JEREMÍAS 34

1Ate Nabucodonosor aju rey te Babilonia, cyuc'ix ke t-soldad ex ke xjal ate'cxtok tjak' tcawbil akeju e tzaj cyuj cycyakil nasyon twitz tx'otx', tej in che k'ojintok cyi'j aj Jerusalén ex cyi'j ke tnam ate' ti'jele, tzajtzun yolin Kman tuc'il Jeremías chi cyja': 2Akine Dios aju Cydios aj Israel cxel nma'ne teya jlu: Txi'ya tuc'il Sedequías aju rey cye aj Judá, ex k'manxa te: Chitzun Kman cyja': Cxel nk'o'ne tnam lu tu'n tcyaj tjak' tcawbil rey te Babilonia, ex c'oquel tk'o'n tk'ak'al. 3Atzun teya, mlayx tzokpaja tuj tk'ab; ctzyetela cyu'n xjal ex cxel k'o'na tuj tk'ab Nabucodonosor, c'oquel tque'yina twitz, c-yolila tuc'il ex cxel k'i'na max tuj Babilonia. 4Aya Sedequías rey cye aj Judá, bintza aju cxel nma'ne teya: Mlay cub byo'na tu'n spad. 5Tuj txubtxaj cymela, ex cbel patun tc'oc'jal tibaja oc tcyima ic tza'n cub patun cyibaj ktzan t-xe'chela tej cycyim, akeju e cawin tej na'nxtok toc teya te rey; che ok'el xjal ti'ja ex oc cyma' cyja': Ay Tat, che chilo. Akine Dios in chin k'mante jlu, ex cbantel wu'ne icju. 6Xitzun tma'n Jeremías aju t-sanjel Dios tcyakil jlu te rey Sedequías tuj Jerusalén 7tej in che k'ojintok ke t-soldad rey te Babilonia ti'j tnam Jerusalén, ti'j tnam Laquis ex ti'j tnam Azeca. O'cxtzun ke tnam lu na'nxtok ttzyet tu'n Nabucodonosor, akeju toc muro cyi'j tuj Judá. 8Tzaj yolin Kman tuc'il Jeremías tcyajlenxi bant ti'j jun tyol rey Sedequías cyuc'il aj Jerusalén, tu'n cytzokpet ke xjal tzyu'n te majen. 9Aju yol otok bant ti'j, tu'n cyxi tzokpet ke xinak ex xu'j aj Hebrey akeju tzyu'ntok te majen, tu'ntzun mi'n toc jun xjal Judiy te jumajx te tmajen juntl xjal ax Judiy. 10Cycyakil ke nejenel ex cycyakil tnam xjal xi cyniman aju yol otok bant ti'j cyu'n, ex xi cytzokpi'n cymajen, ex ya minti' oc cyk'o'n il cyi'j tu'n cyak'nan ti'j cyak'un. 11Pero te tibajxi ch'expet cyximbetz tu'n tlaj t-xilen cytzokpi'n ke, ex oc cyk'o'n il cyi'j juntl maj tu'n cyoc te cymajen. 12Tzajtzun yolin Kman tuc'il Jeremías ex tma cyja': 13Akine Dios aju Cydios aj Israel, cyaj bant ti'j jun nyole cyuc'il ktzan cyxe'chele ojtxi tej cyetz wi'ne tuj Ejipt jatum in che ajbentok te majen, ex xi nma'ne cye cyja': 14Tuj wukchak abk'i cxel cytzokpi'ne nok alcyex aj Hebrey otok txi tc'ayin tib te majen cyeye, nok kak abk'i che ajbel cyeye ex te tibajxi che xel cytzokpi'ne, nchiye xi nma'ne cye, pero minti' ocx tuj cywi' ktzan cyxe'chele ex minti' inx cyniman. 15Atzun cyeye otok baj cych'expu'ne cyximbetze ex otok bant cyu'ne aju in chin tzalaje ti'j, tu'nju otok txi cytzokpi'ne cyxjalile, akeju cyoctok te cymajene, ex otok txi cytziyane jlu nwitze tuj njaye in ajben te nimsabl nbiye. 16Pero te tibajxi ma baj cych'expu'ne cyximbetze, ex ma chin oc cyk'o'ne te minti' woclene, tu'nju ma che tzaj cyi'ne juntl maj cymajene, akeju otok txi cyk'o'ne ambil cye tu'n cyxi tzokpet, ex ma che oc cylajwersine tu'n cyoc juntl maj te cymajene. 17Cyja'tzun akine Dios cxel nma'ne jlu: Akeye minti' ma chinx cynimane, minti' ma txi cytzokpi'ne cyxjalile akeju tzyu'n te cymajene; tu'ntzun jlu che xel ntzokpi'ne tu'n cycyime tuj k'oj, tu'n tx'u'j yabil ex tu'n we'yaj, ex che elel ic'une cyu'n cycyakil xjal cyuj cycyakil nasyon twitz tx'otx'. Akine Dios in chin k'mante jlu. 18Tej tbant ti'j jun yol nwitze cyu'n ke nejenel cye aj Judá ex cye aj Jerusalén, cyuc'ix ke xjal at cyoclen ttxlaj rey, cyuc'ix ke pal ex cyuc'ix mastl xjal, cub cyi'n tmij jun tal tman wacẍ ex cub cyk'o'n te cabe piẍun tten ex e ocxtzun bet cyxol cabe piẍ wacẍ lu, te cyuwsabl yol, pero jurat naj ma tz'el cyic'un aju yol cyaj bant ti'j cyu'n, ex minti' ma japun cyu'n aju xi cytzi'yan. 20Cyja'tzun che xel nk'o'ne tu'n cycub tz'ak tuj cyk'ab aj k'oj cyi'j, akeju cyaj tu'n cycub byonte cye, ex aju cyximlal c'ajbel te cychi' ke jil ba'n che lipan twitz cya'j, ex te cychi' ke txcup te tjak' c'ul. 21Ax icx te Sedequías aju rey cye aj Judá, cyuc'ix ke xjal at cyoclen ttxlaj, che xel nk'o'ne tuj cyk'ab aj k'oj cyi'j, akeju cyaj tu'n cycub byonte cye, ex tuj cyk'ab ke t-soldad rey te Babilonia, akeju ma txi cycolin ch'in tu'n cyk'ojin cyi'j. 22Pero cxel nma'ne cye tu'n cyajtz meltz'aj k'ojlel ti'j tnam lu; che oquel tzokpaj ti'j, ctzyetel cyu'n ex c'oquel cyk'o'n tk'ak'al. Ax icx mastl tnam ate' tuj Judá, bi'x che bel xitj ex mi jun xjal cyjel ten cyuj. Akine Dios in chin k'mante jlu.

will be added

X\