JEREMÍAS 30

1Atzun ke yol lu tzaj tma'n Kman te Jeremías: 2Ate Kman aju Cydios aj Israel in tma'n cyja': Tz'iban cu'xa tuj jun libro tcyakilju yol o txi nma'ne teya, 3porque tzul tk'ijlalil tu'n cyajtz meltz'aj ke xjal etzan wu'ne, ake aj Israel ex ke aj Judá, akeju o che'x k'i'n pres. Wu'ne cbantel tu'n cyul meltz'aj tuj tx'otx' xi nk'o'ne te cyetzbil ktzan cyxe'chel. Akine Dios in chin k'mante jlu. 4Atzun ke yol lu o tma Kman cyi'j aj Israel ex cyi'j aj Judá. 5Chitzun Kman cyja': In binjtz tk'ajk'ajel cywi xjal in che sch'in tu'n cyxobil, in che jaw sec'paj ex mya tuj txubtxaj ate'. 6Cykaninxe: ¿Atpe jun xinak jacu tzul itz'j tal? ¿Tiku'ntzun in wile in jaw cyxkutz'in cyib ke xinak mer ic tza'n jun xu'j oc nnu'l itz'j tal? ¿Tiku'ntzun cycyakil puro spelin ma che oc? 7Ch'ix tul canun k'ij xobajilxix, na'nx ttzaj jun maj icju. Aju k'ij lu c'oquel te jun bis ma'xix cye tiyjil Jacob, pero che cletel. 8Akine Dios Tajaw Tcyakil in nma'ne jlu: Che tzokpetel ke xjal etzan wu'ne tjak' cycawbil ke majnil cye, ex mlay che oc juntl maj te cymajen xjal cyuj junxitl nasyon. 9Nok o'cx che ajbel weye akine Cyman ex Cydios, ex che ajbel te David aju c'oquel nk'o'ne te rey cyxol. 10Akine Dios in chin k'mante jlu: Mi'n che xobe akeye tiyjil Jacob ex ajbel weye, mi'n tzaj cyxobile akeye aj Israel, porque che cletele wu'ne cyuc'ix ke cyiyjile, tuj tnam najchak jatum o che pon k'i'ne. Che ank'ile juntl maj tuj txubtxaj, ex mi jun c'oquel xobtzante cyeye. 11Akine Dios cxel nma'ne jlu: Lu kine atine cyuc'ile tu'n cyclete. Che bajel nxitune cycyakil nasyon jatum otok che baj nsputune, atzun cyeye mlay che naje wu'ne; nok o'cx cbel nk'o'ne cycastiwoye ic tza'nx cybinchbene, ex mlayx tzic'x cyi'je tu'n mi'n tcub cycastiwoye. 12Chi Kman cyja': Aju ẍil toc cyi'je mlayx bant ex minti' k'anbil ti'j c'ixblen toc cyi'je. 13Minti' jun taj onin cyi'je ex minti' k'anbil tu'n cybanixe ti'j ẍil toc cyi'je. 14Ma tzic' cyna'njtze cyu'n cycyakil ke nasyon mojl cyyole cyuc'il, ya minti'tl cyaj cyi'je porque ma che c'ixbiye wu'ne mer ic tza'n tu'n jun aj k'oj cyi'je. Cyuwxix cycastiwoye o cub wu'ne tu'n tlaj nim cybinchbene mya ba'n ex tu'n tlaj cyile nimxix. 15¿Tiku'n in che sch'ine tu'n ta'w ẍil toc cyi'je? Minti' k'anbil ti'j c'ixbisabl toc cyi'je. Tu'n tlaj nimxix cybinchbene mya ba'n ex tu'n tlaj cyile nimxix, cyja'tzun ma nbinchaye jlu cyi'je. 16Pero cycyakil keju ma che baj naje cyu'n, ax icx cye che bajel naj, cycyakil aj k'oj cyi'je che xel k'i'n pres tuj juntl tnam, ex keju in xi cyelk'a'n aju at tuj cytanmiye, ax icx cye cxel elk'a'n aju at tuj cytanmi; keju in che el k'inte aju at cyeye, ax icx cye c'elel k'i'n aju at cye. 17Che banixele wu'ne, c'oquel nk'anine ẍil toc cyi'je masque in cyma'n ke aj k'oj cyi'je ka o cyaj colin tnam Sión ex minti' jun tajbil ti'j. Akine Dios in chin k'mante jlu. 18Chi Kman cyja': Che ul meltz'aj ke tiyjil Jacob wu'ne, akeju o che'x k'i'n tuj juntl tnam, ctzajel k'ak'an nc'u'je ti'j cytanmi, ax che jawil binchet tnam cyibaj cytx'akan ex ax cjawil binchet tja rey jatum tcubtok tnejel. 19Cyuj ke tnam lu che bitzal xjal te ak'bil chjonte te Dios ex cbinjtzel cytzalajbil. Mlay cub naj cyajlal, porque wu'ne cchmetel cybet. Mlay che el ic'un cyu'n xjal, porque wu'ne che jawil nimsa'n. 20Che oquel aj Israel ic tza'n cyten nej; segurxix ctel cytanmi nwitze ex wu'ne cbel cycastiw ke yajlal cye. 21Cyxolxtzun c'eletz jun nejenel cye ex cyxolx c'eletz jun cawil, ex ctzajel wi'ne tu'n ttzaj lak'e', atzunte tzul lak'e' wuc'ile, porque ¿alcye jun jacu tnimari tib tu'n ttzaj lak'e' nwitze? 22Che oquel te jun tnam etzan wu'ne, atzun weye chin oquele te Cydios. Akine Dios in chin k'mante jlu. 23Aju tk'oj Kman ic tten ic tza'n jun cyk'ik' jbal, mer ic tza'n jun xcyakinpaẍ, ex atzun c'oquel juban cyi'j keju binchal mya ba'n. 24Mlay chewix tk'oj Kman; maxi cchewixtel ocxi tbant ex oc tjapun aju ximamaj tu'n. Tzul tk'ijlalil tu'n tel cynic'e ti'j jlu.

will be added

X\