JEREMÍAS 4

1Chi Kman in tma'n: Ka cyajbile tu'n cyajtz meltz'aje wuc'ile akeye aj Israel, ba'n tu'n cyajtze. Ka ma tz'el cypa'n cyibe cyi'j ke tilbilal ic'bilxix ex ka mi'n tz'el cypa'ntl cyibe wi'je, 2ex ka ma txi cytziyane jun yol axix toc nwitze tuj tumelxix ex tz'aklxix, c'oqueltzun nbiye te cy'iwbil cye ke nasyon, ex cjawil cynimsa'n nbiye. 3Chi Kman in tma'n cye xjal tuj Judá ex tuj Jerusalén: Cyk'u'n baje ke tx'otx' na'nx tbaj k'u't ex mi'n cub cyawa'n cyawale cyxol ch'i'x. 4Akeye aj Judá ex aj Jerusalén, cysaksame tuj cyanmiye ex tz'elx cynic'e wi'je, ax toc akine Dios. Cyk'o'ncxe tuj cyanmiye aju techal ti'j ju yol cyaj bant ti'j wu'ne cyuc'ile, porque tu'n tlaj cybinchbene mya ba'n jacu tzaj nk'oje cyi'je, ex aju nk'oje ic tten ic tza'n k'ak', ex oc ttzaj, mi jun xjal jacu yupj tu'n. 5Cyk'manxe jlu tuj Jerusalén ex cyxol aj Judá, cyk'ajtzanque chun cyuj cycyakil tnam, cyxi k'ajte cyi'j cyuwxix wen ex cyk'manxe cyja': Chux keye, ko' ke, e toc kchmon kib, ko ocx cyuj ke tnam toc muro cyi'j. 6Cyi'n jawe bander twitz cya'j ex cyyec'unxe tumlal tnam Sión, cyel oke, mi'n cub cyyo'ne, porque tuj tx'otx' tuj tbank'ab k'ij ctzajel wi'ne jun matij c'ixbisabl ex jun matij xitbil cyibaje. 7Ic tza'n jun balun nne'tz tuj chc'ul, ictzun ma tz'etz ju xitbil cye tnam; ya cyja' ttzaj tuj be; ma tz'etz tuj ttanmi tu'n tul xitul cytanmiye; che najel ke tnam tu'n ex minti' xjal cyjel ten cyuj. 8Cyja'tzun, cyk'o'nque cyxbalune ch'i'x twitz, che ok'e ex che uxine tu'n ta'w c'ixc'oj, porque minti'x tumel tu'n tchewix tk'oj Kman ki'j. 9Chi Kman in tma'n: Tuj k'ij oc ttzaj jlu, ctzajel baj tc'u'j rey, icx ke nejenel; ctzajel t-xobil cyi'j ke pal ex bi'x che sec'pajtel keju nno'c cyk'o'n cyib te nsanjele. 10Atzun weye xi nma'ne: Ay Nman, ¿tza'n tten ma che cub t-sbu'na ke xjal aj Jerusalén? Xi tma'na ka tu'n cyank'in tuj txubtxaj, ex atzun ja'lo banin tten spad cyi'j tu'n cycub byo'n. 11Octzun tpon tk'ijlalil jlu, cxel k'met cye xjal aj Jerusalén: Cyja' ttzaj jun cyk'ik' cyak wen tuj tzkij tx'otx', ex ctzajel t-xupin cylugaril ke xjal etzan wu'ne. Pero aju cyk'ik' tzul mya aju in ajben te xupbil tuj triw; 12aju cyk'ik' tzul wu'ne mas nimxix tipun twitzju in ajben te xupbil tuj triw. Cyja'tzun cxel nma'ne cyja': Ja'lo tzul jwisi cyibaj wu'ne. 13Cyque'yinxe ke aj k'oj in bet cytzaj ic tza'n jun muj; aju cycarwaj te cyk'ojbil ic cyten ic tza'n jun xcyakinpaẍ, ex ke cychej masxix che ojkelan ic tza'n ke t'iw in che lipan twitz cya'j. Ay bec'bil kwitz, ma ko najx. 14Akeye aj Jerusalén, cytx'jome aju mya ba'n tuj cyanmiye tu'ntzun cyclete. ¿Jtoj ban tcyaj cycoline cyximbetze mya ba'n? 15Max tuj tnam Dan ex cywi' ke tal witz tuj cytx'otx' aj Efraín in tzaj tkanil mya ba'n tzul cyibaje. 