JEREMÍAS 36

1Tuj tcyajin abk'i toclen Joacim aju tcy'ajal Josías te rey tuj Judá, tzaj yolin Kman tuc'il Jeremías ex tma cyja': 2K'intza jun botz' u'j ex tz'ibancuya tcyakil yol o txi nma'ne teya cyi'j aj Israel, cyi'j aj Judá ex cyi'j mastl nasyon, atxix tej nyoline tnejel maj tuc'ila, tej tten Josías te rey asta ja'lo. 3Mya yajcu oc cybinte aj Judá tcyakilju mya ba'n o cub nximane tu'n ttzaj nsama'ne cyibaj, jacu cyaj cycolin tu'n cybinchante mya ba'n, entons ax icx weye jacu cub nnajsa'ne cyil ex cybinchben mya ba'n, chi Dios. 4Tzajtzun txco'n Baruc tcy'ajal Nerías tu'n Jeremías, ex oc ten Jeremías k'malte tcyakil yol otok tzaj k'ma'n te tu'n Kman, atzunte Baruc cub ttz'iban twitz jun botz' u'j. 5Te tibajxi xi tma'n Jeremías te Baruc cyja': Weye minti' permis tu'n nxi'ye tuj tja Dios, 6cyja'tzun, txi'ya tuj tja Dios tuj jun k'ij oc in cub cyyo'n xjal we'yaj, ex sch'in jawa aju yol tz'iban twitz u'j, aju xi nma'ne teya tu'n tcub ttz'ibana, tu'ntzun cybinte cycyakil xjal aju tyol Kman, ex tu'n cybinte cycyakil aj Judá, akeju che ul tuj tja Dios. 7Mya yaj jacu che oc ten cubsal twitz Kman, ex kape jacu cyaj cycolin cybinchben mya ba'n, porque xobajilxix ttx'u'jil Kman ex tk'oj ma tzaj tma'n ti'j tnam lu, chi Jeremías. 8Tbinchatzun Baruc tcyakilju otok txi k'ma'n te tu'n Jeremías aju t-sanjel Dios. Xi' tuj tja Dios ex jaw t-sch'i'n aju tz'iban tuj jun botz' u'j. 9Tuj tbelajin xjaw te tjwe'yin abk'i toclen Joacim aju tcy'ajal Josías te rey tuj Judá, etz jun orden tu'n cye aj Jerusalén ex cye xjal otok che tzaj cyuj mastl tnam te Judá, tu'n tcub cyyo'n we'yaj twitz Kman. 10Xi'tzun Baruc tuj ttxa'n pe'n ma' tjaw te tja Dios, jatum nno'cx be ttzi Ac'aj Pwert, ex max jatum ta' tcwart Gemarías aju aj tz'ibal, aju tcy'ajal Safán; ex cywitz cycyakil xjal jaw t-sch'in Baruc tyol Jeremías, aju tz'iban twitz u'j. 11Tej tbinte Micaías aju tcy'ajal Gemarías ex tal tchman Safán tcyakil tyol Kman jaw t-sch'i'n Baruc twitz u'j, 12xi' max tuj tja rey jatum ta' tcwart aj tz'ibal te rey, ex jatum cychmon cyib ke xjal ma' cyoclen. Atzun ke jlu: Elisama aju aj tz'ibal te rey, Delaía aju tcy'ajal Semaías, Elnatán aju tcy'ajal Acbor, Gemarías aju tcy'ajal Safán, tuc'ix Sedequías aju tcy'ajal Hananías cyuc'ix mastl xjal ma' cyoclen. 13Xi ttx'olba'n Micaías tcyakilju otok tbi tej tjaw t-sch'i'n Baruc cywitz xjal aju yol tz'iban twitz ju u'j. 14Atzun cye xjal ma' cyoclen xi cysama'n Jehudí tuc'il Baruc, tu'n t-xi tma'n te tu'n tpon cyuc'il ex tu'n tpon ti'n aju u'j otok jaw t-sch'i'n cywitz xjal. Ate Jehudí tcy'ajal Netanías, tal tchman Selemías ex ttxca tchman Cusi. Xitzun ti'n Baruc aju u'j ex pon cyuc'il xjal ma' cyoclen, 15atzun cye xi cyma'n te: —Kecuya ex sch'in jawa kwitze, tu'n kbinteye aju yol tz'iban twitz u'j. Jawtzun t-sch'i'n Baruc, 16ex tej cybinte tcyakil yol lu, teyle junjun baj cyque'yin tuj cywitz, in che xob ex cyma: —Il ti'j tu'n t-xi ktxolba'n tcyakil jlu te rey. 17Te tibajxi