JEREMÍAS 46

1Tzaj yolin Kman tuc'il Jeremías ex tzaj tma'n ke yol lu cyi'j ke nasyon. 2Aju tkanil lu o yolinjtz ti'j tnam Ejipt ex cyi'j t-soldad Faraón Necao aju rey te Ejipt, tej tcub cyi'j tu'n Nabucodonosor tuj Carquemis, aju tcub ttxlaj nima Éufrates, tuj tcyajin abk'i ttzyetlen tcawin Joacim aju rey te Judá ex tcy'ajal Josías. 3Cybinchame cyten cycyakil txcaj makbil ex cyxi'ye tuj k'oj. 4Cybinchame cyten chej jawolte carwaj, ex cyjaxe chejil cyibaj txkantl chej, cyk'o'n jaxe cypasbile c'uxbil ex cytxolbanx cyibe, cyjakun baje ttzi cyspadiye ex cyk'o'nque cychicyete c'uxbil. 5Pero ¿ti ma wile? Ma che ajtz ok ke soldad aj Ejipt tu'n cyxobil, ma cub cyi'j, ke k'ojlel ma che el ok ex mi tu'n taj cyque'yin cyi'jxi; at xobajil tuj tcyakil lugar. Akine Dios in chin k'mante jlu. 6Mlayx bant tu'n cyel ok keju cyuw che ojkelan ex mi tu'n cytzokpaj keju at nimxix cyipun. Max tuj tbank'ab k'ij, ttxlaj nima Éufrates ma che jaw tolj ex ma che cub tz'ak. 7¿Alcyetzunju in ch'iy tjaw ic tza'n nima Nilo, ic tza'n jun nima in jululun? 8A Ejipt in ch'iy tjaw wen, ic tza'n nima Nilo, ic tza'n jun nima in pulin wen. Che chi aj Ejipt cyja': Ko ch'iyil ex cbajel noj tcyakil twitz tx'otx' ku'n, che bel kxitun ke tnam cyuc'ix ke xjal najl cyuj, che chi. 9Che keline akeye chej, che keline cyuw akeye cyjax cyuj ke carwaj te k'ojbil. E tcub be cyu'n ke soldad te Etiopía ex te Put, akeju banin cyten tuc'il cymakbil ex ke soldad te Lud, akeju ba'n che xo'n plech. 10Aju k'ij lu, atzun tk'ijlalil Kman aju Tajaw Tcyakil, atzun k'ij cxelil tu'n Kman cyi'j ke aj k'oj ti'j. Che bel tbyo'n ke xjal tu'n spad ocxi tbaj tgan tu'n tbiyan, ex c'elel nim cychc'el xjal tu'n, porque tu'n Kman aju Tajaw Tcyakil c'oquel jun matij biyenj, ic tza'n jun chojbil twitz Kman, tuj tx'otx' tuj tbank'ab k'ij aju tcub ttxlaj nima Éufrates. 11Akeye aj Ejipt, cyxi'ye jyolte remey tuj Galaad, pero masque tz'ajben nimcu remey cyu'ne, mlayx k'anan cyi'je, porque minti' k'anbil cyeye. 12Ma cybi mastl nasyon ka ma cub cych'ixwiye, ex tuj tcyakil twitz tx'otx' ma binjtz tk'ajk'ajel cywi'ye in che ok'e porque akeju cysoldadiye cyuwxix cyc'u'j tuj k'oj in che jaw tolj jun ti'j juntl ex cycabil in che cub tz'ak twitz tx'otx'. 13Tzaj yolin Kman tuc'il Jeremías aju t-sanjel, tej ttzaj Nabucodonosor aju rey te Babilonia k'ojlel ti'j tnam Ejipt, ex tma cyja': 14Cymanxe tkanil lu tuj Ejipt, tuj Migdol, tuj Menfis ex tuj Tafnes: Cybincham cytene, nok list che tencuye, porque lu in che naj xjal tu'n spad ti'jele tnam. 15¿Tiku'n ma che el ok ke t-soldadiye cyuw cyc'u'j tuj k'oj? ¿Tiku'n minti' ma cyipa tu'n cycub we' cywitz aj k'oj? Porque wu'ne ma che cub tz'ak, akine Dios. 16Ma tz'oc twi cykan cysoldadiye, ma che cub tz'ak jun tibaj juntl ex in cyma'n cyxolx: Che we'ctze, e kaj meltz'aj tuj ktanmi, tuj tnam jatum o ko itz'j, e kel ok twitz k'oj cyuwxix wen, che chi. 17Cymanxe ti'j Faraón aju rey te Ejipt cyja': Nim in baj tyolin tib, pero oc tpon tk'ijlalil, minti' ch'in in bant tu'n, che chicuye. 