JEREMÍAS 35

1Tej toctok Joacim aju tcy'ajal Josías te rey tuj Judá, tzaj yolin Kman tuc'il Jeremías ex tma cyja': 2Txi'ya jatum najl ke tiyjil Recab, yolina cyuc'il, k'inxa ke tuj jun tal cwart at tuj njaye, ex k'onxa cyc'a ta'l twitz uva, chi Knan. 3Inxtzune k'ilte Jaazanías, (aju tcy'ajal juntl xjal Jeremías tbi ex tal tchman Habasinías) cyuc'ix ke terman, ke tc'wa'l ex cycyakil ke tiyjil Recab, 4ex e je'x wi'ne max tuj tja Dios, tuj cycwart ke tcy'ajal Hanán aju tcy'ajal Igdalías aju t-sanjel Dios. Aju cwart lu junx toc tuc'il cycwart ke nejenel tuj tja Dios, ex tjax tibaj tcwart Maasías aju tcy'ajal Salum, aju cwentil ttzi tja Dios. 5Xitzun nk'o'ne ke jarriy ex ke tal copa nojni ke tu'n ta'l twitz uva, cye tiyjil Recab, ex xi nma'ne cye: Che c'ane ta'l twitz uva. 6Atzun cye tzaj cytzak'we'n: Keye miban ko c'ane ta'l twitz uva, porque aju ktzan kxe'chele Jonadab aju tcy'ajal Recab, cyaj tma'n keye cyja': Mi'n txi cyc'a'ne ta'l twitz uva, mi akeye ex mi ke cyiyjile che ul itz'j te tibajxi, 7ex mi'n jaw cybincha'ne cyjaye, mi'n cu'x cyawa'ne cyawale, mi'n cu'x cyawa'ne tkan uva ex mi'n cub cyetzane jun piẍ tx'otx', nok o'cx che najale cyuj ke ja xbalun ja, ex nok che betje'ye, tu'ntzun cyank'ine nim k'ij twitz tx'otx', chi Jonadab keye. 8Atzun keye ma txi knimane tcyakilju cyaj tma'n ktzan kxe'chele Jonadab aju tcy'ajal Recab, ex bajx txi kc'a'ne ta'l twitz uva, tza'nx keye ax icx ke kxu'jile ex ke kc'wa'le, 9ex minti' in jaw kbincha'ne kjaye tu'n kank'ine tuj; minti' tkan uva awa'n ku'ne ex minti' ktx'otx'e, mi kawale. 10In ko ank'ine cyuj ke ja xbalun ja, ex in japun ku'ne tcyakilju cyaj tma'n ktzan kxe'chele Jonadab. 11Pero tej toc tzokpaj Nabucodonosor aju rey te Babilonia ti'j tx'otx' lu, cub kximane tu'n kule tzalu tuj Jerusalén, tu'ntzun kcolpaje cywitz ke soldad cye aj Caldey ex cye aj Siria, ex ax ma ko cyaj tene tzalu tuj Jerusalén, che chi tiyjil Recab. 12Tzajtzun yolin Kman tuc'il Jeremías ex tma: 13Akine Dios aju Tajaw Tcyakil ex Cydios aj Israel cxel nma'ne jlu teya: Txi'ya ex k'manxa cye xjal aj Judá ex aj Jerusalén: ¿Maj mlayx bant cynimane ke nleye? Akine Dios in chin k'mante jlu. 14Aju orden cyaj tk'o'n Jonadab aju tcy'ajal Recab cye tiyjil, tu'n mi t-xi cyc'a'n ta'l twitz uva, ma japun cyu'n, ax icx ja'lo minti' in xi cyc'a'n porque ma txi cyniman aju cyaj tma'n ktzan cyxe'chel cye. Atzun weye cucx in xi nma'ne ke nleye cyeye, pero minti' in chinx cynimane. 15Ela' maj o che'x nsama'ne ke nsanjele, akeju nmajene, tu'n t-xi cyma'n cyeye cyja': Cycolin cyaje cybeye mya ba'n ex cybinchame ba'n. Mi'n che'x lpe'ye cyi'j cydios xjal ex mi'n che c'ulune cywitz, tu'ntzun cucx cyank'ine twitz tx'otx' o txi nk'o'ne cyeye ex cye ktzan cyxe'chele, nchiye cyeye; atzun cyeye minti' ocx tuj cywi'ye ex minti' inx cynimane. 16Ke tiyjil Jonadab aju tcy'ajal Recab ma japun ley cyu'n aju cyaj tma'n ktzan cyxe'chel cye, atzun cyeye, akeye aj Israel, minti' in chinx cynimane. 17Cyja'tzun akine Dios aju Tajaw Tcyakil ex Cydios aj Israel cxel nma'ne jlu: Ctzajel wi'ne cycyakil txcaj c'ixbisabl cyibaj aj Judá ex cyibaj keju najlke tuj Jerusalén, aju o txi nma'ne cye, porque o txi nma'ne nyole cye pero minti' ma tz'ocx tuj cywi', o chin txocone cyi'j ex minti' in chin tzaj cytzak'we'n, chi Dios. 18Ax icx xi tma'n Jeremías cye tiyjil Recab: Ate Kman aju Tajaw Tcyakil ex Cydios aj Israel chi cyja': Tu'nju ma txi cynimane tley Jonadab aju ktzan cyxe'chele, ma bant cyu'ne ic tza'nx ju xnak'tzbil tzaj tk'o'n cyeye, ex ma japun cyu'ne tcyakil aju cyaj tma'n cyeye, 19cyja'tzun chi Dios aju Tajaw Tcyakil ex Cydios aj Israel: Axix toc, cucx ctel jun tiyjil Jonadab aju tcy'ajal Recab tu'n tajben weye.

will be added

X\