JEREMÍAS 32

1Tzaj yolin Kman tuc'il Jeremías tuj tlajin abk'i ttzyetlen tcawin Sedequías tuj Judá ex tuj twajxaklajin abk'i ttzyetlen tcawin Nabucodonosor. 2Tuj tk'ijlalil lu in che k'ojintok t-soldad rey te Babilonia ti'j tnam Jerusalén, ex atzunte Jeremías aju t-sanjel Dios presintok tuj ttxa'n cype'n ke soldad xk'ukil tja rey te Judá, aju ttxa'n pe'n tocx tujxi ja, 3porque otok txi tma'n rey Sedequías tu'n tocx presin Jeremías tu'n tlaj xi tma'n cyja': Chi Kman: Cxel nk'o'ne ambil tu'n ttzyet tnam lu tu'n rey te Babilonia ex tu'n tcyaj tjak' tcawbil, 4ex mlay tzokpaj rey Sedequías tuj cyk'ab aj Caldey; ctzyetel cyu'n ex cxel cyk'o'n tuj tk'ab rey te Babilonia; che yolil cabe rey lu ex c'oquel cyque'yin cywitz. 5Cxel k'i'n Sedequías tu'n Nabucodonosor max tuj Babilonia ex maxtzun cyjel ten nim abk'i ocxi tcyim. Masque che k'ojine cyuc'il aj Caldey pero mlayx che cambane, chi Dios, chi Jeremías. 6Ax icx xi tma'n Jeremías: Ma tzaj yolin Kman wuc'ile ex ma tzaj tma'n weye cyja': 7Tzul Hanameel aju tcy'ajal Salum aju terman tmana, k'malte teya tu'n tcyaj tlak'o'na jun piẍ ttx'otx' ta' tuj Anatot, porque aya mas at toclena ti'j tu'n tcyaj tlak'o'na tu'nju at t-xilena tuc'il, chi Kman. 8Ic tza'nx otok tzaj tma'n Kman weye, ultzun Hanameel wuc'ile ttxa'n cype'n ke soldad xk'ukil tja rey, ex tzaj tma'n weye cyja': Lak'o'n cyaja ntx'otx'e ta' tuj Anatot tuj cytx'otx' tiyjil Benjamín, porque aya at toclena ti'j tu'n tcyaj tlak'o'na tu'n toc te tetzbila, chi Hanameel weye. Eltzun nnic'e ti'j ka tu'n Kman jlu, 9ex cyaj nlak'o'ne ttx'otx' Hanameel aju tcy'ajal terman nmane. Xi nk'o'ne wuklaj sak pwak te, porque atzun twi tx'otx' japun. 10Te tibajxitzun bant tu'jil wu'ne, oc sey ti'j, e jyet junjun testiw wu'ne tu'n cypirmarin ti'j ex cub nmalo'ne sak pwak tuj jun balans. 11Xitzun wi'ne tu'jil tx'otx' tz'iban tcyakil tuj, seyarimaj ex baltz'imaj, tuc'ix juntl copya cucx catl, 12ex xi nk'o'ne te Baruc aju tcy'ajal Nerías ex tal tchman Maasías; xi nk'o'ne te twitz Hanameel aju wermaniye, cywitz ke testiw otok che pirmarin ti'j ex cywitz cycyakil xjal Judiy k'uklke'tok ttxa'n cype'n soldad xk'ukil tja rey. 13Cywitztzun ke jlu xi nma'ne te Baruc cyja': 14Ate Kman aju Tajaw Tcyakil ex Cydios aj Israel chi cyja': K'inxa aju tu'jil tx'otx' baltz'imaj, tuc'ix juntl copya cucx catl, ex c'u'nxa tuj jun tal xar tu'ntzun tten nim k'ij, 15porque chi Kman aju Tajaw Tcyakil ex Cydios aj Israel cyja': Tzul tk'ijlalil che lok'ol juntl maj xjal cyi'j ke ja, ke cojbil ex ke tkan