom che oquel nk'o'ne te jun nasyon mas ch'in cywitz mastl nasyon ex che elel ic'une cyu'n xjal. 16Aju cynimbil cyibe ma cub sbunte cyeye porque in che xobtzane cyi'j mastl tnam. Najl keye cyxol ke toy' pic ex cywi' ke witz ma' cywa'l, pero masque cub cyk'o'ne cyjaye cywi' ke nmak witz ic tza'n ke t'iw, maxtzun che tzajel tz'ake wu'ne. Akine Dios in chin k'mante jlu. 17Tzul xitbil xobajilxix tibaj tnam Edom. Cycyakil keju che ic'el bet ttxlaj che jawil sec'paj ex che oquel ten xmayil ti'j oc cylonte aju otok baj ti'j. 18Ic c'oquel ic tza'n tej cynaj tnam Sodoma ex Gomorra ex ke mastl tnam cyvesin cyib cyuc'il; mi jun xjal cnajal tuj ex milpe jun xjal cpol tu'n tten nok ch'in tuj. Akine Dios ma chin k'mante jlu. 19Nok minaben chin tzajele ti'j, ic tza'n jun balun nne'tz tjak' chc'ul ttzi nima Jordán ex in tzaj ojkelan tuj cha'x c'ul jatum in che wa'n alumaj. Bi'x che elel ok ke aj Edom wu'ne, ex wu'ne cjawil nsc'o'ne jun xjal tu'n tbant jlu tu'n, porque ¿alcye jun jacu pon ic tza'n weye? ¿Alcye jun jacu chin oque tuj xtis tu'n? ¿Alcye jun pastor ẍne'l jacu cub we' nwitze tu'n tk'ojin wuc'ile? 20Cybintze aju ma baj nnac'u'ne ti'j tu'n nbinchanteye ti'j Edom, ex aju ma baj nximane tu'n tbant cyi'j ke xjal najl tuj tnam Temán: Twitz tx'otx' che xel jawo'n ic tza'n ke ẍne'l minti' cyipun, ex che bajel xitun xjal aj Edom cyuc'il ke cyja. 21Oc tcub xitj tnam Edom, ck'ajtel cyuwxix wen, bi'x ctzajel lu'lun tx'otx' tu'n, ex aju tk'ajk'ajel cywi xjal cbinjtzel max ttzi mar Cyak Que'yin. 22Che oquel tzokpaj aj k'oj ti'j tnam Bosra ic tza'n in tzaj lipan jun t'iw cyuc'il ke tk'ab lic'un cyten, ex tuj k'ij lu, akeju soldad cyuw cyc'u'j tuj k'oj te Edom, ic che oquel ic tza'n jun xu'j oc nnu'l itz'j tal, chi Dios. 23Atzun tkanil lu ti'j tnam Damasco: Ma tzaj cych'ixwi xjal najl tuj tnam Amat ex Arfad, porque ma pon jun tkanil mya ba'n cyuc'il, ma tzaj cyxobil ex minti'tl tumel tu'n cyten tuj txubtxaj. 24Minti'tl cyipun aj Damasco, ma cub cyximan tu'n cyel ok. Ma tzaj nim cyxobil, ma tzaj ta'w cyi'j ic tza'n jun xu'j oc nnu'l itz'j tal. 25Ma cyaj colin aju tnam ba'n yolbil te, jatum in che tzalaj xjal wen. 26Ax toc, tuj k'ij lu akeju cu'xun at cyxol che cyjel pale' cyuj ke cay, ex cycyakil xinak cyuw cyc'u'j tuj k'oj che cymel. Akine Dios Tajaw Tcyakil in chin k'mante jlu. 27C'oquel nk'o'ne tk'ak'al muro toc ti'jele tnam Damasco, ex aju k'ak' lu che bel tz'e'y ke tja rey Ben-adad tu'n. 28Atzun tkanil lu tu'n Kman cyi'j ke tiyjil Cedar ex cyi'j ke cawbil tuj tx'otx' Hazor, akeju cub cyi'j tu'n Nabucodonosor aju rey te Babilonia: Cyxi'ye tu'n cyoc tzokpaje cyi'j ke tiyjil Cedar ex cybyo'n baje ke xjal najl tuj tjawitz k'ij. 29Cyetzan ele cyja ex cyoque te tajwil cyalun, cyetzan ele cycyakil cymacbil ex ke xbalun in che ajben te makbil ttzi cyja, cyi'n ele ke cychej camey, ex che sch'ine cyja': At xobajil tuj tcyakil part. 30Cyex oke akeye najl tuj tnam Hazor, cyxi'ye ewal cyibe, chi Kman, porque ma bant ti'j tu'n Nabucodonosor aju rey te Babilonia tu'n toc tzokpaj cyi'je. 31Akine Dios cxel nma'ne cye: Cyxi'ye ex cyoc tzokpaje ti'j tnam lu aju najl tuj txubtxaj ex minti' in baj tc'u'j, minti' tlamel toc ex minti' pasador ti'j, tjunalx tcub. 32Cyelk'amele ke cychej camey ex cycyakil ke cyalun. Tuj tcyakil part che bajel nsputune ke xjal lu ex tuj tcyakil part ctzajel wi'ne mya ba'n cyibaj. Akine Dios in chin k'mante jlu. 33Te jumajx c'oquel tx'otx' Hazor te tzkij tx'otx' ex te cynajbil xo'j. Mi jun cpol najal juntl maj tuj tx'otx' lu ex milpe jun xjal cpol tu'n tten nok ch'in tuj. 34Tej ttzyet tcawin Sedequías tuj tnam Judá, tzaj tma'n Kman tkanil lu te Jeremías, ti'j nasyon Elam: 35Akine Dios aju Tajaw Tcyakil cxel nma'ne jlu: Cbel ntokine cyxobl plech aj Elam, aju cyk'ojbil nimxix in ajben. 36Tuj tcyajil pac' t-xe cya'j ctzajel wi'ne cyk'ik' cyuwxix wen ti'j tnam lu, tu'ntzun cybaj sputj aj Elam tuj tcyakil part, ex cyuj cycyakil nasyon che pol clolte cyib. 37Che tzajel lu'lun aj Elam wu'ne cywitz aj k'oj cyi'j, akeju nno'c tilil cyu'n tu'n cycub byonte cye, ctzajel nsama'ne nimxix ntx'u'jile ex c'ixbisabl cyibaj, ex che xel nsama'ne soldad k'ojlel cyi'j ocxi cynaj cycyakil. Akine Dios in chin k'mante jlu. 38Cymel cyrey wu'ne, cyuc'ix ke nejenel ate' cyxol, ex cbel nk'o'ne nk'ukbile te cawbil tuj tnam Elam. Akine Dios in chin k'mante jlu. 39Pero te tibajxi che ajetz wi'ne juntl maj aj Elam tu'n cyul tuj cytanmi. Akine Dios in chin k'mante jlu.

will be added

X\