JEREMÍAS 47

1Atzun tkanil lu tzaj tma'n Kman te Jeremías aju t-sanjel, cyi'j aj Filistey, tej na'nxtok toc tzokpaj Faraón k'ojlel ti'j tnam Gaza. 2Chi Kman cyja': Ic tza'n jun nima in ch'iy, nne'x pax ex in cyaj mulk'aj tcyakil tjak', ictzun che tzajel nim soldad tuj tx'otx' tuj tbank'ab k'ij, ex cbajel naj tcyakil cyu'n, cyuc'ix ke tnam ex ke xjal najl cyuj. Cycyakil xjal che jawil sch'in ex che ok'el. 3Oc tbinjtz tk'ajk'ajel cykan chej in che ojkelan wen, tuc'ix cyk'ajk'ajel carwaj ex tk'ajk'ajel cyrwed, bi'x che bel numj ke mambaj ex cyjel cycolin cyc'wa'l. 4Porque ma pon k'ij tu'n cynaj aj Filistey, akeju mancbil onil cyi'j tnam Tiro ex Sidón. Ate Kman cbel xitunte cye aj Filistey, akeju e tzaj ojtxi tuj tx'otx' Cret. 5Ke xjal najl tuj tnam Gaza c'elel cymatzo'n ttzmal cywi' tu'n cybis ex minti'tl in che k'ajt xjal tuj tnam Ascalón. ¿Jtoj ban t-xi cycoline tu'n tbaj cykesine ti'j cyximlale tu'n cybise, akeye ch'intl xjal aj Filistey? 6¿Jtoj ban t-xi tcolina tu'n tbiyana aya t-spad Kman? Taja tuj tjayila, chewix tc'u'ja ex txulecuya. 7Pero, ¿tza'n tten tu'n t-xi tcolin spad tu'n tbiyan? Porque ate Kman ma tzaj k'mante te tu'n toc tzokpaj ti'j tnam Ascalón ex cyi'j cycyakil tnam ate' ttzi'yile mar.

will be added

X\