uva tuj tx'otx' lu. 16T-xilenxitzun nk'o'ne tu'jil tx'otx' te Baruc aju tcy'ajal Nerías, in oc tene na'l Dios cyja': 17Aya Nman Dios, tuc'il nim tipumala bant cya'j ex tx'otx' tu'na. Minti' jun mlaywit bant tu'na. 18In tzaj tyec'una tc'ujlalila cye ela' mil xjal, pero ax icx in cub tk'o'na cycastiw ke c'wa'lbaj tu'n tlaj cyil ktzan cyman. Aya Dios, nimxix toclena ex at tipumala tu'n tbant tcyakil tu'na, aju tbiya atzun jlu: Kman Tajaw Tcyakil. 19Nimxix tnabla ti'j aju in cub t-ximana ex ma'xix cyxilen ke tbinchbena in che bant, in tila tcyakil aju in bant cyu'n xjal, tu'n t-xi tk'o'na chojbil cye ic tza'nx cybinchben ex ic tza'nx cyak'unben. 20Tu'na e bant ke señ ex ke binchben nim cyipumal tuj Ejipt, ex cucx tbant tu'na ja'lo cyxol aj Israel ex cyxol cycyakil xjal; cyja'tzun, bi'maj tbiya tuj tcyakil twitz tx'otx' ex cucx ja'lo. 21Tuc'il nim tipumala e etz ti'na aj Israel tuj Ejipt, akeju etzan tu'na, e bant ke señ ex ke binchben nim cyipumal tu'na, cyja'tzun tzaj cyxobil cycyakil xjal. 22Xi tk'o'na tx'otx' lu cye aj Israel, aju tx'otx' tbanil ex k'inun tx'otx', ic tza'nx otok txi ttziyana cye ktzan cyxe'chel. 23Tejtzun cyul tuj tx'otx' lu ex tej toc te cye, minti' xi nimana cyu'n, minti' xi cyniman ke tleya ex mi jun tyola japun cyu'n, aju xi tma'na cye. Cyja'tzun ma tzaj t-sama'na tcyakil c'ixbisabl lu cyibaj. 24Atzun ja'lo ma jaw cybincha'n aj Caldey cyxwetzbil tu'n cyoc tzokpaj k'ojlel ti'j tnam. Tu'n k'oj, we'yaj ex tx'u'j yabil ctzyetel ju tnam lu cyu'n. Aya Nman, lu in tila ya ch'ix tjapun baj tcyakil aju tzaj tma'na. 25Nman, ma tzaj tma'na weye tu'n tlak'et tx'otx' wu'ne ex tu'n tchjet wu'ne cywitz ke testiw, ex ch'ix ttzyet tnam cyu'n aj Caldey, chi Jeremías. 26Tzajtzun ttzak'we'n Kman te Jeremías: 27Akine Dios, Cydios cycyakil xjal, ¿Atpe jun ti'xti mlay bant wu'ne? 28Cyja'tzun cxel nma'ne teya: Cxel nk'o'ne tnam lu tu'n ttzyet cyu'n aj Caldey ex tu'n tcyaj ten tjak' tcawbil Nabucodonosor aju rey te Babilonia. 29Ke aj Caldey in che k'ojin ti'j tnam, ja'lo che oquetz tuj ex c'oquel cykoptz'i'n k'ak' ti'j; cbel tz'e'y cyu'n, cyuc'ix ke ja jatum in cub cypatun storac cywi' twitz Baal ex jatum in cub cyko'n ta'l twitz uva cywitz ke tilbilal nno'c cydiosin; ex tu'n jlu ma tzaj nk'oje cyi'j. 30Atxix t-xe tnejel ke aj Israel ex ke aj Judá o'cx in cybincha'n aju minti' in chin tzalaje ti'j, cucx in tzaj nk'oje cyu'n aj Israel tu'nju in che c'ulun cywitz ke tilbilal cyu'nx in cub cybincha'n. Akine Dios in chin k'mante jlu. 31Atxix tej tjaw binchet tnam lu, ax icx ja'lo, minti' jun maj miwt in tzaj ntx'u'jile ex nk'oje cyu'n. Cyja'tzun cbel naj tnam wu'ne. 32Ma tzaj nk'oje tu'n tlaj tcyakil mya ba'n in cybincha'n aj Israel ex aj Judá, cyuc'ix cyrey, ke nejenel cye, ke pal at cyxol, keju nno'c cyk'on cyib te nsanjele ex cycyakil keju najl tuj Judá ex tuj Jerusalén. 