18Akine Rey ex aju nbiye atzun jlu, Dios Tajaw Tcyakil, cxel nma'ne jun yol axix toc: Ic tza'n witz Tabor matijxix twa'l, ex ic tza'n witz Carmelo aju tcub ttxlaj mar, cyja'tzun cyten ke aj k'oj che ul. 19Akeye najl tuj Ejipt, cybincham cytene tu'n cyxi k'i'ne pres tuj juntl tnam, porque aju tnam Menfis c'oquel te jun tzkij tx'otx', bi'x cbajel xitj ex mi jun xjal cyjel ten tuj. 20Aju tnam Ejipt ic tten ic tza'n jun tal vac tbanilxix que'yin, pero tuj tx'otx' tuj tbank'ab k'ij ctzajel jun xcatz tx'a'l ti'j. 21Ax icx ke soldad te junxitl tnam otok che tzaj txco'n te onil, ic cyten ic tza'n ke tal wacẍ ulni cynabl, pero ax icx cye che elel ok, mlay che we' cywitz aj k'oj, porque ma pon tk'ijlalil tu'n cynaj, atzun or tu'n tcub cycastiw. 22Che elel ok aj Ejipt in che k'ajt ic tza'n jun lobaj jililin tel; oc cyul lak'e' ke soldad aj k'oj cyi'j ex oc cyoc tzokpaj cyi'j tuc'il siwbil c'uxbil mer ic tza'n in che tx'emin tze', 23ex mer ic tza'n in che tx'emin tkan tze' pin wen. Akine Dios in chin k'mante jlu. Oc cyul, mas nim cyajlal ic tza'n ke ẍplon, ex mi jun jacu bant tajlante cye. 24Cbel cych'ixwi aj Ejipt ex che cyjel ten tjak' tcawbil nasyon tuj tbank'ab k'ij. 25Ate Kman aju Tajaw Tcyakil ex Cydios aj Israel chi cyja': Cbel tcastiw Amón wu'ne, aju cydios aj Tebas, ax icx cbel cycastiw aj Ejipt wu'ne, cyuc'ix cydios ex cyrey, ax icx te Faraón cyuc'ix keju nno'c ke' cyc'u'j ti'j. 26Che xel nk'o'ne tu'n cycyaj ten tjak' tcawbil Nabucodonosor aju rey te Babilonia, ex tjak' cycawbil keju at cyoclen ttxlaj, akeju nno'c tilil cyu'n tu'n cycub byo'n. Pero te tibajxi che pol xjal juntl maj najal tuj tnam Ejipt ic tza'nx tten nej. Akine Dios in chin k'mante jlu. 27Mi'n che xobe akeye tiyjil Jacob aju ajbel weye. Mi'n tzaj cyxobile akeye aj Israel, porque akeye cyuc'ix ke cyiyjile che cletele wu'ne tuj tnam najchak jatum che pol k'i'ne; che ank'ile juntl maj tuj txubtxaj ex mi jun c'oquel xobtzante cyeye. 28Akine Dios in chin k'mante jlu. Mi'n che xobe akeye tiyjil Jacob aju ajbel weye, porque atine cyuc'ile. Che bajel nxitune cycyakil nasyon jatum otok che baj nsputune, atzun cyeye mlay che baj naje wu'ne; o'cx cbel nk'o'ne cycastiwoye ic tza'n cybinchbene, ex mlayx tzic'x ti'j tu'n mi'n tcub cycastiwoye wu'ne.

will be added

X\