xi cyma'n te Baruc: —K'mantza keye tza'n tten cub ttz'ibana tcyakil jlu. ¿Apetzun Jeremías tzaj k'mante teya tu'n ttz'ibana ju yol lu? 18Atzunte Baruc xi ttzak'we'n: —Twitzelcu Jeremías tzaj k'mante tcyakil jlu weye, ex atzun weye ncu'xxi ntz'ibane tu'n tint tuj jun botz' u'j. 19Xitzun cyma'n te Baruc: Cyxi'ye ewal cyibe, aya tuc'ix Jeremías, tu'ntzun mi a'l jun ba'n tbinte jatum ate'ye. 20Cyaj cyk'o'n xjal ma' cyoclen ju u'j tuj tcwart Elisama aju aj tz'ibal te rey, ex e je'x max tuj tja rey tu'n t-xi cytx'olba'n te tcyakil aju otok cybi. 21Xitzun sama'n Jehudí tu'n rey k'ilte u'j, ma tuj tcwart Elisama aju aj tz'ibal te rey, ex tej tul ti'n Jehudí, jaw t-sch'i'n twitz rey ex cywitz cycyakil xjal ma' cyoclen ate' ttxlaj. 22Tu'nju atzun ate'tok tuj tbelajin xjaw, entons maxtok ta' rey tuj jun cwart in ajben tu'n tuj tk'ijlalil che'w, ex attok jun tcubil xk'a'l in c'ant tcub twitz. 23Oc in baj t-sch'i'n Jehudí ox ex ka cyaje piẍ u'j, nne'lxi tc'apu'n rey tu'n cchil ex ncubxi tpatun tuj tcubil xk'a'l. Cyja'ylex o tenba tu'n, tejxi tcub baj tpatun tcyakil u'j. 24Minti' tzaj t-xobil rey, mi ke xjal ma' cyoclen, ex mi keju e bin ti'j tej tjaw sch'i'n u'j, ex minti' el cysbit'un cyxbalun cyi'j. 25Masque e cubsan Elnatán tuc'ix Delaía ex Gemarías twitz rey tu'n mi'n tcub tpatun u'j, pero minti' xi tniman cyyol, 26nok o'cx xi tma'n te Jerameel aju tcy'ajalx, ex te Seraías aju tcy'ajal Azriel, ex te Selemías aju tcy'ajal Adbeel, tu'n cyxi' tzyulte Jeremías aju t-sanjel Dios, tuc'ix Baruc aju aj tz'ibal te Jeremías, tu'ntzun cyocx k'o'n tuj pres. Pero e je'x ewan tu'n Kman. 27Te tibajxi tcublen tpatun rey u'j jatum tz'iban aju yol otok txi tma'n Jeremías te Baruc, tzaj yolin Kman tuc'il Jeremías cyja': 28K'intza juntl botz' u'j ex tz'iban cuba juntl maj tcyakil yol tz'ibamaj twitz tnejel, aju cub tpatun Joacim aju rey te Judá. 29Ex k'manxa te rey: Chi Kman teya cyja': Ma cub tpatuna aju botz' u'j ex ma tmaya: ¿Tiku'n ma cub ttz'iban Jeremías twitz u'j ka tzul rey te Babilonia tu'n tnaj tnam lu tu'n, ex ka minti' xjal cyjel ten tuj tx'otx' lu, mi alumaj, chiya? 30Cyja'tzun akine Dios in chin k'mante jlu teya Joacim, aya rey te Judá: Mlay che oc ke tiyjila te rey tu'n cyocx ke' tuj tk'ukbil David. Oc tcyima, aju t-ximlala cucx cyjel pale' ti'j k'ij ex ti'j tk'ab che'w, 31ex tzul nk'o'ne castiw tibaja, cyibaj ke tiyjila ex cyibaj ke xjal ma' cyoclen ate' ttxlaja, tu'n tlaj cyile. Cbel nk'o'ne tcyakil txcaj castiw cyibaje ex cyibaj ke xjal najl tuj Jerusalén ex cyibaj aj Judá, ic tza'n o nmaye cye, tu'nju minti' ma txi cybi'ne nyole, chicuya te rey, chi Kman te Jeremías. 32Tzajtzun ti'n Jeremías juntl botz' u'j ex xi tk'o'n te Baruc aju tcy'ajal Nerías ex aj tz'ibal te. Cu'x ttz'iban Baruc tcyakil yol xi tma'n Jeremías te, ax ic tza'n tz'ibamajtok twitz tnejel botz' u'j aju cub tpatun rey Joacim. Nimcu mastl yol oc ttz'aksa'n Jeremías, ex ax tnabl ic tza'n tnejel.

will be added

X\