33Ma tz'ajtz cyk'o'n ttzal cyi'j nwitze ex masque cucx in xi nk'o'ne xnak'tzbil cye, minti' ma txi cyniman ex minti' ma txi cybi'n cawbil cye wu'ne. 34Malpe tz'ocx cyk'o'n ke tilbilal ic'bilxix tuj njaye jatum in jaw nimsa'n nbiye, ex tu'n jlu ma tz'ilix njaye cyu'n, 35ex tuj chk'ajlaj Ben-hinom ma jaw cybincha'n ke altar te Baal tu'n tcub cypatun cycy'ajal ex cyme'jel te chojbil twitz Moloc; a jlu ic'unxix wu'ne, minti' xi nma'ne cye ex minti' ul ch'in tuj nximbetze tu'n tbant cyu'n icju, porque tu'n jlu ma cybincha aj Judá mya ba'n nwitze. 36Akeye in cyma'ne ka tu'n tcyaj tnam lu tjak' tcawbil rey te Babilonia tu'n tlaj k'oj, we'yaj ex tx'u'j yabil, atzunte Dios aju Cydios aj Israel in tma'n cyja': 37Che oquel nchmo'ne aj Israel ex che eletz wi'ne cyuj cycyakil nasyon jatum o che pon nsputune tej ttzaj nk'oje ex ntx'u'jile xobajilxix, ex che ajetz wi'ne tu'n cyul tuj lugar lu, tu'ntzun cyank'in tuj txubtxaj. 38Che oquel te jun tnam etzan wu'ne, atzun weye chin oquele te Cydios. 39Wu'ne c'oquel cyanmi ex cyximbetz te junx, tu'ntzun cyniman weye te jumajx, te jun ba'n te cye ex te cye ke cyiyjil che ul itz'j te tibajxi. 40Cyjel bant ti'j jun nyole te jumajx cyuc'il: Cxel ntziyane tu'n cucx tu'n nbinchanteye ba'n cye, ex wu'ne ctzajel nimxix cygan tu'n cyniman weye, tu'ntzun mi tel cypa'ntl cyib wi'je. 41Chin tzalajele oc nbinchanteye ba'n cye; tu'n tcyakil wanmiye ex axix toc wu'ne che ul wi'ne tu'n cynajan tuj tx'otx' lu. 42Porque chi Kman: Ic tza'n o tzaj nsama'ne c'ixbisabl matijxix cyibaj xjal lu, cyja'xtzun ctzajel nsama'ne tcyakil ba'n, ic tza'nx o txi ntziyane cye. 43Ex clak'etel juntl maj tx'otx' cyu'n xjal tuj tnam lu, aju in cyma'ne ka ctzyetel cyu'n aj Caldey ex ka cyjel ten ic tza'n jun tzkij tx'otx' minti' xjal tuj, mi alumaj. 44Che lak'etel tx'otx' ex cbantel cyu'jil tuc'il sey ex cypirm testiw c'oquel cyi'j. A jlu cbantel tuj cytx'otx' aj Benjamín, cyuj ke aldey ti'jele tnam Jerusalén, cyuj ke tnam te Judá, cyuj ke tnam te tiwitz tx'otx', cyuj ke tnam ate' t-xe witz ex cyuj ke tnam ate' tuj tx'otx' Néguev, porque che ajetz meltz'aj wu'ne jatum otok che pon k'i'n pres. Akine Dios in chin k'mante jlu.

will be added

X\