JEREMÍAS 37

1Ate Nabucodonosor aju rey te Babilonia oc k'onte Sedequías aju tcy'ajal Josías te rey tuj Judá, te t-xel Jeconías aju tcy'ajal Joacim. 2Pero minti' xi tniman Sedequías tyol Kman, aju tzaj tma'n te Jeremías aju t-sanjel, ax icx ke xjal ma' cyoclen ate' ttxlaj, ex cycyakil xjal minti' xi cyniman. 3Xitzun t-sama'n Sedequías Jucal aju tcy'ajal Selemías, ex pal Sofonías aju tcy'ajal Maasías, tuc'il Jeremías tu'n t-xi cyma'n te cyja': Cubsana ki'je twitz Kman aju Kdios, che chi. 4Na'nxtok tocx k'o'n Jeremías tuj pres, cyja'tzun in bettok cyxol xjal ex mi a'l jun in mayonte te. 5Tej cybinte aj Babilonia, akeju in che k'ojintok ti'j tnam Jerusalén, ka otok che etz ke t-soldad Faraón tuj Ejipt, cub be cyu'n. 6Tzajtzun yolin Kman tuc'il Jeremías aju t-sanjel, ex xi tma'n te tu'n t-xi tma'n cye keju e tzaj t-sama'n rey: 7Cymanxe te rey te Judá aju saj samante cyeye kanilte weye, chi Kman cyja': Ke t-soldad Faraón, akeju otok che tzaj tu'n cy-onin cyi'je tuj k'oj, ya ma che aj meltz'aj tuj Ejipt. 8Che oquel tzokpaj aj Babilonia juntl maj k'ojlel ti'j tnam Jerusalén; ctzyetel cyu'n ex c'oquel cyk'o'n tk'ak'al. 9Akine Dios in chin k'mante jlu: Mi'n cub cysbun cyibe ex mi'n ke' cyc'u'je ka cxel cycolin aj Babilonia tu'n cyk'ojin cyi'je, porque mlay txi cycolin. 10Masque cub cyi'j cycyakil cysoldad aj Babilonia cyu'ne, akeju in che k'ojin cyi'je, ex masque cyaj ten nok junjun soldad, akeju otok che c'ixbi, pero akeju soldad lu che jawil we' ex c'oquel cyk'o'n tk'ak'al tnam, chi Kman, che chicuye te rey, chi Jeremías. 11Tej tel cypa'n cyib cysoldad aj Babilonia ti'j tnam Jerusalén tu'n tlaj otok cybi ka cyja'tok cytzaj ke t-soldad Faraón, 12etz Jeremías tuj tnam tu'n t-xi' tuj tx'otx' Benjamín, tu'n tc'monte ch'in tetzbil cyxol ttanmil. 13Pero tej tpon ttzi tpwertil tnam, Benjamín tbi, tzaj tzyu'n tu'n Irías aju tcy'ajal Selemías ex tal tchman Hananías, aju toctok te nejenel cye jun c'loj soldad, ex xi tma'n te: —Ma txi tk'on tiba cyuc'il aj Babilonia. 14Atzunte Jeremías xi ttzak'we'n: —Mi'n, mya ax toc jlu, porque mlay tz'aj nk'on wibe cyuc'il aj Babilonia. Pero ate Irías minti' xi tbi'n jlu, nok o'cx tzyet Jeremías tu'n ex xi ti'n cywitz ke xjal ma' cyoclen. 15Atzun cye xjal ma' cyoclen tzaj cyk'oj ti'j Jeremías ex xi cyma'n tu'n tbaj asyalin ex tu'n tocx cyk'o'n tuj pres ma tja Jonatán aju aj tz'ibal te rey, porque aju ja lu otok tz'oc te presbil. 16Maxtzun pon presin Jeremías tuj jun presbil tjak' tx'otx', ex atzun o ten nim k'ij. 17Xitzun tma'n rey Sedequías tu'n t-xi k'ibaj Jeremías, ex tej tpon k'i'n twitz rey max tja, xi tkanin rey te tuj ewaj: —¿Atpe yol ma tzaj tma'n Kman teya? Atzunte Jeremías xi ttzak'we'n: —At, ex atzun jlu: Cxel k'o'na tuj tk'ab rey te Babilonia. 18Ax icx xi tkanin Jeremías te rey Sedequías: —¿Alcye wile ma nbinchaye twitza Tat Rey, ex ka cywitz ke xjal ma' cyoclen ate' ttxlaja, ex ka cywitz ke xjal, tu'nju ma chin ocx cyk'o'ne tuj pres? 19¿Jatumtzun ate' keju nno'c cyk'on cyib te t-sanjel Dios, akeju e k'mante teya ka mlay tzul rey te Babilonia k'ojlel cyi'je ex mi ti'j tnam lu? 20Ja'lo Tat Rey, bintza nyole ex k'ontz twi'ya ti'j nkanbetze cxel nkanine teya: Mi'n tak'a ambil tu'n nxi k'i'ne juntl maj tja Jonatán aju aj tz'ibal teya, porque mya yaj jacu chin cyime ma chixin. 21Tmatzun rey Sedequías tu'n ax tu'n tpresit Jeremías tuj ttxa'n cype'n soldad xk'ukil tja rey, aju ttxa'n pe'n tocx tujxi ja, ex tu'n t-xi k'o'n jun twa pan teyle junjun k'ij ti'j pan in c'ayinjtz cyu'n ke binchal pan. Bant jlu tejxi tbaj tcyakil pan tuj tnam. Cyja'tzun tten cyaj ten Jeremías ttxa'n cype'n soldad tujxi ja.

will be added

X\