JEREMÍAS 41

1Tuj twukin xjaw xi' Ismael visitarilte Gedalías tuj tnam Mizpa, ex xi tuc'in laj xinak tuc'il, cyuc'ix junjun xjal at cyoclen ttxlaj rey. Ate Ismael tcy'ajal Netanías ex tal tchman Elisama aju at t-xilen cyuc'il ke tiyjil rey, ex tej matok in che wa'n tuc'il Gedalías, 2jaw we' Ismael cyuc'ix laj xinak uc'in tu'n ex cub cybyo'n Gedalías tu'n spad, aju otok tz'oc k'o'n toclen tu'n rey Nabucodonosor tu'n tcawin tuj tnam Judá. 3Ax icx e cub tbyo'n Ismael cycyakil xjal Judiy ex ke soldad aj Caldey, akeju ate'tok tuc'il Gedalías tuj tnam Mizpa. 4Ewtok tcublen byo'n Gedalías, mi jun otok binte te, 5e ul 80 xinak tzajni ke tuj tnam Siquem, tuj tnam Silo ex tuj tnam Samaria, matzonlex cyxmatz ex sbit'naj cyxbalun toc, ex nojni ti'j cyximlal tu'n ẍil cyu'nx otok bant, k'i'n cyoyaj twitz awal ex storac tu'n tpon cyi'n tuj tja Dios. 6Etztzun Ismael tuj Mizpa canul cyi'j ke xjal lu in ok'tok, ex tej tpon canun cywitz ke xjal xi tma'n cye cyja': —Cytzaje que'yilte Gedalías aju tcy'ajal Ahicam. 7Tejtzun cypon tuj tnam, ate Ismael cyuc'ix laj xinak tuc'il, e oc ten byolte cye ke xjal lu ex e cu'x cyxo'n tuj jun jul in chmet a' tuj. 8Pero cyxol ke xinak lu, at laj cyma te Ismael cyja': —Mi'n ko cub tbyo'na, porque at triw, sebad, aseyt ex ta'l cab ewan ku'ne tuj cojbil, che chi. Entons minti' e cub tbyo'n Ismael laj xinak lu. 9Aju jul jatum cu'x t-xo'n Ismael cyximlal ke xinak otok che cub tbyo'n, ax aju otok bant tu'n rey Asa tej in che k'ojintok tuc'il Baasa aju rey cye aj Israel. Aju jul lu matij wen, pero bi'x noj tu'n cyximlal ke xjal otok che cub tbyo'n Ismael. 10Ax icx e je'x ti'n Ismael ke tme'jel rey ex ke xjal otok che cyaj k'o'n tuj tcwent ktzan Gedalías tuj Mizpa tu'n Nabuzaradán aju nejenel cye soldad. E je'x ti'n Ismael ke xjal lu tu'n cypon ti'n tuj cytanmi aj Amón. 11Tej tbinte Johanán aju tcy'ajal Carea, cyuc'ix ke nejenel cye soldad ate'tok tuc'il, ka otok che cub tbyo'n Ismael nimcu xjal, 12e baj cychmo'n cycyakil xinak ate' tuj cycwent ex e je'x k'ojlel ti'j Ismael; max cub ti'j cyu'n jatum ta' nintz pil tuj tnam Gabaón. 13Nimxix e jaw tzalaj ke xjal otok che'x k'i'n pres tu'n Ismael, tej cylonte lu Johanán cyuc'ix cycyakil ke nejenel cye soldad cyja' cyxi'; 14e ajtz meltz'aj cycyakil xjal lu ex ul cychmon cyib tuc'il Johanán. 15Atzunte Ismael cyuc'ix wajxak xinak tuc'il, cabal e tzokpaj tuj tk'ab Johanán, ex cyja' e je'x ok tuj cytanmi aj Amón. 16Atzunte Johanán cyuc'ix ke nejenel cye soldad ate' tuc'il, ajtz cyi'n cycyakil xjal; ke soldad, ke xu'j, ke c'wa'l ex ke xjal at cyoclen, akeju otok che'x presin tu'n Ismael tuj Mizpa tcublenxi byo'n Gedalías tu'n, ex e ajtz ti'n Johanán cycyakil xjal lu, akeju otok che pon k'i'n tuj Gabaón. 17Tzyettzun be cyu'n ex tej cycanun tuj lugar Gerut-quimam, aju tcub nikayin ttxlaj tnam Belén, axtzun e we' porque ximantok cyu'n tu'n cypon max tuj Ejipt, 18tu'n cytzokpaj tuj cyk'ab aj Caldey, porque in che xobtok cywitz, tu'n tlaj otok cub byo'n Gedalías tu'n Ismael. Ate Gedalías otok cyaj k'o'n toclen tu'n rey te Babilonia tu'n tcawin tuj Judá.

will be added

X\