16Cyk'manxe cye mastl nasyon ex cye aj Jerusalén cyja': Tuj jun tnam najchak ma che tzaj aj k'oj lu, in che sch'in wen tu'n cyoc tzokpaj k'ojlel cyi'j ke tnam ate' tuj Judá. 17Ic tza'n nno'c cwentin jun cojbil cyu'n xjal, ictzun ma baj cytxolban cyib aj k'oj ti'jele Judá, porque ma jaw cyi'n cyib wi'je. Akine Dios in chin k'mante jlu. 18Aju cymodiye ex aju cybinchbene atzunju ma tzaj k'inte mya ba'n cyi'je ja'lo, aju cybinchbene mya ba'n, atzunju ma tzaj k'inte mya ba'n cyibaje, ic tza'n jun c'abj c'a ma pon ta'w ti'j cyanmiye. 19In jaw nxkutz'in wibe tu'n ta'w c'ixc'oj. Ma tzaj ta'w tuj wanmiye tu'n bis, in putin wanmiye ex mlay chin k'ajene tu'n t-xi nma'ne aju ma nbiye. Ma nbiye tk'ajk'ajel chun ex tk'ajk'ajel cywi xjal in che k'ojin. 20Ma tzul tkanil ti'j nimcu mya ba'n ma tzaj; oc in baj jun in tzaj juntl, cycyakil tnam ya ma che cub baj xitj. Te jurat naj ma che cub xitj cyja ke njxalile ex ma che naj ke cyja xbalun ja. 21¿Jte'tzun k'ijtl chin que'yile ti'j bander yobin twitz cya'j cyu'n aj k'oj, ex tu'n t-xi nbi'ne tk'ajk'ajel twi chun? 22Chi Kman in tma'n: Ke xjal etzan wu'ne miban tz'ocx tuj cywi', minti' ojtzki'n kine cyu'n. Ic cyten ic tza'n ke c'wa'l minti' cynabl ex minti' nne'l cynic' ti'j. O'cx at cynabl tu'n tbant mya ba'n cyu'n, atzunju ba'n, minti' nne'l cynic' ti'j tza'n tten tu'n tbant. 23Xi nque'yine tx'otx' otok tz'oc te minti' ttxolil ex minti' at twitz, xi nque'yine twitz cya'j ex minti'tok spic'un at twitz. 24Xi nque'yine ke nmak witz in che lu'luntok ex cycyakil tal witz in che yucchtok. 25Xi nque'yine minti' jun xjal at ex cycyakil ke chyu'j otok che ex baj ok. 26Xi nque'yine ex aju tbanil tx'otx' otok tz'oc te tzkij tx'otx', ex cycyakil tnam otok che cub baj xitj. Tcyakil jlu o naj tu'n tk'oj Kman xobajilxix. 27Chi Kman in tma'n: Cbajel naj aju at twitz tx'otx' lu, pero mlay cub nxitune tcyakil. 28Cnojel twitz tx'otx' tu'n bis ex c'oquel klolj twitz cya'j, porque atzun jlu o txi nma'ne, o cub nximane; mlay ch'expet nximbetze ex mlay tzic'x ti'j. 29Oc tbinjtz tk'ajk'ajel cywi ke k'ojlel cyjax cyibaj chej ex ke k'ojlel xo'l plech, cycyakil xjal ate' tuj tnam che elex ok, che xe'l ewal cyib tjak' chc'ul ex che jawix ewal cyib cyxol pic; cycyakil xjal cyjel cycolin cytanmi, minti' jun cyjel ten najal tuj. 30Atzun teya tnam Jerusalén o cub xitja, ¿tiku'n nno'c tk'o'na t-xbaluna tbanilxix cyak que'yin? ¿Tiku'n nno'c tk'o'na adorn k'an pwak ti'ja? ¿Tiku'n nno'c tk'o'na tc'a' twitza k'ek que'yin? Nokx gan in baj tbinchan tiba, porque ke xinak in tzalaja cyi'j ma tz'el ic'una cyu'n, nok o'cx in che jyon tumel tza'n tten tu'n tcub byo'na cyu'n. 31In nbi'ne tk'ajk'ajel c'ixc'oj mer ic tza'n tk'ajk'ajel twi jun xu'j oc nnu'l itz'j tnejel tal; a jlu tk'ajk'ajel cywi xjal aj Sión in che wuyin, nne'l cynukpi'n cyk'ab ex in cyma'n: Ay, bec'bil kwitz, ma ko cub numj, ko bel byo'n cyu'n ke byol xjal.

will be added

X\