JEREMÍAS 3

1Chi Kman in tma'n: Ka at jun xinak ma cub tpa'n tib tuc'il t-xu'jil ex ka ma moje' xu'j lu tuc'il juntl xinak, ¿jacupe moje' juntl maj tnejel chmilbaj tuc'il xu'j lu? ¿Myapetzun tu'n jlu jacu tz'ilix cytanmiye? Akeye aj Israel, ma cnet nim cyyaẍe, ex atzun ja'lo ¿maj cyaje tu'n cyajtze juntl maj wuc'ile? Chi Kman. 2Cyque'yinxe cywi' ke tal witz, ¿alcye jun lugar na'nx cyyaẍine tuj? K'ukl keye ttxlaj be ic tza'n ke aj Árabe tuj tzkij tx'otx' in che ayon ti'j jun betin xjal tu'n tel cyelk'a'n aju at te, icxtzun cyeye e cub ke'ye tu'n cyayone cyi'j cyyaẍe. Ma baj cytz'ilsa'ne cytanmiye tu'nju yaẍbil in bant cyu'ne ex tu'nju cybinchbene mya ba'n. 3Cyja'tzun minti' ma tzaj jbal tuj tk'ijlalil ttzi jbalil. Ic cytene ic tza'n jun xu'j jawni twitz cyuc'il xinak, ex minti' ma tzaj cych'ixwiye. 4Atzun ja'lo in cyma'ne weye: Aya Kman, aya at kuc'ile atxix tuj kcu'xumale. 5¿Cucxpe ctzajel tlo'ch tc'u'ja ki'je? ¿Te jumajxpe ctel tk'oja? Che chiye. Tej in cyma'ntoke weye icju, lu keye cucx cybinchanteye tcyakil mya ba'n. 6Tuj tk'ijlalil tej tten rey Josías tzaj tma'n Kman weye: ¿Mape tila aju in cybincha'n aj Israel? Ma tz'el cypa'n cyib wi'je. In che'x cywi' ke witz ma' cywa'l ex cyjak' ke tze' nim cyxak, ex atzun in che yaẍin. 7Tuj nximbetze kape che ajetz meltz'aj wuc'ile tbajlenxi cybincha'n tcyakil jlu, pero minti' e ajtz meltz'aj. Ex e ilwaj cyu'n ke cyerman akeju aj Judá, akeju otok tz'el cypa'n cyib wi'je. 8Ax icx o cyil aj Judá ka otok cub npa'n wibe cyuc'il aj Israel ex otok che cyaj ncoline, nok tu'n tlaj el cypa'n cyib wi'je ex tu'n tlaj otok cybincha aj pajil. Pero ke aj Judá el cypa'n cyib wi'je ic tza'n otok cybincha aj Israel akeju cyerman; minti' tzaj ch'in cyxobil, ax icx cye cybincha aj pajil. 9Tu'nju minti' ma tzaj cyxobil ti'j il in cybincha'n, cyja'tzun ma tz'ilix cytanmi cyu'n; ma tz'el cypa'n cyib wi'je ex ma che oc ten c'ulul cywitz ke tilbilal binchamaj cyi'j tze' ex abj. 10Masque icju, ke aj Judá, akeju otok tz'el cypa'n cyib wi'je, minti' ma che ajtz meltz'aj wuc'ile tu'n tcyakil cyanmi; in cyma'n ka ma che ajtz meltz'aj wuc'ile, pero nok tten cyu'n. Akine Dios in chin k'mante jlu. 11Tzaj tma'n Kman weye: Masque ma tz'el cypa'n cyib aj Israel wi'je, pero mas ch'in cye il ma cybincha cywitz aj Judá. 12Chux txi'ya ex k'manxa tkanil lu tuj tx'otx' tuj tbank'ab k'ij: Cyajtz meltz'aje wuc'ile akeye aj Israel cypa'n cyibe wi'je. Mlay tzaj mastl nk'oje cyi'je, ex mya cucx chin k'ojile cyi'je, porque at tk'ak'bil nc'u'je. Akine Dios in chin k'mante jlu. 13Tz'elx cynic'e ti'j ju mya ba'n ma cybinchaye. Ma che oque miban