JEREMÍAS 42

1Cycyakil ke nejenel cye soldad, tuc'ix Johanán aju tcy'ajal Carea, tuc'ix Jezanías aju tcy'ajal Osaías, ex cycyakil xjal, 2e ul tuc'il Jeremías aju t-sanjel Dios, ex xi cyma'n te cyja': —Cxel kkanine jun kkanbetze teya ex mi'n cub t-xc'a'yina: Cubsana ki'je twitz Kman Dios, a ko'ye nic'xi kbete ma cyaj ten, porque ba'n tu'na, tnejel nim kbete, atzun ja'lo nic'xi kbete at ic tza'n in tila. 3Kaninxa te Kman Dios tu'n ttzaj tyec'un alcye be cxel ki'ne, ex alcye tu'n tbant ku'ne, che chi. 4Atzunte Jeremías xi ttzak'we'n: —Ba'n, chin cubsale twitz Kman Dios cyi'je, ic tza'n ma tzaj cyma'ne weye, ex cxel nma'ne cyeye tcyakilju ctzajel tma'n Kman weye, mlay cub wewane jun tyol. 5Xitzun cyma'n xjal te Jeremías: —Tzajxwit jun mya ba'n kibaje tu'n Kman Dios ka minti' ma bant ku'ne tcyakilju ctzajel tma'n Dios teya. 6Nok alcyex yol ctzajel tma'n Kman Dios teya, ka ba'n ex ka mya ba'n, cxel knimane, porque ma txi kma'ne teya tu'n t-xi tkanina te, ex cbantel ku'ne aju ctzajel tma'n teya, tu'ntzun tel ba'n keye. 7Tbajlenxi laj k'ij, tzaj yolin Kman tuc'il Jeremías. 8Tzajtzun txco'n Johanán aju tcy'ajal Carea tu'n Jeremías, cyuc'ix ke nejenel cye soldad, akeju ate'tok tuc'il, cyuc'ix cycyakil xjal, 9ex xi tma'n cye: Ate Kman aju Cydios aj Israel, aju tzaj cyma'ne weye tu'n ncubsane twitz, in tma'n cyja': 10Ka ax ma che cyaj tene najal tuj tx'otx' lu, cjawil nbincha'ne juntl maj cytanmiye ex mlay cub nxitune; cucx che tele segur tuj tx'otx' lu ex mlay che ex nlajo'ne, porque ma tzaj nbise tu'n tlaj c'ixc'oj ma tzaj nsama'ne cyibaje. 11Mi'n che xobe twitz rey te Babilonia aju in che xobe twitz; mi'n tzaj tchi cyi'je, porque atine cyuc'ile tu'n cyclete ex tu'n cycolpaje tjak' tcawbil wu'ne. Akine Dios in chin k'mante jlu. 12Ctzajel k'ak'an nc'u'je cyi'je ex wu'ne ctzajel k'ak'an tc'u'j rey Nabucodonosor cyi'je, tu'n cyaj meltz'aje tuj cytanmiye, chi Kman. 13Pero ka mi'n ma che cyaj tene tuj tx'otx' lu, ex ka mi'n ma txi cynimane tyol Kman aju Cydiose, 14ex ka ma cymaye: Mas kajbile tu'n kxi'ye najal tuj Ejipt jatum mlay kila'ye k'oj, mi tu'n kbinteye tk'ajk'ajel chun ex jatum mlay ko cyime tu'n we'yaj, ka che chiye, 15entons akeye ma che cyaj tene tuj Judá, cybintze aju in tma'n Kman cyeye. Ate Kman aju Tajaw Tcyakil ex Cydios aj Israel chi cyja': Ka ma tz'oc cyk'o'ne il ti'j tu'n cyxi'ye najal tuj Ejipt, 16cpol canun k'oj ex we'yaj cyi'je, aju nimxix in che xobe ti'j ex maxtzun che cymele tu'n. 17Cycyakil keju che xe'l najal tuj Ejipt, max ma chixin che cymel tu'n k'oj, tu'n we'yaj ex tu'n tx'u'j yabil. Mi jun cyjel ank'in ex mi jun ctzokpajel tu'n c'ixbisabl cxel nsama'ne cyibaj, chi Kman. 18Ate Kman aju Tajaw Tcyakil ex Cydios aj Israel chi cyja': Ic tza'n o tzaj nk'oje ex ntx'u'jile cyi'j keju e ten tuj tnam Jerusalén, cyja'xtzun ctzajel nk'oje cyi'je ka ma che'xe najal tuj Ejipt. Che elel ic'une cyu'n xjal, che jawil sec'paj cyi'je, ctzajel cykanin mya ba'n cyibaje, che xmayil cyi'je ex mlay cyile juntl maj ju lugar lu, chi Kman. 19Akeye ch'intl xjal aj Judá, ma tzaj tk'o'n Kman jun orden cyeye tu'n mi'n cyxi'ye najal tuj Ejipt. Tz'elx cynic'e ti'j ju cxel nma'ne cyeye ja'lo. 20Aju ma tzaj cyma'ne weye tu'n t-xi nkanine, nok tten cyu'ne, porque ax keye tzaj cyma'ne weye tu'n nxi yoline tuc'il Kman aju Kdios, ex tzaj cyma'ne tu'n ncubsane cyi'je twitz Kman. Ax icx tzaj cyma'ne weye: K'mantza keye tcyakilju ctzajel tma'n Dios teya, tu'ntzun tbant ku'ne, che chitzune, pero nok tten cyu'ne. 21Matzun txi nma'ne cyeye ja'lo aju ma tzaj tma'n Kman weye tu'n t-xi nma'ne cyeye, pero cyc'i'ye txi cynimane. 22Cyja'tzun tz'elx cynic'e ti'j jlu: Che cymele tu'n k'oj, tu'n we'yaj ex tu'n tx'u'j yabil tuj tx'otx' jatum cyaje tu'n cyxi'ye najal, chi Jeremías cye.

will be added

X\