JEREMÍAS 39

1Tuj tlajin xjaw te tbelajin abk'i ttzyetlen tcawin rey Sedequías tuj Judá, ul Nabucodonosor aju rey te Babilonia, cyuc'ix cycyakil t-soldad, ex baj cytxolban cyib ti'jele tnam Jerusalén. 2Tuj tbelajin k'ij te tcyajin xjaw te tjunlajin abk'i ttzyetlen tcawin Sedequías, ocx cypa'n aj k'oj jun piẍ muro toc ti'j tnam Jerusalén, 3ex cycyakiltzun ke xjal ma' cyoclen ttxlaj rey te Babilonia e ocx tuj tnam ex e cub ten ttzi pwert tcub tuj tmij tnam Jerusalén. Atzun ke jlu: Nergal-sarezer, Samgar-nebo, Sarsequim, aju xjal lu ma'xix toclen, ex tuc'ix juntl Nergal-sarezer ax icx ma'xix toclen ttxlaj rey, cyuc'ix mastl nejenel ma' cyoclen ttxlaj. 4Tejtzun tlonte Sedequías ex ke t-soldad aju in baj, e ex ok tuj tnam te konic'an, ttzi pwert tcubsa'n t-xol cabe muro tuj be nne'x tuj tkan tawal rey, ex atzun be xi cyi'n, aju in pon tuj chk'ajlaj te nima Jordán. 5Pero e je'x lpe' ke soldad cye aj Caldey cyi'j ex cub ti'j Sedequías cyu'n tuj chk'ajlaj te tnam Jericó; tzyettzun cyu'n ex xi cyi'n tuj tnam Ribla tuj cytx'otx' aj Hamat, porque atzun ta'tok rey te Babilonia, ex atzun cub t-sentens Sedequías tu'n Nabucodonosor. 6Axtzun tuj Ribla ex twitzx Sedequías, e cub byo'n ke tc'wa'l cyuc'ix cycyakil xjal ma' cyoclen tuj Judá. 7Te tibajxi e jatz k'i'n ke tbak' twitz Sedequías ex oc c'alo'n tu'n caden, tu'ntzun t-xi k'i'n tuj Babilonia. 8Oc cykoptz'i'n aj Caldey k'ak' ti'j tja rey ex cyi'j ke ja ate' tuj tnam ex cub cytilin muro toc ti'jele tnam Jerusalén. 9Ax icx te Nabuzaradán aju nejenel cye t-soldad rey te Babilonia, e je'x ti'n ke xjal pres, akeju ch'intl otok che cyaj ten, ax icx e je'x ti'n keju otok txi cyk'on cyib tuj cyk'ab aj Caldey; cycyakiltzun e je'x ti'n tuj Babilonia. 10Pero e cyaj tk'o'n Nabuzaradán junjun xjal tuj tx'otx' Judá, akeju mas tal mebaxix ex minti' ch'in at cye, ex xi tk'o'n cytx'otx' ex tkan uva cye. 11Otok cyaj tma'n Nabucodonosor aju rey te Babilonia, te Nabuzaradán aju nejenel cye t-soldad, jun orden ti'j Jeremías cyja': 12K'intza ex cwentin oca, mi'n tbinchaya mya ba'n ti'j, nok o'cx binchama tcyakil aju ctzajel tma'n teya. 13Entons, ate Nabuzaradán aju nejenel cye t-soldad rey, tuc'ix Nabusazbán aju nejenel cye keju in che ajben te rey, ex Nergal-sarezer aju nejenel cye aj sanjelal, cyuc'ix mastl xjal at cyoclen ttxlaj rey te Babilonia, 14xi cyma'n tu'n tetz k'i'n Jeremías tuj ttxa'n cype'n soldad, ex xi cyk'o'n tuj tcwent Gedalías aju tcy'ajal Ahicam ex tal tchman Safán, tu'n t-xi' k'olte te max tja. Cyja'tzun cyaj ten Jeremías najal cyxol ke ttanmil. 15Tej tocxtok Jeremías tuj pres ttxa'n cype'n ke soldad xk'ukil tja rey, aju ttxa'n pe'n tocx tujxi, tzaj yolin Kman tuc'il ex tma cyja': 16Txi'ya ex k'manxa te Ebed-melec aju aj Etiopía: Chitzun Kman aju Tajaw Tcyakil ex Cydios aj Israel cyja': Cjapunel wu'ne aju o txi nma'ne tu'n tbant ti'j tnam lu; ctzajel mya ba'n ti'j ex mya jun ba'n, ex c'oquel tque'yina oc tjapun jlu. 17Pero tuj tk'ijlalil lu oc cletela wu'ne, mlay cub tz'aka tuj cyk'ab xjal lu, akeju in xoba cywitz. Akine Dios in chin k'mante jlu. 18Axix toc oc cletela wu'ne tu'n mi'n tcub byo'na cyu'n, oc cletela tu'nju ma tz'oc ke' tc'u'ja wi'je. Akine Dios in chin k'mante jlu.

will be added

X\