che nimane weye, akine Cymane ex Cydiose, in che c'ulune cywitz ke dios cye mastl nasyon cyjak' cycyakil ke tze' nim cyxak, ex minti' ma txi cybi'ne nyole. Akine Dios in chin k'mante jlu. 14Chi Kman in tma'n: Cyajtz meltz'aje wuc'ile akeye nc'wa'l miban che nimane, akine cyajwile. Ctzajel wi'ne jun cyeye tuj teyle junjun tnam, ex cabca te junjun c'loj cyiyjile akeju at cyxilene cyuc'il, ex che ajel meltz'aj wu'ne tu'n cypon tuj tnam Sión. 15Che oquel nk'o'ne ke cawil cyxole, akeju in chin tzalaje cyi'j, ex atzun ke che cawil cyibaje tuc'il nabl ex tuc'il ojtzkibl. 16Octzun tchmet cybaje tuj cytanmiye ex oc tchmet cybaj cyc'wa'le, mi jun c-yolil juntl maj ti'j cax c'ubl tley Dios, mi jun cximal ti'j, ex mi jun tzul na'nte te, ya minti'tl tajben te cye, ex mlay cub cybincha'n juntl ac'aj. Akine Dios in chin k'mante jlu. 17Ex aju tnam Jerusalén c'oquel tbi Tk'ukbil Kman jatum in cawin, ex atzun c'oquel cychmon cyib cycyakil nasyon tu'n tjaw cynimsa'n nbiye, ex mlay che oc lpe' ti'j cyex cyximbetz mya ba'n. 18Octzun tpon tk'ijlalil lu, c'oquel cyjunin cyib aj Judá cyuc'il aj Israel, ex junxtzun che ajetz meltz'aj tuj tx'otx' tuj tbank'ab k'ij, tu'n cypon tuj tx'otx' xi nk'o'ne te cyetzbil ktzan cyxe'chel. 19Akeye aj Israel, otok cub nximane tu'n cyc'mete wu'ne ic tza'n nc'wa'le ex tu'n t-xi nk'o'ne jun cytx'otx'e tbanilxix; aju tx'otx' lu mas tbanilxix twitz tcyakil mastl tx'otx'. Tuj nximbetze ka tu'n woc cyk'o'ne te cymane ex ka minti' tu'n tel cypa'n cyibe wi'je. 20Pero ic tza'n jun xu'j in cyaj tcolin tchmil ex in xi lpe' ti'j juntl, cyja'xtzun cyeye o chin cyaj cycoline. Akine Dios in chin k'mante jlu. 21In binjtz tk'ajk'ajel cywi xjal cywi' ke witz tz'la'j cyi'j; atzun ke aj Israel in che ok' ex in che cubsan nwitze tu'nju ma che el tzpet ti'j be jikun ti'j ex ma tzic' nna'njtze cyu'n, akine Cyman ex Cydios. 22Cyajtz meltz'aje wuc'ile akeye nc'wa'l miban che nimane, jacu cub nnajsa'ne cyile tu'ntzun cyoque ba'n che nimane. Che chi aj Israel cyma: Lu ko'ye lu, ma ko ule tuc'ila, porque aya Kmane aju Kdiose. 23Minti' ch'in tajben ke tu'n kxi' c'ulul cywitz ke tilbilal cywi' ke tal witz, ex tu'n kjaw sch'in cywi' ke nmak witz; nok o'cx tuc'il Kman aju Kdios jacu cnet colbil ke. 24Tej matok c'wa'lx ko', o kil nimcu at cyuc'il ktzan kman: attok cyẍne'l, cywacẍ, cycy'ajal, cyme'jel, pero tcyakil o baj naj tu'n cylaj ke tilbilal nno'c kdiosin. 25Kmansin cub kib ja'lo, ex e ttzaj kch'ixwi, porque tej c'wa'lxtok ko', icx ja'lo, in ko binchan il twitz Kman aju Kdios, ic tza'n o cybincha ktzan kxe'chel, ex minti' in xi kniman tyol.

will be added

X\