JEREMÍAS 40

1Tzaj yolin Kman tuc'il Jeremías tetzlenxi k'i'n tuj pres tu'n Nabuzaradán aju nejenel cye soldad. Oc noj Nabuzaradán ti'j Jeremías tej presintok ex c'alo'ntok tu'n caden cyxol aj Jerusalén ex aj Judá, akeju banin cyten tu'n cyxi k'i'n pres tu'n cypon tuj Babilonia, ex cyaj tzokpi'n Jeremías tu'n tuj tnam Ramá. 2Part xi k'i'n Jeremías tu'n nejenel cye soldad ex xi tma'n te cyja': Ate Kman aju Tdiosa o tma tu'n ttzaj mya ba'n tibaj tx'otx' lu, 3ex matzun japun ja'lo aju o tma, ma tzaj jlu cyi'j t-xjalila porque o che binchan il twitz Kman ex minti' xi cyniman. 4Bintza, texju ja'lo c'elel wi'ne caden ti'j tk'aba, aju c'alo'na tu'n. Ka tajbila tu'n t-xi'ya wuc'ile tuj Babilonia, ba'n tu'n t-xi'ya, jacu tz'oc ncwentina, pero ka tc'i'ya tu'n t-xi'ya wuc'ile, ba'n tu'n tcyaj tena. Que'yinxa, lu tcyakil tx'otx' tcub twitza, ex ba'n tu'n t-xi'ya nok jatum taja. 5Ka tajbila tu'n tcyaj tena, txi'ya tuc'il Gedalías aju tcy'ajal Ahicam ex tal tchman Safán, aju ma tzaj k'o'n toclen tu'n rey te Babilonia tu'n tcawin cyibaj ke tnam te Judá; tencja tuc'il ex cyuc'il ke ttanmila. Ex ka mi'n, ba'n tu'n t-xi'ya nok jatum taja, chi nejenel cye soldad. Xitzun tk'o'n jun oyaj te Jeremías, tuc'ix ch'in twa, ex baj cyk'olben cyib. 6Xi'tzun Jeremías tuc'il Gedalías ma tuj tnam Mizpa, axtzun cyaj ten tuc'il ex cyuc'il ke xjal otok che cyaj ten tuj Judá. 7Tej cybinte cycyakil nejenel cye soldad Judiy, cyuc'ix ke cyxjalil akeju ate'tok tuj cojbil, ka otok txi tk'o'n rey te Babilonia toclen Gedalías aju tcy'ajal Ahicam, tu'n tcawin tuj tx'otx' Judá, ex ka tuj tcwent otok che cyaj k'o'n ke xinak, ke xu'j ex ke c'wa'l, akeju mas tal mebaxix, akeju minti' e je'x k'i'n pres tuj Babilonia, 8e je'x tuc'il Gedalías tuj tnam Mizpa ex atzun ke jlu: Ismael aju tcy'ajal Netanías, Johanán ex Jonatán akeju tcy'ajal Carea, Seraías aju tcy'ajal Tanhumet, cyuc'ix ke tcy'ajal Efai aju aj Netofa, ex Jezanías aju tcy'ajal jun xinak aj Maacat, cyuc'ix ke cyxjalil. 9Atzunte Gedalías xi tcyuwsa'n jun yol axix toc cye ke xinak lu ex cye cyxjalil: Mi'n che xobe tu'n tocx cyk'on cyibe tjak' cycawbil aj Caldey, ax che ank'ine tuj tx'otx' lu, cyk'on ocx cyibe tjak' tcawbil rey te Babilonia ex ba'n c'elel te cyeye. 10Atzun weye, ax chin cyjel tene tuj tnam Mizpa tu'ntzun nyoline cyi'je cywitz aj Caldey oc cyul tzalu. Cychmo'n baje ta'l twitz uva, tuc'ix twitz awal ex chibj aseyt, cyc'u'nxe cyuj ke c'ubl cye ex axtzun che tencje cyuj tnam jatum ate'ye, chi Gedalías. 11Ax icx ke xjal Judiy, akeju ate' tuj tnam Moab, tuj Amón, tuj Edom ex cyuj txkantl tnam, o cybi ka otok txi tk'o'n rey te Babilonia ambil cye junjun xjal Judiy tu'n ax tu'n cycyaj ten tuj tx'otx' Judá, ex ka otok txi tk'o'n toclen Gedalías tu'n tcawin cyibaj. 12E tzajtzun tuj tcyakil part jatum otok che baj sputj, e ul meltz'aj juntl maj tuj Judá, ex e ul tuc'il Gedalías tuj tnam Mizpa. Ax icx cye baj cychmo'n ta'l twitz uva ex nimxix twitz awal. 13Ate Johanán aju tcy'ajal Carea, cyuc'ix mastl nejenel cye soldad, akeju ax ate'tok tuj cojbil, e je'x tuc'il Gedalías tuj tnam Mizpa, 14ex xi cyma'n te cyja': —¿Minti'pe ba'n tu'na, ma tzaj sama'n Ismael aju tcy'ajal Netanías, tu'n Baalis aju rey cye aj Amón, tu'n tcub byo'na tu'n? Che chi. Atzunte Gedalías minti' xi tniman. 15Xitzun tma'n Johanán te Gedalías tuj ewaj: —K'ontza ambil weye tu'n nxi'ye byolte te Ismael ex mi jun jacu binte alcye otok cub byonte te. ¿Tiku'ntzun cxel kk'o'n ambil te tu'n tcub byo'na tu'n? Porque ka ma cub byo'na tu'n, jacu che el sputj ke xjal ma tz'oc cychmon cyib tuc'ila ex jacu che baj naj aj Judá, akeju nic'xi cybaj ma cyaj ten. 16Atzunte Gedalías xi ttzak'we'n: —Mi'n tbinchaya icju, aju in tma'na ti'j Ismael mya ax toc.

will be added

X\